Te haponoraa i te tauturu Tapao no te here kerisetiano

“E AROHA ˈtu i te hui taeae,” o ta te aposetolo Petero ïa i faaue atu i to ˈna mau hoa kerisetiano. (Petero 1, 2:17) E na nia ˈtu teie here i te mau otia i te pae no te iri, te tiaraa totiale, e te mau nunaa, ma te tahoê i te mau taata i roto i te hoê taairaa taeae mau. I te taime a itehia ˈi te ereraa i te pae materia i rotopu i te mau kerisetiano matamua, ua turai te here i te mau taata e rave rahi ia horoa i te mau ô i te mau aposetolo ra ia operehia na te feia e erehia ra. Te na ô ra te faatiaraa e “ua amui-noa-hia na ratou atoa.”—Ohipa 2:41-45; 4:32.

Ua ite-papu-hia teie here i to te Tino Aratai a te mau Ite no Iehova titauraa, i te hopea o te matahiti 1991, e rave rau mau amaa a te Taiete Watch Tower i Europa Hitia o te râ, ia pûpû i te maa e te ahu no te hapono atu i to ratou mau taeae e fifihia ra i Europa Hitia o te râ, e tae noa ˈtu i te tahi mau pae no Rusia tahito. Teie vetahi mau tabula i faataehia mai no ǒ mai i te mau amaa i titauhia ra.

Tuete

I te 5 no titema 1991, ua faataehia ˈtu te hoê rata e faataa ra i te ereraa i na amuiraa e 348 atoa no Tuete. Aita i maoro te pahonoraa i te taeraa mai. Tau mahana noa i muri iho, ua tere atu te pereoo uta rahi matamua i St. Petersburg, Rusia, faatomohia e e 15 tane faraoa ota, hinu tunu maa, punu puaatoro, û puehu, e te tahi atu mau mea. Ua tie mai te mau Ite no Iehova no taua vahi ra i te mau tauihaa i raro e ua opere oioi atura i te mau 750 afata i te feia e erehia ra. I muri aˈe, e piti pereoo uta rahi o tei afai atu i te maa i Rusia. I roto i te taatoaraa, hau atu i te 51,5 tane tei utahia ˈtu no ǒ mai ia Tuete ra.

Ua hau atu te hinaaro e pûpû i te ahu e te mau tiaa i te faito i manaˈohia. E mau haapueraa puohu ahu o tei haaputu-oioi-hia i roto i te mau Piha no te Basileia. E rave rahi mau kerisetiano o tei pûpû i to ratou iho mau ahu. Ua hoo mai vetahi i te mau ahu apî. Ua hoo mai te hoê taeae e pae pereue. Ua hitimahuta te fatu fare toa, e i to ˈna iteraa i te tumu, ua horoa faahou mai oia e pae pereue. Ua hoo mai te tahi atu taeae i te hoê afata totini, vehî rima, e te mau horoi. I to ˈna faataaraa ˈtu i te tumu, ua pûpû te fatu fare toa e 30 pereue apî no te tino moni e piti. Ua horoa te hoê fatu fare toa e 100 tiaa apî.

Ua afaihia ˈtura teie mau taoˈa atoa i te amaa no te tufaraa, te puohuraa, e te faautaraa. Ua î roa te amaa i te mau ahu—oia hoi te faito e 40 pereoo uta rahi! Ua ohipa te mau taeae e te mau tuahine e rave rahi mau hebedoma no te faataa i te mau taoˈa no te tane, te vahine, e te tamarii, e i muri iho te faanahoraa i roto i te mau afata. Hoê ahuru ma pae pereoo uta rahi taa ê o tei faaohipahia no te faatae atu i te mau ahu ma te peapea ore i Rusia, Ukraine, e Estonia.

Ua parau te hoê taeae o tei faahoro i te hoê o te mau pereoo a te Taiete e vau taime i Rusia tahito e: “Ua riro te fariiraa o to tatou mau taeae i to matou tapaeraa ˈtu i reira ei haamauruururaa rahi. Ua tauahi mai e ua apa mai ratou ia matou, e noa ˈtu te iti o ta ratou faufaa, na ratou i horoa mai na matou i te hoê haapiiraa faahiahia i te pae no te horoa maitai kerisetiano.”

Filelane

Noa ˈtu te topatariraa e farereihia ra e te fenua Filelane, te ereraa i te ohipa, e te mau fifi i te pae faanavairaa, ua faaite te mau 18 000 taeae Filelane i to ratou hinaaro e tauturu i to ratou mau taeae no Rusia tahito. Ua hapono ratou hau atu i te 58 tane maa i roto e 4 850 afata i St. Petersburg, Estonia, Latvia, Lithuania, e Kaliningrad. Ua faaî atoa ratou i te mau area e toe ra i roto i te mau pereoo faauta e e 12 metera tuea ahu. E 25 pereoo uira e mau pereoo rahi o tei pûpû-atoa-hia no te ohipa o te Basileia.

Ua tapae atu te tahi mau afata maa i te hoê amuiraa e 14 feia poro i Slanti i te vahi no St. Petersburg. Ua faaite mai ratou i to ratou mauruuru rahi na roto i te hoê rata. “Hoê ahuru tuahine paari to matou i roto i ta matou amuiraa. E rave rahi i rotopu ia matou o tei pohehia i te maˈi e eita ta matou e nehenehe e tiai ma te tia noa e rave rahi hora te maoro ia noaa mai ta matou maa. Teie râ, ua horoa mai to tatou Metua i te raˈi ra, i te tumu ia ore matou ia haaparuparu i mua i teie mau tau fifi, te faaî nei râ oia i to tatou mafatu i te oaoa. Te faatere nei matou e 43 haapiiraa bibilia.” I te noaaraa mai ia ˈna ta ˈna puohu tauturu, ua putapû roa te hoê tuahine no St. Petersburg e ua taˈi oia e piti hora na mua ˈˈe oia e iriti ai i ta ˈna puohu.

Danemaka

I roto i teie fenua iti i te hiti o te Miti Baltique, ua tahoê e 16 000 Ite no Iehova e ua tono atu ratou i Ukraine e 19 pereoo uta rahi e 64 tane maa i roto e 4 200 afata; e 4 600 afata ahu maitatai; e 2 269 tiaa apî. Ua vaiiho te hoê taeae no Helemani i te amaa ia faaohipa e pae pereoo uta rahi, o ta ˈna i horoa ˈtu i muri iho na te mau taeae i Ukraine. I to ratou hoˈiraa mai, ua parau te hoê o te feia faahoro e: “Ua itea mai ia matou e ua hau atu ta matou i faahoˈi mai i ta matou i afai atu. Ua haapuai rahi mau â te here e te manaˈo haapae ia ratou iho o to tatou mau taeae no Ukraine i to matou faaroo.”

Ua titauhia te mau taeae faahoro ia ara i te nǎnǎ eiâ na nia i te mau purumu o te fenua no Rusia tahito. Tau mahana na mua ˈtu te mau pereoo rarahi no Danemaka e tere atu ai, ua tupu te hoê eiâraa i nia i taua purumu ra. Ua tapeahia e pae pereoo rarahi e maa to roto a te tahi atu faanahonahoraa tauturu e te feia eiâ o tei faaohipa i te mau manureva tautau e te mau pupuhi. Ua rave ratou i na pereoo e pae atoa ra, ma te faarue i te feia faahoro i te pae purumu. Noa ˈtu teie atâtaraa, ua tapae atu te taatoaraa o te mau tauihaa a te amaa no Danemaka i te mau taeae ma te peapea ore. Ei faahoˈiraa, ua horoa ˈtu te mau taeae i te hoê rata iti i te hoê taata faahoro e faahoˈi atu i to ˈna fenua, o ta ratou i papai ma te fifi roa na roto i te reo Beretane: “E au mau taeae e mau tuahine here no Danemaka: Ua tapae mai ta outou tauturu. Ia haamaitai Iehova ia outou.”

Holane

Ua tono te amaa no te fenua Holane e 52 tane maa i roto e 2 600 puohu. Ua afaihia ˈtu i Ukraine na nia e piti anairaa pereoo taa ê. I na taime taitahi, ua vaiihohia ˈtu na pereoo uta rahi e ono, ei mau ô a te mau taeae no Helemani no te ohipa o te Basileia i te pae Hitia o te râ. Ua faatae atu te mau taeae no Ukraine i te rahiraa o te maa i Moscou, Siberia, e te tahi atu mau vahi i reira te vai ra te hoê ereraa rahi. Hau atu, e 736 metera tuea rahiraa ahu e tiaa o tei horoahia e te mau taeae Holane. Ua afaihia ˈtu i Lviv i Ukraine na nia e 11 pereoo rarahi o tei apeehia e te hoê pereoo taa ê.

I muri aˈe i te hoê tere roa na roto ia Helemani e o Polonia, ua haere atura teie mau pereoo na roto i te mau tapearaa otia fenua no Ukraine, e ua tapae atura i Lviv i te hora 3 i te aahiata. Teie ta te feia faahoro pereoo e faaite ra: “I roto i te hoê taime poto roa, e 140 taeae o tei putuputu mai no te tie mai i te mau tauihaa mai nia mai i te mau pereoo. Hou ratou e haamata ˈi i te ohipa, ua faaite teie mau taeae haehaa i to ratou tiaturi ia Iehova, na roto i te faahitiraa i te hoê pure amui. I te otiraa te ohipa, ua putuputu faahou ratou no te faatae i te hoê pure haamauruururaa ia Iehova. I muri aˈe i to ratou fanaˈoraa i te farii maitai o te mau taeae no taua vahi ra, o tei horoa rahi mai i te iti e vai ra ia ratou ra, ua apee mai ratou ia matou e tae roa ˈtu i te purumu rahi, i reira to ratou pûpûraa i te hoê pure na te hiti purumu hou ratou e faarue mai ai ia matou.

“I roto i te tere roa no te hoˈi atu iǒ matou, mea rahi te mau mea o ta matou i haamanaˈo—te farii maitai o te mau taeae no Helemani e no Polonia, e to te mau taeae no Lviv; te puai o to ratou faaroo e to ratou faaohiparaa i te pure; to ratou farii maitai i te horoaraa mai i te vahi nohoraa e te maa noa ˈtu e tei roto ratou i te fifi; to ratou faaiteraa i te tahoêraa e te ati-maite-raa; e to ratou mauruuru. Ua feruri atoa matou i to matou mau taeae e mau tuahine i to matou fenua, o tei horoa i te taoˈa i roto i te hoê faito rahi.”

Helevetia

Ei parau omuaraa, ua faahiti te amaa no Helevetia i te Iakobo 2:15, 16: “Ia pohe hoi te hoê taeae, e te hoê tuahine i te veve, e aore e maa i te mau mahana atoa ra, ia parau atu râ te hoê o outou ia raua ra, Ia ora na i te haerea, ia mahanahana hoi orua, e ia paia hoi, aita râ i horoa ˈtu i te mea e maitai ai te tino ra; eaha to reira faufaa?” E te na ô ra te tabula i muri iho e: “Teie te irava o ta matou i haamanaˈo i te taime a ani mai ai te Tino Aratai a te mau Ite no Iehova ia matou ia horoa i te tauturu i te pae materia no to tatou mau taeae e erehia ra.”

“I reira iho, ua haavitiviti te mau taata atoa! I roto noa e piti mahana, e 12 tane maa i roto e 600 puohu o tei haponohia ˈtu i Ukraine na nia e toru pereoo rarahi no Helemani, o tei pûpûhia no te ohipa i reira. Ua oaoa roa to tatou mau taeae i reira i to ratou faarooraa e ua tapae paatoa ratou ma te peapea ore. I roto i taua area taime ra, ua haaputuputu te mau amuiraa i te ahu, e aita i maoro, ua î roa ta matou amaa i te mau afata, te mau afata tauihaa e te mau pute! I roto i te mau puohu ahu tamarii, te vai atoa ra te tahi mau hauti tei horoahia e te mau tamarii Helevetia na te mau hoa o ta ratou i ore i matau no te mau fenua Apatoerau. E rave rahi mau puohu totora o tei patia-atoa-hia ˈtu i roto i te mau ahu i apapahia.”

Mea nafea teie mau tauihaa atoa i te afairaahia? Te na ô ra te tabula e: “Ua tauturu mai te amaa no Farani ia matou na roto i te horoaraa mai e piti pereoo uta rahi e e maha taata faahoro. Hau atu, ua titauhia hoê pereoo rahi a ta matou amaa e e maha ê atu a te tahi mau taeae no te uta ˈtu e 72 tane tauihaa i Ukraine.” Ua tae atu teie anairaa pereoo e 150 metera te roa, ma te peapea ore i te vahi vaiihoraa tauihaa i Lviv, i reira fatata e hoê hanere taeae no taua vahi ra o te tiai noa ra no te tatara mai i te mau tauihaa. Ua faaite te feia faahoro e aita te fifi o te reo i haapeapea ia ratou no te mea ua itehia to ratou mauruuru rahi i nia i to ratou hohoˈa mata.

Auteteria

Ua tono te mau taeae no Auteteria e 48.5 tane maa, e 5 114 afata ahu, e e 6 700 tiaa i Lviv e Uzhgorod, i Ukraine. Ua hapono atoa ratou e 7 tane maa, e 1 418 afata ahu, e e 465 tiaa i Belgrade, Mostar, Osijek, Sarajevo, e Zagreb i Yugoslavia tahito. Te faaite ra te tabula a te amaa e: “E 12 pereoo uta rahi o tei faatomohia, e ua tere ratou e 34 000 kilometera. Te rahiraa o teie ohipa utaraa, ua ravehia ïa e te hoê taeae e ta ˈna tamaiti e taiete pereoo uta rahi hoi ta raua.”

No nia i te mau ahu i horoahia, te na ô râ te tabula e: “Ua faaohipa matou i te hoê Fare Tairururaa ei pu haapueraa tauihaa. Ua tae noa mai te mau tauihaa utahia mai na nia i te mau pereoo rarahi, e aita ˈtura e ô faahou. Mai i te tau o Mose ra, ua titauhia ia tapeahia te taata eiaha ratou ia afai faahou mai i te taoˈa. (Exodo 36:6) Ua horoa atoa mai te mau taata e ere i te Ite no Iehova i te moni, ‘no te mea,’ mai ta ratou i parau mai, ‘na roto i teie ravea, ua ite matou e e tae iho â teie moni i te feia e erehia ra.’ Ua horoa atoa mai te mau taiete no teie nei ao i te mau afata e titauhia ra ma te tamoni ore.” Te mau taeae e te mau tuahine o tei faataa e o tei puohu i te mau tauihaa atoa, mai te 9 e tae atu i te 80 matahiti to ratou. Ua tamata atoa ratou i te rave i te taamu arapoa e tano i te ahu oomo no te pereue tataitahi.

Te faaite ra te tabula e: “Ua tauturu rahi mai te mau tia mana no Auteteria e i te mau otia fenua na roto i te faaohieraa i te utaraa i te mau tauturu taa ê e te horoaraa mai i te mau papie titauhia ia iti mai te mau fifi.”

Italia

Mai Roma mai, tau 188 tane maa o tei faataehia na nia e piti anairaa pereoo rarahi na roto atu ia Auteteria, Tekolovakia, e Polonia, e tae roa ˈtu i Rusia tahito. I roto i te mau anairaa pereoo tataitahi, te vai ra e ono feia faahoro, hoê taata tataˈi pereoo, hoê taata haapao uira pereoo, hoê taata auvaha, hoê taata haapao i te haponoraa, hoê taata tunu maa, hoê taote, e te taata aratai i te anairaa pereoo i roto i te hoê pereoo jeep, e te hoê taeae e te hoê pereoo puhaparaa.

Na e hitu taiete i horoa mai i te maa. Te faataa ra te amaa e: “I to te feia fatu taiete faarooraa i te tumu o teie ohipa, ua hinaaro vetahi e turu atoa mai. E rave rahi mau kilo pate e raiti, e tae noa ˈtu te mau afata, o tei horoa-noa-hia mai e te mau taiete no teie nei ao. Ua horoa atoa mai vetahi i te mau huira pereoo tere na nia i te hiona no te mau pereoo uta rahi aore ra ua horoa mai ratou i te moni.

“Ua oaoa roa te mau taeae no Italia i teie aniraa i te tauturu. Ua hinaaro atoa te mau tamarii e apiti mai. Ua hapono mai te hoê tamaiti e pae matahiti i te hoê tuhaa moni iti ma te manaˈo e e navai no te hoo mai i ‘te hoê punu tuna e naea-roa-hia i te raˈi no te mau taeae i Rusia.’ No ta ˈna mau nota maitatai i te fare haapiiraa, ua noaa mai te moni a te hoê tamahine iti no ǒ mai i to ˈna mau metua tupuna no te hoo mai i te hoê taoˈa pûpû no ta ˈna mau metua. ‘Teie râ,’ o ta ˈna ïa i papai, ‘i to ˈu iteraa e e rave rahi mau taeae aita ta ratou te mau maa maitatai atoa o ta ˈu e fanaˈo nei, ua manaˈo vau e te taoˈa pûpû maitai roa ˈˈe o ta ˈu e nehenehe e hoo na ta ˈu mau metua, o te tautururaa ˈtu ïa i teie mau taeae.’ Ua tuu oia i te hoê tino moni rahi i roto i te afata ô. ‘Maitai e e noaa faahou mai te mau nota maitatai, ia nehenehe vau e hapono noâ i te moni,’ o ta ˈna ïa i parau.” Te faaoti ra te tabula a te amaa i te na ôraa e ua riro te mau rata haamauruururaa hohonu no ǒ mai i te mau taeae no Ukraine, te mau parau haamauruururaa e rave rahi a te mau taeae no Italia, e te mau ohipa maitatai i farereihia no te faaineineraa e no te faataeraa ˈtu i te mau taoˈa, ei mea putapû, te faaitoito, e te faatupu i te autahoêraa.

Te maa no te mau tausani tia

Ua tupu te tairururaa nunaa matamua a te mau Ite no Iehova i Rusia tahito i te tahua taaroraa Kirov no St. Petersburg i Rusia, i te 28-30 no tiunu 1992. Ua hau atu i te 46 200 mau tia no ǒ mai e 28 fenua, o tei tae atu i teie tairururaa faufaa roa, “Te feia amo i te maramarama.” Ua horoa mai te reira i te hoê ravea no te faaite i te here kerisetiano ‘no te taatoaraa o te hui taeae.’—Petero 1, 2:17.

E mau tane maa no ǒ mai ia Danemaka, Filelane, Tuete, e te tahi atu mau fenua no Europa Tooa o te râ o tei operehia ˈtu ma te tamoni ore i te mau tausani tia o tei tae atu i te tairururaa no ǒ mai i te fenua Rusia tahito, ia amuhia i te taime tairururaa. I to ratou faarueraa mai i te tairururaa i muri aˈe i te rururaa hopea, ua horoa-atoa-hia ˈtu te tahi puohu maa no to ratou tere hoˈiraa ˈtu iǒ ratou.

Te faaite ra te mau tabula e faahitihia ra i ǒ nei e e ere na te hoê noa pae i pûpû i te taoˈa—faatae atu i te pae hitia o te râ. Ua faahoˈihia maira râ teie horoaraa. Parau mau, ua haponohia ˈtu te maa e te ahu i te pae hitia o te râ, teie râ, ua faataehia ˈtu i te pae tooa o te râ, i te mau tapao numera-ore-hia o te here e te mau faaiteraa o te haaputapû i te faaroo e haapapu ra i te faaoromai tamau e te haapao maitai o te mau tausani feia haamori ia Iehova i roto i te mau rahiraa matahiti o te haavîraa e te haafifiraa. No reira, ua tamata na pae e piti nei i te parau mau o teie faahitiraa a Iesu: “E mea maitai i te horoa ˈtu i te rave mai.”—Ohipa 20:35.

[Tapura/Hohoˈa i te api 21]

1. No Filelane mai: St. Petersburg, Rusia; Tallinn e Tartu, Estonia; Riga, Latvia; Vilnius e Kaunas, Lituania; Kaliningrad, Rusia; Petrozavodsk, Karelia

2. No Holane mai: Lviv, Ukraine

3. No Tuete mai: St. Petersburg, Rusia; Lviv, Ukraine; Nevinnomyssk, Rusia

4. No Danemaka mai: St. Petersburg, Rusia; Lviv, Ukraine

5. No Auteteria mai: Lviv, Ukraine; Belgrade, Mostar, Osijek, Sarajevo, Zagreb (i Yugoslavia tahito)

6. No Helevetia mai: Lviv, Ukraine

7. No Italia mai: Lviv, Ukraine

[Hohoˈa i te api 23]

Afata ahu i te amaa no Tuete

Faatomoraa i te mau tauihaa tauturu

Maa i roto i te hoê puohu

Bacon e jambon no Danemaka mai

Anairaa e 11 pereoo uta rahi e 1 pereoo uira

Mau puohu e afata vairaa ahu i te amaa no Auteteria

Tieraa mai i te mau tauihaa i raro i te pereoo uta rahi i Lviv, Ukraine