Haamauruuruhia e “te korona ora”
I TE melahi o te amuiraa no Semurina, ua faauehia te aposetolo Ioane ia papai e: “Mau papu râ oe e tae noa ˈtu i te pohe, e na ˈu e horoa ˈtu i te korona ora no oe.” (Apokalupo 2:8, 10) No reira, e poroi peapea e te oaoa atoa teie, oia hoi ua faaoti o Frederick William Franz, peretiteni a te Watch Tower Bible and Tract Society of Pennsylvania e te Watchtower Bible and Tract Society of New York, Inc., e tae noa ˈtu vetahi atu mau tino teotaratia, i ta ˈna hororaa i nia i te fenua nei i te poipoi o te 22 no titema 1992.
E poroi peapea teie i te mea e te faaite ra oia i te hopea o te mau ohipa i nia i te fenua nei a te hoê tavini here-rahi-hia e te haapao maitai faito ore a Iehova. Teie râ, e poroi oaoa atoa no te mea e ua tano teie mau parau a te Apokalupo 14:13 i teie nei no to tatou taeae here o Franz: “E ao to te feia i pohe ma te faaroo i te Fatu e pohe ai ra: Te parau maira hoi te [v]arua, oia mau, ia faaea ratou i te rave i ta ratou ohipa, e e pee hoi ta ratou ohipa ia ratou.” E taata farii i to ˈna mau otia e te haehaa te taeae Franz, e tavini rave puai i te ohipa e te hotu rahi ta te Atua ra o Iehova i faaohipa ma te puai ei melo no “te tavini haapao maitai e te paari” no te haapao i te tufaraa i te maa pae varua no te mau ‘tavini’ e to ratou mau hoa.—Mataio 24:45-47.
Ua fanauhia te taeae Franz i te 12 no setepa 1893, i Covington, Kentucky. Ua faaroo oia i te parau mau na roto i te hoê taeae paari aˈe to ˈna. I taua tau ra, te haere ra oia i te Fare haapiiraa tuatoru no Cincinnati, e te faaineine ra oia no te riro mai ei tia faaroo presbytérien. Maoti râ, ua faarue oia i te Ekalesia presbytérienne e ua apiti atura i te Feia Haapii Bibilia, mai te reira te mau Ite no Iehova i te piiraahia i taua tau ra. Ua bapetizohia o ˈna i te 30 no novema 1913, e i te matahiti i muri iho, ua faarue atura oia i te fare haapiiraa tuatoru e ua haamata ihora oia i te ohipa parauhia ‘colporteur’ (oia hoi pionie). I te 1 no tiunu 1920, ua riro maira oia ei melo no te fetii o te Betela i Brooklyn. Aita i maoro, ua horoahia ˈtura e na ˈna e haapao i te tuhaa ohipa no nia i te taviniraa ‘colporteur’, e i te matahiti 1926, ua tauihia ˈtura oia i te tuhaa ohipa papairaa vea, i reira to ˈna taviniraa ma te rohi puai. I te matahiti 1945, ua riro maira oia ei mono peretiteni a te Taiete Watch Tower e te tahi atu mau tino apiti. I te poheraa te peretiteni o taua tau ra o Nathan H. Knorr, i te matahiti 1977, ua riro maira oia ei peretiteni a te Taiete Watch Tower. Ua tavini oia i nia i teie toroa e tae roa ˈtu i to ˈna poheraa. I roto i to ˈna oraraa, ua ite te taeae Franz i te numera o te mau Ite no Iehova i te maraaraa mai te tahi noa tausani i te tahi tau maha mirioni e te afa. Ua fanaˈo oia e rave rahi mau hopoia no te taviniraa, e tae noa ˈtu te oreroraa i roto i te mau tairururaa nunaa e te ratereraa na roto i te mau amaa e te mau fare mitionare i roto e rave rahi mau tuhaa o te ao nei. Ua faatiahia te aamu o to ˈna oraraa i roto i Te Pare Tiairaa o te 1 no me 1987.
I te monire ahiahi, 28 no titema 1992, ua faatupuhia te hoê oroa hunaraa i te Piha no te Basileia a te Betela no Brooklyn. Ua vauvauhia mai te hoê oreroraa parau mahanahana e te faaitoito i te pae varua e te taeae Albert D. Schroeder no roto oia i te Tino Aratai. Ua taaihia te mau fetii o te Betela na roto i te niuniu, i te Vahi faaapuraa a te Taiete Watchtower, i Patterson, i te Vahi faaapuraa o te pae mouˈa, e i te Vahi faaapuraa o te Basileia, e tae noa ˈtu te fetii o te Betela a te amaa no Kanada.
E moemoe tatou paatoa, te feia iho â râ o tei ohipa i pihai iho ia ˈna, i te taeae Franz. E taata oia o tei taa i te huru o vetahi ê, te faaitoito, e te faaoromai i nia i te mau taata atoa o ta ˈna i tavini e i ratere. Oia mau, ua farii te mau hoa faaroo ia ˈna ia au maite i te manaˈo o te Hebera 13:7: “E haamanaˈo i to outou mau aratai, o tei parau mai ia outou i te parau a te Atua, e pee atu i to ratou faaroo, ma te manaˈo maite i te hopea o ta ratou [faaroo].”
I te 30 no titema 1992, ua maitihia te taeae Milton G. Henschel ei paeraa o te peretiteni a te Taiete, no te mono i te taeae Franz.
[Hohoˈa i te api 31]
Frederick W. Franz i te matahiti 1913
I te fare neneiraa a te Taiete i Myrtle Avenue i te matahiti 1920
E o Nathan H. Knorr i te Yankee Stadium i te matahiti 1953