‘E ravehia e afaihia i nia ia farerei atu i te Fatu’—Nafea?
TE MAIRI noa ra te taime e toe ra hou te haamouraa o teie nei faanahoraa ino. A mairi noa ˈi te mau hora, te mau minuti, e te mau tetoni tataitahi, te piri noa ˈtura tatou i te mau ohipa hitimaue o tei tohuhia mai mea maoro i teie nei. Tei roto atoa anei te afai-ê-raahia i teie mau ohipa? Mai te peu e e, afea e mea nafea te reira e tupu ai?
Aita te parau “afai-ê-raahia” e vai ra i roto i te Bibilia. Teie râ, te faahiti nei te feia e tiaturi nei i te reira i te mau parau a te aposetolo Paulo i roto i te Tesalonia 1, 4:17 ei niu no ta ratou tiaturiraa. E hiˈopoa anaˈe na i teie irava ia au i te taatoaraa o te mau irava. Ua papai o Paulo e:
“E teie nei, e te mau taeae, aita vau i hinaaro e ia ore outou ia ite i te parau i te feia i mairi te taoto nei, ia ore hoi outou ia taiâ, mai te tahi pae aore o ratou tiairaa ra. Ua faaroo hoi tatou e, i pohe Iesu e tia faahou aˈera i nia, oia atoa te feia e taoto i roto ia Iesu nei, na te Atua ïa e faahoˈi mai e oia atoa ra. Teie ta matou e parau atu ia outou, i ta [Iehova] ra parau, o tatou o te feia e ora o te toe i te ao a roohia mai ai e te Fatu ra, e ore e na mua i te feia e taoto nei. O te Fatu iho hoi te pou mai mai te raˈi mai, ma te umere, ma te reo o te melahi rahi, e ma te pu a te Atua; e te feia i pohe i roto i te Mesia ra, o te tia mai na ïa i nia. E muri aˈera, o tatou o te feia ora e toe ra, e ravea-atoa-hia mai ïa e ratou atoa ra i reira, afaihia ˈi i nia i roto i te ata, ia farerei atu i te Fatu i roto i te reva nei ra; a parahi mau atu ai tatou i pihai atoa iho i te Fatu e â muri noa ˈtu. E tena na, e haamahanahana outou ia outou iho i teie nei mau parau.”—Tesalonia 1, 4:13-18.
Mea apî roâ te amuiraa no Tesalonia i to Paulo faataeraa ˈtu i ta ˈna rata matamua i te mau kerisetiano no taua vahi ra i te area o te matahiti 50 o to tatou nei tau. Ua peapea vetahi mau melo o te amuiraa i te mea e ua ‘mairi vetahi i te taoto o te pohe.’ Teie râ, ua tamahanahana te mau parau ta Paulo i papai atu i to Tesalonia maoti te tiaturiraa o te tia-faahou-raa.
Te “vairaa mai” o te Mesia
Ma te haapapu e e faatiahia mai te mau kerisetiano haapao maitai o tei pohe, ua parau atoa o Paulo e: ‘Tatou, te feia e ora e tae atu i te vairaa mai o te Fatu, e ore tatou e na mua i te feia o tei varea i te taoto o te pohe.’ (Irava 15, ia au i te Tatararaa a te ao apî) E tia ia tapao i te faahitiraa a te aposetolo i te ‘vairaa mai’ o te Fatu. I ǒ nei, te faaohipa ra te papai na roto i te reo tumu i te parau Heleni ra pa·rou·siʹan, oia hoi te auraa mau, “te vairaa mai i pihai iho.”
Ia tere atu te hoê tia no te hoê Hau ěê i te hoê fenua, mea pinepine te mau taio mahana o to ˈna tere i te faaitehia. Hoê â huru no te vairaa mai o te Fatu ra o Iesu Mesia. Ua faaite papu Te Pare Tiairaa i te feia haapii aau mehara i te parau tohu a te Bibilia e faataa ra e ua haamata te vairaa mai o Iesu i roto i te Basileia i nia i te raˈi i te matahiti 1914. Ua haapapu te mau ohipa mai taua matahiti ra i te vairaa mai itea-ore-hia o Iesu. (Mataio 24:3-14) No reira, na roto i te parauraa e e “afaihia” vetahi mau kerisetiano e ora ra i te tau o te vairaa mai o te Fatu “i nia i roto i te ata, ia farerei atu i te Fatu i roto i te reva nei,” ua hinaaro o Paulo e parau e e farerei taua feia ra e ora ˈtu, i te Mesia, eiaha i roto i te reva o te fenua nei, i roto râ i te ao itea-ore-hia o te raˈi i reira o Iesu e parahi ai i te pae atau o te Atua. (Hebera 1:1-3) O vai râ ratou?
“Te Iseraela a te Atua”
Te faahiti rahi ra te mau Papai i te parau no te mau ati Iseraela i te pae tino e te parau atoa ra oia no te “Iseraela a te Atua” i te pae varua. E apitihia te feia faaroo ati Iuda e te feia no te mau nunaa i roto i te numera taatoa o teie pǔpǔ faatavaihia e te varua moˈa o te Atua, oia hoi to ˈna puai ohipa. (Galatia 6:16; Roma 11:25, 26; Ioane 1, 2:20, 27) Te faaite ra te buka Apokalupo e te numera taatoa o te Iseraela i te pae varua, e 144 000 ïa, te itehia ra ratou paatoa i pihai iho i te Arenio, o Iesu Mesia, i nia i te Mouˈa ra o Ziona i nia i te raˈi. I pihai iho i te Mesia, e riro ratou ei mau arii e ei mau tahuˈa i nia i te raˈi. (Apokalupo 7:1-8; 14:1-4; 20:6) I rotopu ia ratou, te vai ra te feia o tei tahoê na e te mau amuiraa no Tesalonia e i te tahi atu vahi, noa ˈtu e eaha to ratou iri aore ra to ratou nunaa taata.—Ohipa 10:34, 35.
Hou te mau melo haapao maitai o te Iseraela i te pae varua e fanaˈo ai i te haamauruururaa i nia i te raˈi, e tia ia ratou ia faaruru i te tahi huru tupuraa. Mai ia Iesu i pohe i nia i te pou haamauiuiraa na mua ˈˈe i to ˈna tia-faahou-raa no te ora i nia i te raˈi, e tia atoa i te mau kerisetiano e tiaturi ra e haere i nia i te raˈi ia pohe hou ratou e fanaˈo ai i ta ratou haamauruururaa. (Korinetia 1, 15:35, 36) E tano te reira no te mau melo o te Iseraela i te pae varua e ora ra i te senekele matamua o to tatou nei tau, e o te feia e ora nei i teie nei mahana.
I muri aˈe i to ˈna faahitiraa i ‘te vairaa mai o te Fatu,’ ua faahiti o Paulo i te tau i reira te mau Iseraela haapao maitai i te pae varua o tei pohe e fanaˈo ai i ta ratou haamauruururaa i nia i te raˈi. Ua papai oia e: “O te Fatu iho hoi te pou mai mai te raˈi mai, ma te umere, ma te reo o te melahi rahi, e ma te pu a te Atua; e te feia i pohe i roto i te Mesia ra, o te tia mai na ïa i nia.” (Irava 16) No reira, ia haamata anaˈe te vairaa mai o Iesu ei Arii, e nehenehe ïa tatou e tiaturi e e haamata te tia-faahou-raa i nia i te raˈi, na mua e te feia o te Iseraela i te pae varua o tei pohe ê na ei feia taiva ore. (Korinetia 1, 15:23) Te tavini nei ratou i teie nei i pihai iho ia Iesu i nia i te raˈi. Teie râ, eaha ïa no te pǔpǔ iti o te mau kerisetiano faatavaihia e ora noa nei â i nia i te fenua? Te tiai nei râ anei ratou i te afai-ê-raahia?
“Afaihia i nia”—Nafea?
I muri aˈe i to ˈna faahitiraa i te parau no te mau kerisetiano faatavaihia o tei pohe, ua parau atoa o Paulo e: “E muri aˈera, o tatou o te feia ora e toe ra, e ravea-atoa-hia mai ïa e ratou atoa ra i reira, afaihia ˈi i nia i roto i te ata, ia farerei atu i te Fatu i roto i te reva nei ra; a parahi mau atu ai tatou i pihai atoa iho i te Fatu e â muri noa ˈtu.” (Irava 17) “Te feia ora,” o te feia ïa e ora ra i roto i te area o te vairaa mai o te Mesia. E “afaihia” ratou i nia no te farerei i te Fatu ra o Iesu. Mai te mau kerisetiano haapao maitai matamua, mea titauhia ia pohe ratou ei taata ia tahoêhia ratou e te Mesia i nia i te raˈi.—Roma 8:17, 35-39.
I to ˈna papairaa ˈtu i te mau kerisetiano no Korinetia, ua faataa o Paulo e: “Teie râ ta ˈu parau, e au mau taeae, e ore te tino iˈo nei e te toto e parahi i te basileia o te Atua; e ore hoi te mea tahuti noa ra e parahi i te vahi tahuti ore. Inaha, e faaite atu vau ia outou i te parau aro; eita tatou e hope i te taoto, e hope râ tatou i te faahuru-ê-hia, eita e mahia, mai te amoraa mata nei, ia tae i te pu hopea ra: e oto mau hoi te pu, e e faatiahia tei pohe ma te tahuti ore, e faahuru-ê-hia tatou.” (Korinetia 1, 15:50-52) Ia pohe oia ma te haapao maitai i roto i te tau o te vairaa mai o te Mesia, e fanaˈo te melo tataitahi o te toea o te Iseraela i te pae varua i reira iho i ta ˈna haamauruururaa i nia i te raˈi. “Mai te amoraa mata,” e faatiahia oia ei varua e e “afaihia” o ˈna i nia no te farerei ia Iesu e no te tavini ei arii apiti i roto i te Basileia i nia i te raˈi. Eaha râ no te tahi atu mau taata e haamori ra ia Iehova? A fatata mai ai te hopea o teie faanahoraa ino, e afai-atoa-hia anei ratou i nia i te raˈi?
E ora ˈtu ratou—Eiaha râ na roto i te afai-ê-raahia
I te mea e ua haamata te vairaa mai o Iesu ei arii i te matahiti 1914, tei roto mau ïa tatou i te “tau hopea” o teie nei ao. (Daniela 12:4) Ua faaara o Paulo e: “Area i te taime e te tau, e au mau taeae, eiaha noa ˈtu vau e papai atu i te parau ia outou i te reira. Ua ite papu hoi outou iho, e te haere maira taua mahana o [Iehova] ra, mai te haerea mai o te eiâ i te po ra. E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi, mai te vahine hapu ia roohia i te mauiui ra, e e ore roa ratou e ora.” (Tesalonia 1, 5:1-3) E ora ˈtu râ te mau kerisetiano o te vai ara. Nafea?
E na mua mai te tuô ‘Hau e te ino ore’ i te tau ta Iesu i pii te “ati rahi.” Ma te faataa i te “feia rahi” o te mau taata haapao maitai e tiaturi nei e ora e a muri noa ˈtu i roto i te hoê paradaiso i nia i te fenua, te na ô ra te buka Apokalupo e: “O te feia i haere mai mai roto mai i te ati rahi ra, e ua horoi i to ratou ahu, e ua teatea, i te toto o te Arenio ra.” (Apokalupo 7:9, 14; Luka 23:43) Aita ratou e tiaturi ra e e afai-ê-hia ratou i nia. Maoti râ, te tiaturi nei ratou e ora i ǒ nei i nia i te fenua. No te faaineine i te reira, e tia ia ratou ia vai ara noa i te pae varua. Nafea outou e nehenehe ai e na reira e e ora i te hopea o teie faanahonahoraa?
E tia ‘ia haapao maitai ma te tapoˈi ouma ra o te faaroo e te hinaaro i te ahuraa, e ma te manaˈo ora ei taupoo.’ (Tesalonia 1, 5:6-8) Teie te taime no te horoa i te ara-maite-raa i te Parau tohu a te Atua, te Bibilia. A mairi ai te taime e tae mai ai te hopea o teie nei faanahonahoraa, a pee i teie aˈoraa a Paulo: “Eiaha e haapao ino i te aˈoraa. E hiˈopoa maite i te mau mea atoa ra; e tei maitai ra e tapea maite.” (Tesalonia 1, 5:20, 21) No reira te mau Ite no Iehova e titau manihini ai ia outou i roto i ta ratou mau Piha no te Basileia, i reira outou e nehenehe ai e apiti ia ratou no te tuatapapa i te mau parau tohu a te Bibilia e te tahi atu mau tuhaa o te Parau i faauruahia mai e te Atua.
Ia paari outou i roto i te ite e te faaroo, e taa ia outou i te tupuraa o te opuaraa a te Atua ra o Iehova no te tamâ i te ao atoa nei i to ˈna mau enemi e no te faariro faahou i te fenua ei paradaiso. Na roto i te faatupuraa i te faaroo, e nehenehe atoa outou e ô atu i roto i te feia e ora ˈtu i te ati rahi, ma te haamaitairaa e farii i te mau mirioni taata o te faatiahia mai no te ora i nia i te fenua. Auê te oaoa e ia ora i raro aˈe i te Basileia o te Atua i roto i te rima o Iesu Mesia e to ˈna mau arii apiti, o tei ‘afaihia i nia no te farerei i te Fatu’ na roto i to ratou faatiaraahia no te ora i nia i te raˈi!
No te rahiraa o te feia faaroo eaha ïa to ratou tiaturiraa ia au i te mau Papai? E ere ïa te afai-ê-raahia. Maoti râ, o te oraraa mure ore i nia i te fenua i raro aˈe i te faatereraa o te Basileia o te Atua.
[Hohoˈa i te api 7]
E farii te feia e ora ˈtu i te ati rahi i te feia e faatiahia mai no te ora i roto i te paradaiso i nia i te fenua i raro aˈe i te faatereraa a Iesu e te feia e “afaihia” i nia i te raˈi