Te mau Tairururaa mataeinaa “Te haapiiraa no ǒ mai i te Atua ra”

TE TIAI ru nei te feia atoa e hinaaro ra e ia haapiihia ratou e Iehova i te mau Tairururaa mataeinaa “Te haapiiraa no ǒ mai i te Atua ra.” E haamatara te porotarama e maha mahana i te mau tuhaa faufaa o te haapiiraa a te mau Papai o te paruru i te mau kerisetiano i teie tau i te mau fifi a te taata taitahi e rahi roa nei e te arepurepuraa o teie nei ao. E tauturu te porotarama ia ratou ia haapae ‘i te mau mea atoa e patoi i te haapiiraa ora’ e ia riro ei feia haapii maitatai aˈe i te Parau a te Atua.—Timoteo 1, 1:10.

E mau hiˈoraa maitatai roa ta tatou e nehenehe e pee! O te Atua ra o Iehova te Orometua Rahi roa ˈˈe! No reira, ua tano o Elihu i te parauraa ˈtu ia Ioba e o Iehova o te “rahi o ta ˈna i haapii ia tatou i ta te mau puaa o te ao nei; e paari rahi ta ˈna i ho mai na tatou i ta te mau manu o te reva nei.” Ua ani atoa oia no nia ia Iehova e: ‘O vai te orometua e au ia ˈna ra?’ (Ioba 35:11; 36:22) Te parauhia ra no te Atua i roto i te Isaia 30:20 e O ˈna te ‘Orometua Rahi.’

Te orometua i muri noa iho ia Iehova, o Iesu Mesia ïa. Ua matauhia oia mai te “Orometua” e te “Haapii,” tau 50 taime hoi to ˈna faahitiraahia e teie mau tiaraa iˈoa i roto i te mau Evanelia. Noa ˈtu ta ˈna mau faaoraraa maere mau e te tahi atu mau semeio, aita o Iesu i matauhia mai te Taote, area ra mai te Orometua, oia hoi te Haapii.—Mataio 8:19; Luka 5:5; Ioane 13:13.

Ma te tano roa, ua haapii Iesu i ta ˈna mau pǐpǐ e ta ˈna mau aposetolo ia riro ei feia haapii mai ia ˈna atoa ra. O ta tatou ïa e ite ra i roto i te Mataio 10:5 e tae atu i te 11:1 e te Luka 10:1-11. Na mua iti noa ˈˈe to ˈna haereraa ˈtu i nia i te raˈi, ua horoa o Iesu i te hoê faaueraa matau-maitai-hia i te pae no te haapiiraa i ta ˈna mau pǐpǐ, tei tapaohia i roto i te Mataio 28:19, 20. Te faatia ra te buka Ohipa, e tae noa ˈtu te mau rata faauruahia no muri iho a te mau Papai Heleni Kerisetiano, i te itoito, te aravihi, e te haapao maitai rahi a te mau pǐpǐ matamua a Iesu i to ratou haapaoraa i teie faaueraa i te pae no te haapiiraa.

Mea ru atu â teie ohipa haapiiraa i teie mahana. Te ora nei hoi tatou i te mau mahana hopea o teie faanahoraa o te mau mea, e no reira, e tia ia faaora i te taata. Ia ore te taata ia apiti atu i roto i te mau hara a Babulonia Rahi e ia ore ratou ia roohia i to ˈna ra mau ati, e tia ia haapiihia e ia tauturuhia ratou ia haere mai i rapae ia Babulonia e ia faaoti e tavini ia Iehova e to ˈna ra Basileia.—Apokalupo 18:4.

No te tauturu i te mau Ite no Iehova atoa i roto i ta ratou mau tutavaraa e amo i ta ratou hopoia i te pae no te haapiiraa, ua horoa mai Iehova na roto i ta ˈna faanahonahoraa i te mau Tairururaa mataeinaa “Te haapiiraa no ǒ mai i te Atua ra.” E haamata teie mau tairururaa e maha mahana i roto i te afa Apatoerau o te fenua, i te omuaraa o te tau veavea. Ia faanaho te tavini pûpûhia tataitahi a Iehova e ia tae atu iho â oia i te hoê o taua mau tairururaa ra, ia tia ˈtu oia i reira e ia faaroo maitai oia mai te himene e te pure haamataraa i te mahana maha i te avatea e tae atu i te pure faaotiraa o te sabati i te avatea.