Te faatia ra te feia poro i te Basileia
Te mau hotu o te pororaa i te mau tuhaa fenua atea i Paraguay
UA TAA maitai i te amaa a te Taiete Watch Tower i Paraguay i te titauraa ru ia poro i te parau apî maitai o te Basileia i roto i te taatoaraa o ta ˈna tuhaa fenua. (Ohipa 1:8) Teie te taime ia ite te mau taata atoa i te Basileia e ia tavini ia Iehova hou oia e haamou ai i teie faanahoraa ino i roto i te “ati rahi” e fatata maira. (Mataio 24:21, 22) Te faaite ra te mau aamu i muri nei i te ohipa e ravehia ra no te tauturu i te mau taata i roto i te mau tuhaa fenua aita i tufahia na te tahi amuiraa. Teie ta te amaa e faatia ra:
Ua ravehia te mau faanahoraa no te poro i te taatoaraa o te tuhaa fenua tei ore i tufahia na roto i te ravea o te mau pionie taa ê no te hoê taime. Mai te avaˈe novema e tae atu i te avaˈe tenuare o te matahiti taviniraa 1990, e 39 taeae e tuahine o tei poro i roto i te taatoaraa hoê hanere oire e oire iti i reira aita e feia poro no te Basileia. Ua opere ratou e 6 119 buka, e 4 262 buka iti, e e 5 144 vea. Ei faahopearaa no teie ohipa, ua haamauhia te mau pǔpǔ feia poro apî.
◻ Ua farii te hoê vahine ia vaiiho atu te hoê tuahine pionie e poro ra i roto i te hoê tuhaa fenua tufa-ore-hia i te buka ra E nehenehe oe e ora e a muri noa ˈtu i roto i te paradaiso i nia i te fenua nei. Ua ani ihora teie pionie ia haapii raua i te Bibilia, e ua farii aˈera oia ma te oaoa. I to te pionie hoˈiraa ˈtu, e ere noa teie vahine o te tiai ra ia ˈna oia atoa râ ta ˈna tane e ta raua hoê ahuru tamarii. I te farereiraa i muri iho, ua ineine te utuafare e tae noa ˈtu to ratou mau hoa e te feia tapiri mai no te haapiiraa bibilia! Ua titau taua vahine ra ia ratou, ma te faaite atu e mea maitai roa te haapiiraa e mea faahiahia roa te tiaturiraa e te mau haamaitairaa ta Iehova e horoa maira. Aita hoi o ˈna i faaroo aˈenei i teie mau parau na mua ˈˈe, no reira ua manaˈo oia e mea tano ia faaroo atoa to ˈna mau taata tapiri e to ˈna mau hoa i teie parau apî oaoa.
I te mau taime atoa te pionie e aratai ai i te haapiiraa, no te rahi o te taata i amui mai, ua riro roa ratou mai te hoê amuiraa iti. Ua uiui mai teie mau taata anaanatae e rave rahi mau uiraa e ua apiti atoa mai i roto i te haapiiraa. I to te pionie faataaraa ˈtu e ia oti anaˈe te tuhaa fenua i te porohia, e faarue mai oia e to ˈna mau hoa no te haere i te hoê vahi apî, ua ani atura te vahine ma te peapea e e nafea ïa ratou. Ua ravehia te mau faanahoraa e te mau taeae no te hoê amuiraa tapiri mai ia tamau-noa-hia te haapiiraa. I teie nei, ua tonohia te mau pionie taa ê no te tauturu i teie mau taata anaanatae e au i te mamoe ra.
◻ I to ˈna haereraa na te mau fare i roto i te tahi atu tuhaa fenua tufa-ore-hia, ua farerei te hoê tuahine pionie i te hoê taata o tei rave i te buka Te parau mau e aratai i te ora mure ore ra hoê ahuru matahiti na mua ˈtu. Mai reira mai aita o ˈna i farerei faahou i te mau Ite no Iehova. Teie râ, ua ite oia e o Iehova, o ta ˈna hoi e pii ra Iehova Sabaota, te Atua mau hoê roa e O ˈna anaˈe te tia ia haamorihia. Na nia i to ˈna iho manaˈo, ua paraparau oia no nia ia Iehova i te mau taata atoa o ta ˈna i matau. Inaha, i te mau hebedoma atoa, e haere atu oia na raro e 3 kilometera no te farerei i te hoê tane e ta ˈna vahine ia paraparau ratou no nia i te Atua no te mea, mai ta ˈna e parau ra, ‘Mai te peu e eita vau e haere faahou e hiˈo ia raua, e moehia o Iehova ia raua.’ Taa ê atu i teie nau feia faaipoipohia, fatata hoê ahuru taata o tei hinaaro i te hoê haapiiraa bibilia—no te mea noa e ua poro te hoê taata anaanatae ia ratou.
Inaha, tau mahana noa na mua ˈˈe te pionie e farerei ai ia ˈna, aita teie taata i farii ia tomo mai te hoê perepitero e to ˈna mau apee i roto i to ˈna fare e te hoê tii o Maria, ma te faataa ˈtu e aita o ˈna e tiaturi ra i te mau hohoˈa faaroo. Ua riri roa te perepitero. I taua po ra, ua pure ihora teie taata ia Iehova ia tauturu mai oia ia ˈna. A feruri na i te anaanatae e te oaoa o taua taata nei i to te pionie haereraa mai ia ˈna ra! Ua rave-oioi-hia ˈtura te tahi mau faanahoraa ia tupu te hoê haapiiraa bibilia tamau, e te haere noa ra teie taata i mua ma te pee i te faanahonahoraa teotaratia.
Oia mau, te haamaitai ra Iehova i te ohipa haaputuputuraa i Paraguay a rohi ai te mau taeae no te poro ma te tuutuu ore i roto i taua mau tuhaa fenua tufa-ore-hia ra.—Mataio 24:14.