Eaha ta te mau Papai e parau ra no nia i “te tiaraa atua o te Mesia”?
UA FAAOHIPA o Iesu Mesia i te hoê mana hohonu i te pae faaroo i nia i te huitaata nei. E te reira no te mea e mau mirioni taata e parau nei e e pǐpǐ ratou na ˈna. Teie râ, aita ratou paatoa e afaro ra no te haapapu e o vai mau na oia.
Vetahi o te parau nei e te farii nei ratou i te mau haapiiraa a Iesu, te faariro nei ïa ratou ia ˈna mai te Tamaiti a te Atua, eiaha râ mai te Poiete iho. Te tiaturi nei vetahi i “te tiaraa atua o te Mesia” e te manaˈo nei hoi ratou e o ˈna te Atua. Te haapapu nei ratou e ua vai noa o Iesu e ua hau atu oia i te hoê noa taata i to ˈna haereraa mai i nia i te fenua. Ua tano anei teie manaˈo to ratou? Eaha ta te mau Papai e parau ra?
Te oraraa o Iesu hou oia e riro mai ai ei taata
Ua haapapu o Iesu e e oraraa to ˈna hou oia e riro mai ai ei taata. Ua parau oia e: “Aore roa e taata i tae i nia i te raˈi, maori râ o tei haere mai i raro mai nia mai i te raˈi ra, o te Tamaiti a te taata.” (Ioane 3:13) Ua faaite atoa Iesu e: “O vau te pane ora o tei pou mai mai te raˈi: o te amu i teie nei pane, e tia ïa i te oraraa; o ta ˈu pane e horoa ˈtu o to ˈu ïa tino, o ta ˈu ïa e horoa ei ora no to te ao.”—Ioane 6:51.
Te ora ra o Iesu hou oia e haere mai ai i nia i te fenua, ua haapapuhia ïa na roto i ta ˈna mau parau: “Aita Aberahama i fanau, te vai nei au.” (Ioane 8:58) Ua ora o Aberahama mai te matahiti 2018 e tae atu i te matahiti 1843 hou to tatou nei tau, area o Iesu ra, ua ora mai oia ei taata mai te matahiti 2 hou to tatou nei tau e tae atu i te matahiti 33 o to tatou nei tau. Na mua noa ˈˈe i to ˈna pohe, ua pure o Iesu e: “E tau Metua, e haamaitai mai oe ia ˈu i mua i to aro na i te maitai no ˈu ia oe hou teie nei ao ra.”—Ioane 17:5.
Ua horoa atoa te mau pǐpǐ a Iesu i teie huru haapapuraa. Ua papai te aposetolo Ioane e: “I vai na te Logo i te matamua ra, e tei te Atua ra te Logo, e e atua te Logo. Na roto ia ˈna i hamanihia ˈi te mau mea atoa nei, e aore e mea i hamanihia taa ê atu ia ˈna. . . . Riro mai nei te Logo ei taata e parahi mai nei i rotopu ia tatou nei, e ua ite tatou i to ˈna hanahana, te hanahana e au i to te hoê tamaiti fanau tahi no ǒ mai i te hoê metua tane; e ua î roa oia i te maitai rahi e te parau mau.” (Ioane 1:1, 3, 14, ia au i te Tatararaa a te ao apî) Oia mau, “riro mai nei te Logo ei taata” oia hoi te taata ra o Iesu Mesia.
Ma te faahiti i te oraraa o Iesu hou to ˈna riroraa mai ei taata, ua papai te aposetolo Paulo e: “Ia hoê atoa o outou huru aau e to te Mesia ra to Iesu; o te huru ïa oia no te Atua, e aore oia i parau e haru toroa ia faito atoa oia i te Atua, haapae atura râ i to ˈna iho, rave atura i to te tavini ra huru, i te fanauraa mai ma te huru o te taata nei.” (Philipi 2:5-7) Ua pii o Paulo ia Iesu ‘te fanau tahi o te poieteraa atoa; no te mea mea na roto hoi ia ˈna i poietehia ˈi te tahi atu mau mea atoa.’—Kolosa 1:13-16.
Aita to ˈna e huru atua i nia i te fenua
Te haapapu maitai ra te mau Papai e ua riro o Iesu ei taata taatoa mai to ˈna fanauraahia mai e tae roa ˈtu i to ˈna poheraa. Aita o Ioane i parau e ua ahu noa mai te Logo i te tino taata. Ua ‘riro mai râ oia ei taata,’ eiaha râ te hoê afaraa taata e te tahi afaraa Atua. Ahiri e e taata e i te hoê â taime e huru atua atoa to Iesu, eita ïa e nehenehe e parauhia no nia ia ˈna e “o tei faahaehaahia i raro iti aˈe i te mau melahi.”—Hebera 2:9; Salamo 8:4, 5.
Ahiri e o te Atua e e taata atoa o Iesu i to ˈna parahiraa mai i nia i te fenua nei, no te aha ïa oia i pure pinepine ai ia Iehova? Ua papai o Paulo e: “Ua pûpû hoi oia i te pure i tana oraraa ra, i te aniraa ˈtu ia ˈna ma te oto rahi e te roimata, i tei tia ia faaora ia ˈna mai te pohe maira, ei faaroohia oia i ta ˈna i mǎtaˈu ra.”—Hebera 5:7.
Te haapapuhia ra te manaˈo ra e e ere Iesu i te afa varua i to ˈna oraraa i nia i te fenua na roto i te parau a Petero e “i pohe na hoi [te Mesia] . . . i te tino ra, i faaorahia râ e te [v]arua.” (Petero 1, 3:18) No te mea noa e e taata taatoa o Iesu i nehenehe ai oia e tamata i te huru e farereihia e te feia tia ore e mea na reira to ˈna riroraa ei tahuˈa rahi o te taa i to ratou manaˈo. Teie ta Paulo i papai: “E ere hoi to tatou i te tahuˈa rahi e ore e tia ia aroha mai ia tatou i to tatou mau paruparu nei; i ati atoa hoi oia i te mau mea atoa mai ia tatou atoa nei, aita roa râ e hara.”—Hebera 4:15.
Ei “Arenio a te Atua, o tei hopoi ê atu i te hara o te ao,” ua “horoa [Iesu] ia ˈna iho ei hoo i te taata atoa.” (Ioane 1:29; Timoteo 1, 2:6) Na roto i teie ravea, ua hoo faahou mai Iesu i te faito tia o te mea i erehia e Adamu—oia hoi, te oraraa taata tia e te mure ore. I te mea e te titau ra te parau-tia a te Atua e ‘e ora ei ora atoa ïa,’ mea titauhia ïa ia riro Iesu mai ia Adamu i te omuaraa ra—oia hoi te hoê taata tia, eiaha râ te hoê Atua-taata.—Deuteronomi 19:21; Korinetia 1, 15:22.
Eiaha e na nia ˈtu i ta te mau irava bibilia e parau ra
Te faaohipa nei te feia e parau ra e e Atua-taata o Iesu, e rave rau mau irava no te tamata i te haapapu e e melo oia no te Toru Tahi a te amuiraa faaroo kerisetiano, hoê â oia e te Atua i te pae no te huru, te puai, te hanahana, e te mure ore. Teie râ, ia tuatapapa maite tatou i teie mau irava, e ite tatou e te feia e turu nei i te “tiaraa atua o te Mesia,” te faataa nei ïa ratou hau atu i ta teie mau irava e faaite ra.
Te parau nei vetahi e te mau irava bibilia i reira te faaohipa ra te Atua i te mono iˈoa ra “tâua,” te tuu ra ïa ia Iesu hou oia e riro mai ai ei taata (te Logo) i nia i te hoê â faito e o Iehova. Teie râ, ia ˈna i faaohipa i teie mono iˈoa, e ere ïa te auraa e te paraparau atura te Atua i te hoê taata hoê â to raua tiaraa. Area ra, te faaite ra te reira e i rotopu i te mau mea poietehia no te raˈi ra, te fanaˈo ra hoê i te hoê tiaraa teitei aˈe i mua i te aro o te Atua. Inaha, ua riro o Iesu hou oia e riro mai ai ei taata, ei hoa piri roa no te Atua, ei Fatu ohipa, e ei Afai parau.—Genese 1:26; 11:7; Maseli 8:30, 31; Ioane 1:3.
Aita te mau ohipa i tupu i te bapetizoraahia o Iesu e faaite ra e hoê â te tiaraa o te Atua, te Mesia, e te varua moˈa. Ei taata, ua bapetizo Iesu ia ˈna ei taipe no to ˈna pûpûraa ˈtu ia ˈna i to ˈna Metua i te raˈi ra. I taua taime ra, “vetea aˈera te raˈi,” e pou maira te varua o te Atua, tau ihora i nia ia Iesu mai te hoê uupa ra te huru. Oia atoa, “no te raˈi mai,” ua faaroohia ˈtura te reo o Iehova i te na ôraa e: “Tau Tamaiti here teie, ua mauruuru roa vau ia ˈna.”—Mataio 3:13-17.
No reira, eaha ïa ta Iesu e hinaaro ra e parau ia ˈna i faaue atu i te feia e apee ra ia ˈna ia bapetizo i te mau pǐpǐ “i roto i te iˈoa o te Metua, e no te Tamaiti, e no te [v]arua [moˈa]”? (Mataio 28:19, 20) Aita o Iesu e manaˈo ra aore ra e parau ra e e tiaraa aifaito to ratou oia hoi to ˈna, to to ˈna Metua, e to te varua moˈa. Area ra, e farii te feia e bapetizohia e na Iehova e horoa i te ora e o ˈna te Atua Mana hope, e te pûpû ra ratou i to ratou ora no ˈna. E farii ratou ia Iesu mai te Mesia e mea na roto atoa ia ˈna te Atua e horoa mai ai i te hoê hoo no te mau taata faaroo. E e taa atoa ia ratou e te varua moˈa, o te puai ohipa ïa a te Atua, te tia ia ratou ia auraro. Teie râ, aita roa te feia e opua ra e bapetizo e hiˈo ra ia Iehova, ia Iesu, e te varua moˈa mai te hoê atua Toru Tahi.
Aita anei râ te mau semeio a Iesu e haapapu ra e e Atua-taata oia? Aita, inaha, ua rave atoa o Mose, o Elia, o Elisaia, te mau aposetolo Petero raua o Paulo, e te tahi atu, i te mau semeio, e ere râ hoi ratou i te mau Atua-taata. (Exodo 14:15-31; Te mau arii 1, 18:18-40; Te mau arii 2, 4:17-37; Ohipa 9:36-42; 19:11, 12) Mai ia ratou atoa, e taata o Iesu o tei rave i te mau semeio na roto i te mana i horoahia mai e te Atua ra.—Luka 11:14-19.
Ua faahiti Isaia ia Iesu te Mesia i roto i te hoê parau tohu mai “te Atua puai.” (Isaia 9:6) I roto i te Isaia 10:21, te faahiti ra taua peropheta ra ia Iehova mai “te Atua i Tei Puai ra.” Te tamata nei vetahi i te faaohipa i teie tuearaa o te mau parau no te haapapu e o Iesu te Atua. E tia râ ia tatou ia haapao maitai i te huti i te hoê auraa tei hau atu i tei papaihia i roto i teie mau irava. Te parau hebera i hurihia na roto i te parau ra “te Atua puai” eita noa ïa e faaohipahia i nia anaˈe ia Iehova, mai te parau ra “te Atua mana hope ra.” (Genese 17:1) Inaha, te vai ra te hoê taa-ê-raa i rotopu i te tiaraa puai e te tiaraa puai mana hope, aita ˈtu tiaraa teitei aˈe.
Ia au i te Isaia 43:10, ua parau o Iehova e: “Aore e Atua i hamanihia i mua ˈˈe ia ˈu; e o muri aˈe ia ˈu ra, eita e atuahia.” Aita râ teie mau parau e haapapu ra e o Iesu te Atua. Te auraa ra, aita ˈtu mai ia Iehova na mua ˈtu ia ˈna, aita e atua na mua ˈtu ia ˈna, no te mea e mure ore oia. Aita e atua i muri aˈe ia Iehova no te mea e vai noa mai oia e aita e atua e mono mai ia ˈna i nia i te tiaraa Atua hau aˈe. Teie râ, ua hamani Iehova i te tahi atu feia o ta ˈna iho i pii e atua, mai te mau Papai e faaite ra ia parau oia no nia i te tahi mau taata e: “Ua na ô aˈera vau, E atua outou, e tamarii anaˈe outou na te Teitei! E pohe râ outou mai te taata atoa ra, e hiˈa hoi outou mai te hoê o te hui arii ra.” (Salamo 82:6, 7) Oia atoa, ua riro te Logo ei atua poietehia e Iehova, aita râ te reira i tuu ia Iesu i nia i te hoê â faito e te Atua Mana hope i te hoê noa ˈˈe taime.
Te tiaraa mau o Iesu
E tia i te feia e parau ra e ua rave Iehova i te hoê oraraa taata ei Atua-taata, ia tapao e aita te Bibilia e faahiti noa ˈˈe ra e ua faariro Iesu ia ˈna iho ia au i teie huru manaˈo. Area ra, te faaite tamau noa ra oia e, i te mau taime atoa, e tiaraa haehaa aˈe to Iesu i to to ˈna Metua. I nia i te fenua, aita roa ˈtu o Iesu i faateitei ia ˈna i nia ˈˈe i te tiaraa Tamaiti na te Atua. Hau atu, ua parau te Mesia e: “E rahi hoi tau Metua ia ˈu.”—Ioane 14:28.
Ua tuu Paulo i te hoê taa-ê-raa i rotopu ia Iehova e ia Iesu i te na ôraa e: “Area ia tatou nei hoê roa ïa Atua, o te Metua, no reira mai te mau mea atoa nei, e no ˈna hoi tatou; hoê hoi Fatu o Iesu Mesia, na ˈna te mau mea atoa nei, e na ˈna atoa hoi tatou.” (Korinetia 1, 8:6) Ua parau atoa Paulo e: “E no te Mesia outou, e no te Atua hoi te Mesia.” (Korinetia 1, 3:23) Oia mau, mai te mau kerisetiano e auraro i to ratou Fatu, o Iesu Mesia, mai te reira atoa o ˈna i te auraro i to ˈna Upoo, te Atua ra o Iehova.
Ma te faahiti i teie atoa manaˈo, ua papai o Paulo e: “O te Mesia te upoo o te taata atoa nei, e o to te vahine ra upoo, o te tane ïa, e o to te Mesia ra upoo, o te Atua ïa.” (Korinetia 1, 11:3) E tamau noâ teie taairaa i rotopu i te Atua e te Mesia, inaha, i muri aˈe i te Faatereraa Hoê tausani matahiti a Iesu, i reira “e pûpû atu ai oia i te basileia i te Atua, i te Metua ra” e “i raro atoa aˈe ïa te Tamaiti iho ia ˈna, i tei tuu i te mau mea atoa i raro aˈe ia ˈna ra, ia riro o te Atua i nia iho i te mau mea atoa i te mau vahi atoa ra.”—Korinetia 1, 15:24, 28; Apokalupo 20:6.
E hiˈo anaˈe na i te tahi atu mau irava
No nia i te fanauraa o Iesu, teie ta Mataio i papai: “Tia mau atura tei parauhia mai e te Fatu i te vaha o te peropheta [i roto i te Isaia 7:14] i taua mau mea atoa nei, a na ô mai ai ra e, Inaha, e hapu te hoê paretenia, e e tamaiti ta ˈna e fanau, e e topahia oia ia Emanuela; oia hoi te Atua i ǒ tatou nei, ia irihia ra.” (Mataio 1:22, 23) Aita o Iesu i mairihia i te iˈoa iho o Emanuela, tera râ, ua faatupu ta ˈna ohipa ei taata i te auraa o teie iˈoa. Ua haapapu te vairaa mai Iesu i nia i te fenua ei Huaai Mesia e ei Fatu no te terono o Davida, i te feia haamori ia Iehova e tei ia ratou ra te Atua, i to ratou pae, ma te turu ia ratou i roto i ta ratou mau ohipa.—Genese 28:15; Exodo 3:11, 12; Iosua 1:5, 9; Salamo 46:5-7; Ieremia 1:19.
Ia ˈna i parau atu ia Iesu tei faatiahia mai, ua pii te aposetolo Toma e: “E tau Fatu, e tau Atua.” (Ioane 20:28) Teie e te tahi atu mau faatiaraa, ua “papaihia, ia faaroo [tatou] e, o Iesu te Mesia te Tamaiti a te Atua.” Aita o Toma i patoi atu ia Iesu, o tei faatae atu i teie poroi i Ta ˈna mau pǐpǐ: “Te haere nei au i tau Metua ra e to outou Metua ra, e i tau Atua ra e to outou Atua ra.” (Ioane 20:17, 30, 31) Aita ïa o Toma i manaˈo e o Iesu te Atua Mana hope. Ua pii atu o Toma ia Iesu e “tau Atua” i roto i te auraa ra e “e atua” te Mesia, eiaha râ “te Atua mau ra.” (Ioane 1:1; 17:1-3) Aore ra na roto i te parauraa e “tau Atua,” peneiaˈe ua farii o Toma ia Iesu mai te Afai parau e te Tia o te Atua, mai ta vetahi mau taata i paraparau atu e te hoê vea melahi mai te mea ra e o ˈna o Iehova.—A faaau e te Genese 18:1-5, 22-33; 31:11-13; 32:24-30; Te mau tavana 2:1-5; 6:11-15; 13:20-22.
Ia au i te Bibilia, ua ora o Iesu na mua ˈˈe i to ˈna riroraa ei taata, na nia i te tiaraa o te Logo. I nia i te fenua nei, e ere oia i te hoê Atua-taata. E taata taatoa râ oia, e taata tia, mai ia Adamu i te omuaraa ra. Mai te tia-faahou-raa mai o Iesu, ua riro oia ei varua pohe ore tei faahanahanahia o te auraro noa i te Atua. Oia mau, aita roa ˈtu te mau Papai e turu ra i te manaˈo no nia i “te tiaraa atua o te Mesia.”
[Tumu parau tarenihia i te api 23]
Te haamori ra anei te mau melahi ia Iesu?
TE NA ô ra vetahi mau tatararaa a te Hebera 1:6 e: “Ia haamori te mau melahi atoa a te Atua ia ˈna [Iesu].” (Tatararaa a te Arii Iakobo; Te Bibilia no Ierusalema) E au ra e te faahiti ra te aposetolo Paulo i te tatararaa Septante, e na ô ra i roto i te Salamo 97:7 e: “E haamori Ia ˈna [te Atua], outou e Ta ˈna mau melahi atoa ra.”—C. Thomson.
Te parau heleni pro·sky·neʹo, i hurihia na roto i te parau “haamori” i roto i te Hebera 1:6, te faaohipahia ra ïa i roto i te Salamo 97:7 i roto i te Septante no te hoê parau hebera, sha·hhahʹ, oia hoi te auraa “e tahopu.” E nehenehe te reira e fariihia ei tapao no te faatura i te mau taata. (Genese 23:7; Samuela 1, 24:8; Te mau arii 2, 2:15) Aore ra e nehenehe e faaohipahia e te haamoriraa i te Atua mau aore ra e rave-hape-hia no te mau atua haavare.—Exodo 23:24; 24:1; 34:14; Deuteronomi 8:19.
Mea matauhia, e tano te parau pro·sky·neʹo horoahia no Iesu e te auraroraa i te mau arii e te tahi atu mau taata. (A faaau Mataio 2:2, 8; 8:2; 9:18; 15:25; 20:20 e Samuela 1, 25:23, 24; Samuela 2, 14:4-7; Te mau arii 1, 1:16; Te mau arii 2, 4:36, 37.) Te ite-pinepine-hia ra e e aurarohia o Iesu eiaha mai te Atua teie râ mai te “Tamaiti a te Atua” aore ra te Mesia, te “Tamaiti a te taata.”—Mataio 14:32, 33; Luka 24:50-52; Ioane 9:35, 38.
Te faahiti ra te Hebera 1:6 i te tiaraa o Iesu i raro aˈe mai i te Atua. (Philipi 2:9-11) I ǒ nei, te huri nei vetahi mau tatararaa i te parau pro·sky·neʹo “e faatae . . . i te faaturaraa” (Te Bibilia apî beretane), “e auraro” (Tatararaa a te ao apî), aore ra “e tahopu i mua” (Te hoê tatararaa marite). Mai te peu e mea au aˈe na vetahi te huriraa “haamori,” e otia to teie huru haamoriraa, inaha ua parau atu Iesu ia Satani e: “O to Atua o Iehova ta oe e haamori [no roto mai i te parau pro·sky·neʹo], e oia anaˈe ra ta oe e faaroo.”—Mataio 4:8-10.
Noa ˈtu e ua faatanohia te Salamo 97:7, e faahiti ra i te parau no te haamoriraa i te Atua, i nia i te Mesia i roto i te Hebera 1:6, ua faaite o Paulo e o Iesu tei faatiahia “te anaana . . . o to ˈna ra hanahana [to te Atua], e o te hohoˈa mau ïa no ˈna iho.” (Hebera 1:1-3) Te ‘haamoriraa’ ta te mau melahi e pûpû atu i te Tamaiti a te Atua ra, ua taotiahia ïa e e faataehia ˈtu ia Iehova na roto ia ˈna ra.