Ua papai-faahou-hia te iˈoa o te Atua

“UA TITAUHIA fatata e 60 matahiti ia faahoˈihia te iˈoa o te Atua, ‘JHWH,’ te Atua o te mau ati Iuda e o te mau kerisetiano atoa, i te vahi i reira to te hoê taata peni tuuraa ˈtu ia ˈna i te matamua ra.” Mea na reira to te hoê vea helemani Schwarzwälder Bote faatiaraa i te papai-faahouraahia te iˈoa o te Atua i nia i te aro fare o te fare oire no Horb, i Helemani apatoa. No te aha râ teie iˈoa i tatarahia ˈi?

Te faataa ra te vea e ua peni-faanehenehe-hia te patu rapaeau o te fare oire e te mau hohoˈa. Te vai atoa ra na reta hebera e maha o te iˈoa o te Atua.

“Teie iˈoa, o te itehia ra hau atu i te 6 000 taime i roto i te Bibilia,” o ta te vea ïa e faaite faahou ra, “o ‘Jehova’ ïa aore ra te tahi iˈoa mai te reira te huru na roto i te reo helemani. Aita i papu-maitai-hia te taˈiraa reo mau no te mea e papai-noa-hia te mau piri vauera na roto i te reo hebera. Na te taata taio e faahiti i te mau vauera.”

I te matahiti 1934, ua faaoti te mau tia o te Pǔpǔ nazi e “aita [na reta hebera e maha] e tuea ra e te manaˈo o taua taime ra” e no reira e tia ïa ia penihia na nia iho. Auaa râ, ua papai-faahou-hia teia na reta e maha. Te faaite ra teie vea e: “I teie mahana, ua riro te aro fare o [te fare oire], tei faaunaunahia e te mau hohoˈa tahito ra, e te tapao fetii, e te mau hohoˈa taata, ei vahi ‘matamua’ roa ia mataitai i Horb.”