“Iaorana! Ua ite anei oe i te iˈoa o te Atua?”
I TE amaa a te mau Ite no Iehova no Beresilia, teie te rata i faataehia mai e na tamahine maehaa e 12 matahiti no te oire no Fortaleza:
“I te matahiti 1990 ra, tei roto mâua i te piha haapiiraa faito pae, ua faanaho ta mâua fare haapiiraa i te hoê taurua no te ite aivanaa, te mau ohipa aravihi, e te ihotumu. Ua faataa ˈtura mâua i ta mâua orometua haapii e te hinaaro ra mâua e ia taa ê ta mâua tuhaa i ta te tahi atu mau tamarii haapii e faaineine ra. I te mea e ua faaroo oia ia mâua i te paraparauraa no nia ia Iehova e te Bibilia na mua ˈˈe, ua parau maira o ˈna: ‘A papai ïa i te hoê tumu parau no nia i to orua Atua!’
“Ua riro te reira no mâua ei ravea maitai roa no te faaite i te poroi e ua opua ˈtura mâua e faanaho i te hoê faaiteiteraa e te tahi mau buka bibilia o te tuu i te tapao i nia i te iˈoa o Iehova. Ua faaineine mâua i te hoê papairaa rahi o te mau parau a Salamo 83:18 e ua tapiri atura mâua i nia i te hoê hohoˈa o te hoê Bibilia tei iritihia. Ua tuu atoa mâua i nia i te hoê airaa maa te tahi mau tatararaa taa ê o te Bibilia te vai ra i roto te iˈoa ra o Iehova. I nia i taua airaa maa ra, ua faanaho mâua i te tahi mau buka bibilia huru rau. I te hiti o te airaa maa, ua tamau mâua i te hoê matini video e te hoê afata teata no te faaite i te feia mataitai i te hoê hiˈoraa i reira te iˈoa Iehova i te faaohiparaahia i roto i te hoê hohoˈa teata matauhia.
“I taua taurua ra, ia haere mai te hoê taata i pihai iho i ta mâua airaa maa, e parau atu mâua e: ‘Iaorana! Ua ite anei oe i te iˈoa o te Atua?’ I muri aˈe i te vaiihoraa i te taata ia pahono mai, e parau atu mâua e: ‘A hiˈo na! E rave rahi mau tatararaa o te Bibilia e faaite ra e o Iehova to ˈna iˈoa,’ ma te faaite i teie iˈoa i roto i te mau Bibilia taa ê, mai ta João Ferreira de Almeida, Te Bibilia no Ierusalema, e te Tatararaa a te ao apî. I reira, e hauti atu mâua i te hohoˈa i reira te taata hauti matamua e faahiti ai e o Iehova te iˈoa o te Atua. Ia faaite mai te taata i te anaanatae, e horoa ˈtu mâua i te hoê vea aore ra te hoê api parau iti e vetahi atu â mau haamaramaramaraa.
“Ua ani mai te hoê taurearea o tei haere mai i ta mâua airaa maa i te buka Te uiui nei te mau taurearea—Mau pahonoraa ohie (farani). Ua hiˈopoa ta mâua orometua haapii i te buka Nafea ia faatupu i te hoê oraraa utuafare oaoa e ua na ô maira oia e: ‘Auê hoi e! E buka anaanatae roa teie!’ I te hopea o te taurua, ua opere mâua e 7 buka, e 18 api parau iti, e e 67 vea. Ua noaa ia mâua te toru o te parahiraa o te taurua. Teie râ, ua hau atu mâua i te oaoa i to mâua neheneheraa e faaite i te iˈoa o te Atua, o Iehova.”