Manava i te mau tairururaa mataeinaa “Te feia afai maramarama”

I TE mahana matamua o te mau mahana poieteraa, ua hamanihia ˈtura te maramarama no te fenua nei. Te taio nei tatou e ua na ô te Atua ra o Iehova e: “Ei maramarama.” E “ua maramarama ihora.” (Genese 1:3) Ua tuea ïa te reira e te parau ta te aposetolo Ioane i papai: “E maramarama te Atua, e aita roa e pouri o roto ia ˈna.”—Ioane 1, 1:5.

I te mea e ua tahoê maite te Tamaiti a te Atua e to ˈna Metua, eita ïa e maerehia i te mea e ua parau o Iesu e: “O vau te maramarama o teie nei ao.” (Ioane 9:5) E nehenehe tatou e faarue i te pouri e tomo atu ai i roto i te maramarama na roto i te faatupuraa i te faaroo i roto i te Atua ra o Iehova e i roto i ta ˈna Tamaiti. Ua haapapu atoa o Iesu e: “I haere mai nei au i te ao nei ei tiarama, ia ore tei faaroo mai ia ˈu ra ia parahi noa i te pouri.” (Ioane 12:46) No reira, ma te tano roa, ua parau o Iesu Mesia i ta ˈna mau pǐpǐ mau e: “O outou te maramarama o teie nei ao. . . . Oia atoa to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.”—Mataio 5:14, 16.

E haamaitairaa rahi mau â te iteraa i te parau mau, te taaraa i te Parau a te Atua tei haamaramaramahia e “te tavini haapao maitai e te paari”! (Mataio 24:45-47) Aita tatou e vare faahou ra e te tiaturiraa o te Toru Tahi; aita tatou e uiui faahou ra no nia i te tumu te Atua mana hope e te here e faatia ˈi i te ino e te haavîraa uˈana; aita tatou e feaa faahou ra no nia i te huru o te feia pohe. Ua horoa mai te maramarama i te tiaturiraa na tatou, te tiaturiraa o te Basileia. Ua faaite mai oia e e Atua faahiahia mau te Poiete. Ua horoa mai te maramarama o te parau mau i te tahi tapao i roto i te oraraa, no te turu i te opuaraa no reira tatou e poietehia ˈi i te matamua ra, no te faahanahana i te Atua tei hamani ia tatou, o Iehova. E nehenehe tatou e na reira na roto i te riroraa ei feia afai i te maramarama. E tiaraa hanahana roa e e faufaa rahi te riroraa ei feia afai maramarama, e hopoia rahi atoa râ. No te haapao maitai i taua titauraa nei, e tia ia tatou ia faaohipa i te tauturu atoa ta Iehova e horoa maira. No reira, ua tano roa ia mairihia ta tatou mau tairururaa mataeinaa 1992 i te iˈoa ra te mau Tairururaa mataeinaa “Te feia afai maramarama”!

No te haamaitai i to tatou aravihi e to tatou mauruuru no to tatou tiaraa ei feia afai maramarama, e haere atu ïa tatou i te hoê o taua mau tairururaa ra, ma te tia atu i reira i te himene matamua e tae roa ˈtu i te pure faaotiraa. E e faaroo maitai tatou i te mau parau atoa e faataahia na nia mai i te tahua, na roto i te mau oreroraa parau, te mau uiuiraa manaˈo, te mau faatiaraa parau, aore ra te darama. Ia tapao tatou i te parau, aita noa tatou e papai ra i te mau parau ta tatou e nehenehe e hiˈopoa faahou ei haamanaˈoraa, e tauturu atoa râ te reira ia tatou ia haamau i to tatou feruriraa i nia i te parau e faataahia ra. Oia mau, i roto i te taatoaraa o te porotarama o te tairururaa, e tia ïa ia tatou ia ‘ara i to tatou faarooraa.’—Luka 8:18.