“Aore te mau mouˈa nei i fanau”

“O OE to matou haapuraa, i tera ui, i tera ui. Aore te mau mouˈa nei i fanau, e aore hoi te fenua e te ao atoa nei i hamanihia e oe ra, te vai ra oe, e te Atua, mai tahito mai â e a muri noa ˈtu!” (Salamo 90:1, 2) Ua faataehia teie mau parau i to tatou Poiete, e e parau tamahanahana mau teie—i teie iho â râ mahana, e au ra e aita hoê aˈe ohipa papu!

I roto i te hoê huru tupuraa e ino noa ˈtura i te pae faanavairaa, mea iti o te tiaturi nei i te tau i mua nei. Ua faariro te maraaraa riaria o te taparahiraa taata e te raveraa i te raau taero i te mau oire ei mau tahua tamaˈi. Te aueue atoa nei teie faanahoraa tahito, oia hoi te utuafare fetii. Te faaroo nei tatou i te mau peu apî mai te mau utuafare mǎhu. Te rahi noa ˈtura te mau utuafare metua hoê, e hoê anaˈe hoi metua o te faaruru nei i te hepohepo rahi. Te vavahihia nei te hau o te mau utuafare e rave rahi na roto i te mau ohipa hairiiri mai te tupairaa i te hoa faaipoipo e te hamani-ino-raa i te tamarii.

Na vai e aratai ia tatou i roto i teie mau tau fifi? Parau mau, mea rahi te mau aˈoraa e horoahia mai e te mau taote no te feruriraa, te feia aˈo, e vetahi atu â, teie râ, te patoi nei teie mau aˈoraa te tahi e te tahi. I mua i te hoê ui taatoa no te pae Tooa o te râ, ua riro te taote Benjamin Spock ei taata aˈo faahiahia roa ˈˈe i te pae no te haapiiraa i te tamarii. I muri iho râ, ua farii oia e ua hape ta ˈna mau aˈoraa!

Mea paari aˈe hoi ia faariro i te Atua ei “haapuraa” na tatou! I roto i teie mau tau arepurepu, o ˈna te mato aueue ore, e vai ra “mai tahito mai â e a muri noa ˈtu.” Te na ô ra oia no ˈna iho na roto i te arai o te peropheta Malaki e: “O Iehova hoi au, aore o ˈu e huru ê.” (Malaki 3:6) E nehenehe mau â e tiaturi i te mau ture a te Atua, tei papaihia i roto i te Bibilia. I vai na oia “aore te mau mouˈa nei i fanau,” e ua niuhia ta ˈna mau aˈoraa, e itehia i roto i te mau Papai Moˈa, i nia i to ˈna paari mure ore. Te reira mau ta tatou e titau ra ia noaa mai te oaoa e te manuïa.

Mea paari ïa ia tiaturi i te Parau a te Atua, te Bibilia. A haapii i te Bibilia ia faufaahia outou i te paari o te Atua. A tiaturi i te mea o ta outou e haapii, e a vaiiho i te reira ia riro ei maramarama o te aratai ia outou i nia i te eˈa o te ora. (Salamo 119:105) O te feia anaˈe e na reira, o ratou te nehenehe e tiaturi i te tau a muri aˈe e e fanaˈo i te hau mau o te feruriraa.