Te mau mitionare no Micronesia
NOA ˈTU e ua faataa-ê-hia ratou e te mau amaa pape rahi no te Moana rahi no Patitifa, te faanaho nei te mau mitionare no Micronesia ia ratou no te haaputuputu i te mau matahiti atoa no te hoê “farereiraa fetii.” E ihea roa teie mau poro evanelia atoa no te mau motu purara ê e farerei ai? Ma te tano roa, i te vahi ta te faatereraa no taua fenua ra i pii te Aroâ a Iehova—te vahi nohoraa a te amaa no Guam e haapao ra i ta ratou taviniraa.
I te avaˈe tiunu 1992, e 56 mitionare o tei ratere mai i te amaa no te haere i te Tairururaa mataeinaa “Te feia amo i te maramarama.” Ua î roa te vahi i te ata e te mau aparauraa oaoa a farerei faahou ai te mau hoa tahito e te mau hoa apî. Mai tei matauhia, ua tia mai ratou i nia i te mau eˈa o te Piha no te Basileia no te hoê hohoˈa pǔpǔ e i muri iho ua parahi ratou na te hiti o na amuraa maa e toru no te hoê tamaaraa mitionare matahiti, tei riro ei taime taa ê i teie matahiti maoti te tere o te taeae Albert Schroeder, melo no te Tino Aratai.
No te rahiraa o te mau mitionare, ua riro teie farereiraa matahiti i Guam ei taime otahi roa no te faarue i to ratou mau motu faaearaa nainai. E mea nainai mau â. I roto i te Motu Ebeye, hoê o te mau Motu Marshall, e 32 ta anaˈe. Te fare mitionare no Majuro i Marshalls e te fare mitionare no Kiribati i te mau Motu Gilbert, tei nia raua toopiti i te mau motu ǒaǒa aita i naeahia i te 0,8 kilometera te aano. No reira, te haafaufaa nei te mau mitionare i to ratou tere i Guam.
Peneiaˈe e faatupu te manaˈo e poro i nia i te hoê motu iti atea i te moemoeâ, i te parau mau râ, mea fifi roa e mea iti te feia o tei ineine i te faaruru i te reira. Mea anaanatae ia ite e e 7 anaˈe i nia i te mau 56 mitionare, o tei haere i te Fare Haapiiraa Bibilia no Gileada a te Taiete Watchtower. No ǒ mai te rahiraa i te mau motu Vaihi aore ra Philipino i reira to ratou taviniraa ei pionie, e ua matau ê na ratou i te oraraa i te mau pae rua ma, e ua tere roa mai ratou mai to ratou fenua mai no te haere i ta ratou tuhaa taviniraa mitionare.
No te mea tei te pae rua te mau motu no Micronesia, te faaruru nei te mau mitionare i te veavea rahi e te haumi no te afai atu i te parau apî maitai i te feia no taua mau motu ra. Ua riro te paraparauraa ei haafifiraa rahi atu â. Te vai ra to te motu aore ra to te pueraa motu tataitahi to ˈna iho reo—mea taa-ore-hia vetahi e aita hoi i tapaohia i roto i te hoê titionare—e e titauhia e rave rahi mau matahiti hou te hoê taata apî e nehenehe ai e paraparau i teie mau reo. No te tauturu i te mau taata ihotumu huru rau no te mau motu ia papu i te Bibilia, te nenei nei te amaa no Guam i te buka na roto e 11 reo, e 9 o te paraparauhia i Micronesia anaˈe.
No te atea o te tahi mau motu, e nehenehe noa e haere atu i reira na nia i te pahi. Tei nia te fare mitionare no te Motu Tol i Chuuk (Truk) i teie huru motu, e te faaohipa nei te mau mitionare no taua vahi ra i te ito mahana no ta ratou uira no te tahi noa hora i te mahana.
Ia amuihia ratou paatoa, e 14 fare mitionare i Micronesia, o te naeahia fatata hoê â te faito e te fenua o te mau Hau amui no Marite. I nia i na hau atu i te 400 000 taata e ora ra i reira, e 1 000 feia poro o te parau apî maitai, faanahohia i roto e 20 amuiraa e e 3 pǔpǔ atea ê.
Noa ˈtu e mea auhoa te rahiraa o te taata no Micronesia, te haaparuparu nei te mau peu faaroo e te faaheporaa a te mau fetii e rave rahi mau taata ia farii i te parau mau no te Basileia o te Atua. No reira, noa ˈtu e te uˈana ra te pororaa (te faatere nei teie mau 1 000 taata poro hau atu i te 2 000 haapiiraa bibilia), te vai ra te mau amuiraa e te mau pǔpǔ nainai. Ei hiˈoraa, e 5 feia poro anaˈe i nia i te motu Tinian, e 7 noa i nia i te motu Nauru, e aita te mau amuiraa no Yap, Kosrae, e Rota i hau atu i te 40 feia poro. Noa ˈtu râ, ua faaea vetahi mau mitionare i roto i ta ratou tuhaa taviniraa hau atu i te 20 matahiti. Inaha, na mitionare e ono atoa ra i nia i te motu no Belau, e 12 matahiti aore ra hau atu ratou i reira.
No te feia e faaoromai tamau, mea rahi te haamaururuuraa. I te mau mahana atoa, e nehenehe ratou e haafaahiahia i te unauna o te poieteraa a Iehova. Ua purara te mau motu heeuri no Micronesia mai te mau taiamani matie iti na nia i te moana ninamu no Patitifa. E mau kilometera pae miti taata ore e te mau ǎau tei î i te iˈa peni rau o te ume nei i te feia hopu e te feia hiˈo haere na raro i te miti ia mataitai i te mau pape nehenehe roa ˈˈe o te ao nei. E i te ahiahi, te vai ra te hohoˈa unauna o te mahana ia topa i nia i te moana.
Area te haamauruururaa rahi roa ˈˈe, o te haamaitairaa ïa e tavini ia Iehova na roto i te faaiteraa ia vetahi ê i ta ˈna mau parau tǎpǔ e tupu i mua nei. No te mea te tutava ra te mau mitionare no Micronesia ia noaa mai teie haamauruururaa, te faatupu nei ratou i te mau parau a Isaia 42:12: “Ia haamaitai ratou ia Iehova: e ia arue ratou ia ˈna i te mau fenua roa ra.”
[Hohoˈa fenua/Hohoˈa 31]
(Hiˈo i te papai)
Barrigada, Guam
Santa Rita, Guam
Koror, Belau
Motu Chuuk (Truk)
Tarawa, Kiribati
Kosrae
Ebeye
Motu Marshall
Majuro
Kolonia, Pohnpei
Songsong, Rota
Saipan
Yap
MICRONESIA
MELANESIA
MOTU CAROLINE
MOANA PATITIFA
PHILIPINO
NIU GUINEA
RUA
[Hohoˈa]
Farereiraa mitionare i Guam, tiunu 1992