A ati maite atu ia Iehova

“[A] tamau uˈana maite â i te pure.”—ROMA 12:12.

1. Eaha te hinaaro o Iehova no nia i te pure, e eaha te faaitoitoraa ta te aposetolo Paulo i horoa no nia i te pure?

O IEHOVA “te Atua e noaa ˈi te tiaturiraa” i te feia atoa e tavini ia ˈna ma te haapao maitai. O ˈna “tei faaroo i te pure ra,” e te faaroo nei oia i ta ratou mau aniraa i te tauturu ia naeahia ia ratou i te tiaturiraa oaoa mau o ta ˈna e tuu ra i mua ia ratou. (Roma 15:13; Salamo 65:2) E na roto i ta ˈna Parau, te Bibilia, te faaitoito nei oia i ta ˈna mau tavini atoa ia haere mai ia ˈna ra i te mau taime atoa o ta ratou e hinaaro. Tei reira noâ oia, ma te ineine i te faaroo i to ratou mau manaˈo hohonu roa ˈˈe. Inaha, te faaitoito nei oia ia ratou ia “tamau uˈana maite â i te pure” e “eiaha e tuutuu i te pure.”a (Roma 12:12; Tesalonia 1, 5:17) O te hinaaro o Iehova ia tamau noa te mau kerisetiano atoa i te tiaoro ia ˈna na roto i te pure, ma te hohora i to ratou mafatu i mua ia ˈna e te reira na roto i te iˈoa o ta ˈna Tamaiti herehia, o Iesu Mesia.—Ioane 14:6, 13, 14.

2, 3. (a) No te aha te Atua e faaitoito ai ia tatou ia “tamau uˈana maite â i te pure”? (b) Eaha te haapapuraa e te hinaaro ra te Atua e ia pure tatou?

² No te aha te Atua e horoa mai ai i teie nei aˈoraa? No te mea e nehenehe te mau faateimaharaa e te mau hopoia o te oraraa e haaparuparu ia tatou i nia i te faito e e moehia ia tatou i te pure. Aore ra, e riro paha te mau fifi i te faataiâ roa ia tatou e i te turai ia tatou ia faaea i te oaoa i roto i te tiaturiraa e ia ore e pure faahou. Ia au i teie mau ohipa, te titau nei tatou i te mau faahaamanaˈoraa o te faaitoito ia tatou ia pure e ia haafatata roa ˈtu i te pu o te tauturu e te tamahanahanaraa, to tatou Atua ra o Iehova.

³ Ua papai te pǐpǐ ra o Iakobo e: “E haafatata ˈtu i te Atua, e na ˈna e haafatata mai ia outou na.” (Iakobo 4:8) Oia mau, aita te Atua i teitei roa aore ra i atea ê roa no te faaroo i ta tatou mau aniraa, noa ˈtu to tatou huru taata tia ore. (Ohipa 17:27) Hau atu, e ere oia i te Atua putapû ore aore ra haapao ore. Te na ô ra te papai salamo e: “Tei te feia parau-tia ra to Iehova mata; e tei ta ratou pure to ˈna tariˈa.”—Salamo 34:15; Petero 1, 3:12.

4. E nehenehe te ara-maite-raa o Iehova i te pure e faaauhia i teihea hiˈoraa?

⁴ Te ani maira Iehova ia pure tatou. E nehenehe tatou e faaau i te reira i te hoê haaputuputuraa i reira te tahi mau taata i te paraparau-noa-raa. Tei reira outou, e te faaroo ra outou i te tahi pae e paraparau ra. Ua riro noa outou ei taata mataitai. Teie râ, e fariu mai te hoê taata i nia ia outou, e faahiti oia i to outou iˈoa, e e paraparau roa mai oia ia outou. E tapea te reira i to outou ara-maite-raa na roto i te hoê huru taa ê. Oia atoa, te hiˈo noa maira te Atua i to ˈna mau taata, noa ˈtu e teihea roa ratou. (Paraleipomeno 2, 16:9; Maseli 15:3) No reira, te faaroo noa ra oia i ta tatou mau parau, te hiˈo noa maira oia ma te manaˈo paruru e te anaanatae. Ia faahiti anaˈe râ tatou i te iˈoa o te Atua i roto i ta tatou pure, e tapea te reira i to ˈna ara-maite-raa, e e haamau ïa oia i to ˈna hiˈoraa i nia ia tatou ma te papu maitai. Na roto i to ˈna mana, e nehenehe atoa Iehova e ite e e taa i te mau aniraa mamû noa a te hoê taata tei pûpûhia i roto i te hohonu huna roa ˈˈe o to ˈna mafatu e to ˈna feruriraa. Te haapapu maira te Atua e e haafatata mai oia i te feia atoa o te tiaoro i to ˈna iˈoa ma te aau mehara e o te tutava i te haafatata ˈtu ia ˈna.—Salamo 145:18.

Te pahonoraa ia au i te opuaraa a te Atua

5. (a) Eaha ta te aˈoraa ‘a tamau maite â i te pure’ e faaite ra no nia i ta tatou mau pure? (b) Mea nafea te Atua ia pahono i te mau pure?

⁵ Te faaite ra te aˈoraa e tamau maite â i te pure e, i te tahi mau taime, e vaiiho Iehova ia tatou ia pure noa no te tahi ohipa i roto i te tahi area taime, hou tatou e ite ai i ta ˈna pahonoraa. E riro atoa paha tatou i te haaparuparu i te ani atu i te tahi mea i te Atua aore ra i te hamani maitai e titau-rahi-hia, e tiai-maoro-hia râ. Teie râ, te faaitoito maira te Atua ra o Iehova ia ore tatou ia topa i roto i teie huru manaˈo, ia tamau noa râ i te pure. E tia ia tatou ia tamau noa i te ani ia ˈna no nia i to tatou mau hinaaro, ma te tiaturi e e faatura mai oia i ta tatou pure e e pahono mai oia ia au i te mea o ta tatou e titau mau ra, eiaha noa râ ia au i to tatou iho manaˈo. Oia mau, te faaaifaito nei Iehova i ta tatou mau aniraa ia au maite i ta ˈna opuaraa. Ei hiˈoraa, e nehenehe ta tatou aniraa e ohipa atoa i nia vetahi ê. E nehenehe te reira e faaauhia i te hoê metua tane e ani mai ta ˈna tamaiti ia ˈna i te hoê pereoo taataahi. Ua ite te metua tane e ia hoo mai oia i te hoê pereoo taataahi na teie tamaiti, e hinaaro atoa ïa te tahi atu tamaiti i te tahi na ˈna. Mea nainai roâ paha teie tamaiti no te haere na nia i te pereoo taataahi, e no reira e nehenehe te metua tane e faaoti e eita o ˈna e hoo mai i te hoê noa ˈˈe pereoo taataahi i taua taime ra. Hoê atoa huru, ia au i ta ˈna opuaraa e ta ˈna faanahoraa i te mau ohipa, e faaoti to tatou Metua i te raˈi ra i te mea maitai aˈe no tatou e no vetahi ê.—Salamo 84:8, 11; a faaau e te Habakuka 2:3.

6. Eaha te parabole ta Iesu i horoa no nia i te pure, e eaha ta te tamau-maite-raa i te pure e faaite ra?

⁶ Mea anaanatae roa te parabole ta Iesu i horoa no nia i te faufaaraa no ta ˈna mau pǐpǐ “ia tamau maite ratou i te pure eiaha e fiu.” Ua mârô noa te hoê vahine ivi, aita hoi to ˈna tiaraa i faaturahia, i te titauraa ˈtu i te hoê taata haava e tae roa ˈtu i te taime i faatiahia ˈi to ˈna manaˈo. Ua parau atura o Iesu e: “E ore anei te Atua e faatia mai i to ˈna ra taata maitihia?” (Luka 18:1-7) E faaite te tuutuu-ore-raa i te pure i to tatou faaroo, to tatou tiaturi ia Iehova, to tatou hinaaro e ati maite atu ia ˈna e e faatae atu i ta tatou aniraa ma te vaiiho i te faaotiraa i roto i to ˈna rima.—Hebera 11:6.

Mau hiˈoraa no te ati-maite-raa ˈtu ia Iehova

7. Nafea tatou ia pee i te faaroo o Abela i te ati-maite-raa ˈtu ia Iehova?

⁷ Ua rau te huru o te mau aamu no nia i te pure i faahitihia e te mau tavini a te Atua i roto i te Bibilia. Ua “papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” (Roma 15:4) E haapuaihia to tatou tiaturiraa ia tuatapapa tatou i te tahi mau hiˈoraa no nia i te feia o tei ati maite atu ia Iehova. Ua pûpû o Abela i te hoê tusia fariihia i mua i te aro o te Atua, e noa ˈtu e aita e faahitihia ra i te parau no te pure, eita e ore e ua tiaoro atu oia ia Iehova na roto i te pure ia fariihia ta ˈna pûpûraa. Te na ô ra te Hebera 11:4 e: “No te faaroo i maitai roa ˈi ta Abela tusia i pûpû i te Atua i ta Kaina; i parauhia mai ai oia e, e taata parau-tia.” Ua ite o Abela i te parau tǎpǔ a te Atua i roto i te Genese 3:15, tera râ, ia faaauhia i te mau mea o ta tatou i ite i teie mahana, mea iti roa to ˈna ite. Teie râ, ua ohipa o Abela ia au i taua ite i noaa ia ˈna ra. Oia atoa i teie mahana, mea iti roa te ite o te feia i anaanatae apî mai i te parau mau a te Atua, teie râ, te pure nei ratou e te faaohipa nei ratou i te rahiraa o te ite e vai ra ia ratou, mai ia Abela. Oia mau, te ohipa nei ratou ma te faaroo.

8. No te aha tatou e papu ai e ua ati maite atu o Aberahama ia Iehova, e eaha te uiraa te tia ia tatou ia ui ia tatou iho?

⁸ O Aberahama te tahi atu tavini haapao maitai o te Atua, ‘te metua o te feia faaroo atoa.’ (Roma 4:11) I teie mahana, hau atu i te tahi atu tau, te titau nei tatou i te faaroo puai, e te titau nei tatou ia pure ma te faaroo, mai ia Aberahama. Te na ô ra te Genese 12:8 e ua faatia oia i te hoê fata “na Iehova i reira; e ua tau ihora oia i te iˈoa o Iehova.” Ua ite o Aberahama i te iˈoa o te Atua e ua faaohipa oia i taua iˈoa nei i roto i te pure. E rave rahi taime to ˈna tamau-noa-raa i te pure ma te aau mehara, ma te tau “i te iˈoa ra o Iehova, o te Atua oraraa mure ore ra.” (Genese 13:4; 21:33) Ua tau Aberahama ia Iehova ma te faaroo no reira oia e faahitihia ˈi. (Hebera 11:17-19) Ua tauturu te pure ia Aberahama ia tapea noa i to ˈna oaoa rahi i roto i te tiaturiraa o te Basileia. Te pee ra anei tatou i te hiˈoraa o Aberahama i te pae no te tamauraa i te pure?

9. (a) No te aha te mau pure a Davida e haafaufaa ˈi i te nunaa o te Atua i teie mahana? (b) Eaha te faahopearaa ia pure tatou mai ta Davida i rave no te ati maite atu ia Iehova?

⁹ E hiˈoraa faahiahia atoa o Davida i te pae no te tamauraa i te pure, e te haapapu ra ta ˈna mau salamo e nafea ia pure. Ei hiˈoraa, e tano ia pure te mau tavini o te Atua no te mau mea mai te faaoraraa aore ra te faatiamâraa (3:7, 8; 60:5), te aratairaa (25:4, 5), te paruru (17:8), te faaoreraa i te hara (25:7, 11, 18), e te mafatu viivii ore (51:10). I te taime a taiâ ˈi o Davida, ua pure aˈera oia: “E faaoaoa mai i te varua o to tavini.” (86:4) E nehenehe atoa tatou e pure no te oaoa o te mafatu, ma te ite e te hinaaro ra o Iehova e ia oaoa tatou i roto i to tatou tiaturiraa. Ua ati maite atu Davida ia Iehova e ua pure oia e: “Te ati atu nei tau varua ia oe: e te mauhia nei au e to rima atau ra.” (63:8) E ati maite atu anei tatou ia Iehova, mai ta Davida i rave? Ia na reira tatou, e turu atoa mai oia ia tatou.

10. Eaha te mau manaˈo hape ta te papai salamo ra o Asapha i faatupu i te hoê taime, eaha râ ta ˈna i taa i muri iho?

¹⁰ Ia nehenehe tatou e ati maite atu ia Iehova, e tia ia tatou ia ape i te faahinaaro i te tiamâraa e te oraraa ona i te pae materia o te feia iino. I te hoê taime, ua manaˈo te papai salamo ra o Asapha e aita e faufaa ia tavini ia Iehova, inaha, “te vai tamau nei te maitai” o te feia iino. Ua taa râ ia ˈna e e mea hape taua feruriraa no ˈna ra e “ua tuuhia [te feia iino] i te vahi [heehee].” Ua papu atura ia ˈna e aita ˈtu mea faufaa roa ˈˈe maoti râ te ati-maite-raa ˈtu ia Iehova, e ua faaite oia i to ˈna manaˈo i te Atua i te na ôraa ˈtu e: “E tia râ vau ia oe ra; e na to rima atau i mau mai ia ˈu. Inaha hoi, te feia i taiva ia oe ra e mou ïa! . . . E mea maitai râ ia ˈu ia haafatata ˈtu i te Atua: ua tiaturi au i te Fatu ra ia Iehova, ia faaite â vau i ta oe atoa ra mau ohipa.” (Salamo 73:12, 13, 18, 23, 27, 28) Maoti hoi i te nounou i te oraraa tiamâ o te feia iino, te feia aita to ratou e tiaturiraa, a pee maite i te hiˈoraa o Asapha i te ati-maite-raa ˈtu ia Iehova.

11. No te aha o Daniela i riro ai ei hiˈoraa maitai i te pae no te ati-maite-raa ˈtu ia Iehova, e nafea tatou ia pee i to ˈna hiˈoraa?

¹¹ Ua tamau noa o Daniela i te pure, noa ˈtu e ua haamǎtaˈuhia oia i te ati o te apoo liona no te mea aita o ˈna i haapao i te mau opaniraa a te tia mana no nia i te pure. Teie râ, “ua tono mai [Iehova] i tana melahi, e ua opani oia i te vaha o te mau liona,” ma te faaora ia Daniela. (Daniela 6:7-10, 22, 27) Ua haamaitai-rahi-hia o Daniela no to ˈna tamau-maite-raa i te pure. Te pure ra anei tatou ma te tuutuu ore, ia farerei iho â râ tatou i te patoiraa i roto i ta tatou ohipa pororaa i te Basileia?

O Iesu, to tatou Hiˈoraa

12. (a) I te omuaraa o ta ˈna taviniraa, eaha te hiˈoraa ta Iesu i vaiiho no nia i te pure, e nafea te mau kerisetiano e faufaahia ˈi i te reira? (b) Eaha te hohoˈa pure a Iesu e faaite ra no nia i te pure?

¹² Mai te omuaraa mai â o ta ˈna taviniraa i nia i te fenua nei, te faaitehia ra e ua pure o Iesu. Ua vaiiho mai to ˈna haerea paieti i to ˈna bapetizoraahia i te hoê hiˈoraa maitai no te feia e bapetizohia nei i teie tau. (Luka 3:21, 22) E nehenehe te hoê taata e pure no te ani i te tauturu o te Atua no te amo i te hopoia e faataipehia e te bapetizoraa i roto i te pape. Ua tauturu atoa o Iesu ia vetahi ê ia haafatata ˈtu ia Iehova na roto i te pure. I te hoê taime, te pure ra Iesu i te hoê vahi, ua ani maira te hoê o ta ˈna mau pǐpǐ i muri aˈe e: “E te Fatu, a haapii mai ia matou i te pure.” I reira, ua vauvau atura o Iesu i te pure o ta ˈna i horoa ei faahiˈoraa, i reira te faaite ra te tatararaa o te mau tumu parau e e tia ia horoahia te parahiraa matamua no te iˈoa o te Atua e ta ˈna opuaraa. (Luka 11:1-4) No reira, i roto i ta tatou mau pure, e tia ia tatou ia faaite i te ite e te manaˈo aifaito, ma te ore e haafaufaa ore i “te mau mea i hau i te maitai ra.” (Philipi 1:9, 10) Oia mau, te vai ra te mau taime e titau-taa-ê-hia te tahi mea aore ra e tia ia faahitihia te hoê fifi taa maitai. Mai ia Iesu, e nehenehe te mau kerisetiano e haafatata ˈtu i te Atua na roto i te pure no te ani i te puai no te amo i te tahi mau hopoia aore ra no te faaruru i te mau tamataraa aore ra te mau ati taa ê. (Mataio 26:36-44) Inaha, e nehenehe ta tatou mau pure e faahiti i te mau tuhaa atoa o te oraraa.

13. Mea nafea to Iesu faaiteraa i te faufaaraa ia pure no vetahi ê?

¹³ Na roto i to ˈna hiˈoraa maitai, ua faaite o Iesu i te faufaaraa ia pure no vetahi ê. Ua ite oia e e ririhia e e hamani-ino-hia ta ˈna mau pǐpǐ, mai ia ˈna iho. (Ioane 15:18-20; Petero 1, 5:9) No reira, ua ani atu oia i te Atua ‘ia tiai ia ratou eiaha ei ino.’ (Ioane 17:9, 11, 15, 20) I te mea e ua ite oia i te tamataraa taa ê e tiai maira ia Petero, ua parau atu oia ia ˈna e: “I pure na râ vau ia oe ia ore ia mure to oe faaroo.” (Luka 22:32) Mea maitai mau â mai te peu e e tamau atoa tatou i te pure no to tatou mau taeae, ma te haamanaˈo atoa ia vetahi ê, eiaha noa râ i to tatou iho mau fifi e to tatou iho maitai!—Philipi 2:4; Kolosa 1:9, 10.

14. Nafea tatou e ite ai e ua ati maite atu o Iesu ia Iehova i roto i ta ˈna taviniraa i nia i te fenua nei, e nafea tatou ia pee i to ˈna hiˈoraa?

¹⁴ I roto i ta ˈna taviniraa, ua pure o Iesu ma te tuutuu ore, ma te ati maite atu ia Iehova. (Hebera 5:7-10) Ua faahiti te aposetolo Petero, i roto i te Ohipa 2:25-28, i te Salamo 16:8 e ua faatano oia i nia i te Fatu ra o Iesu Mesia: “Te parau maira hoi Davida ia ˈna e, Ua ite au [ia Iehova] e tia i mua i tau mata; no te mea tei tau rima atau oia, e ore au e aueue.” E nehenehe atoa tatou e na reira. E nehenehe tatou e pure ia tia noa mai te Atua i pihai iho ia tatou, e e nehenehe tatou e faaite i to tatou tiaturi ia Iehova na roto i te feruriraa e mai te mea ra e tei mua noa oia i to tatou mata. (A faaau e te Salamo 110:5; Isaia 41:10, 13.) I reira ïa tatou e ape ai i te mau huru fifi atoa, no te mea te turu maira Iehova ia tatou, e eita roa ˈtu tatou e turori.

15. (a) Ia au i teihea ohipa e ore ai tatou e faaea i te pure ma te tuutuu ore? (b) Eaha te faaararaa e horoahia ra no nia i to tatou mauruuru?

¹⁵ Eiaha ia moehia ia tatou ia haamauruuru ia Iehova no to ˈna hamani maitai atoa ia tatou nei, oia, “no te rahi o te maitai a te Atua,” oia atoa hoi to ˈna pûpûraa mai i ta ˈna Tamaiti ei tusia taraehara no ta tatou mau hara. (Korinetia 2, 9:14, 15; Mareko 10:45; Ioane 3:16; Roma 8:32; Ioane 1, 4:9, 10) Oia mau, na nia i te iˈoa o Iesu, e tia ia tatou ia “[haamauruuru] i to tatou Metua ra i te Atua i te mau mea atoa nei ma te faaea ore.” (Ephesia 5:19, 20; Kolosa 4:2; Tesalonia 1, 5:18) E tia ia tatou ia ara ia ore ia vaiiho i to tatou mauruuru ia iti mai no to tatou tapitapi rahi no te mau mea e erehia ra e tatou aore ra no to tatou mau fifi.

E tuu anaˈe i ta tatou mau hopoia teimaha i nia ia Iehova

16. Ia haapeapea te tahi mau hopoia ia tatou, eaha ta tatou e rave?

¹⁶ Te faaite ra te tamau-maite-raa i roto i te pure i te hohonuraa o to tatou paieti. Ia tiaoro tatou i te Atua, e maitaihia tatou hou oia e pahono mai ai i ta tatou pure. Mai te peu e te haapeapea ra te tahi hopoia teimaha i to tatou feruriraa, e nehenehe tatou e haafatata ˈtu ia Iehova na roto i te peeraa i teie aˈoraa: “E tuu oe i ta oe hopoia ia Iehova ra, e na ˈna oe e tauturu mai.” (Salamo 55:22) Na roto i te tuuraa ˈtu i ta tatou mau hopoia atoa—te hepohepo, te haapeapearaa, te feaaraa, te mǎtaˈu, e te tahi atu â—i nia i te Atua, ma te faaroo taatoa ia ˈna, e fanaˈo tatou i te hau o te mafatu, “te hau a te Atua, o tei hau ê atu i te ite taata nei.”—Philipi 4:4, 7; Salamo 68:19; Mareko 11:24; Petero 1, 5:7.

17. Nafea e noaa mai ai te hau o te Atua?

¹⁷ E noaa ohie noa anei teie hau o te Atua? Noa ˈtu e e nehenehe tatou e ite i te tahi tamǎrûraa i reira iho, ua tano roa atoa te mau parau a Iesu no nia i te pureraa no te varua moˈa i ǒ nei: “E [tamau i te] ani, e noaa ïa ia outou; e [tamau i te] imi, e ite ïa outou; e [tamau i te] patoto, e iritihia ïa te opani ia outou.” (Luka 11:9-13) I te mea e o te varua moˈa te ravea e nehenehe ai tatou e faaore i te hepohepo, e tia ia tatou ia tamau maite i te aniraa i te hau o te Atua e ta ˈna tauturu no ta tatou mau hopoia. E nehenehe tatou e tiaturi e ia pure tatou ma te tuutuu ore, e noaa mai ia tatou i te tamǎrûraa e hinaarohia e te hau o te mafatu.

18. Eaha ta Iehova e rave no tatou nei ahiri e eita tatou e ite e eaha te ani ia pure tatou i roto i te tahi huru tupuraa?

¹⁸ Eaha ïa mai te peu e aita tatou e taa maitai ra e eaha te ani i roto i ta tatou mau pure? Mea pinepine to tatou mau mihi hohonu i te ore e faaitehia no te mea aita tatou e taa maitai ra i to tatou huru, aore ra aita tatou i ite e eaha te pûpû atu ia Iehova. I reira ïa te varua moˈa e tia mai ai no tatou. Ua papai o Paulo e: “Aore hoi tatou i ite maitai i te mea au ia pure tatou; na te [v]arua iho i ani i ta tatou ma te uuru e ore e tia ia parau ra.” (Roma 8:26) Mea nafea ïa? I roto i te Parau a te Atua, te vai ra te mau parau tohu i faauruahia mai e te mau pure o te tuea e to tatou huru. Mai te mea ra e e vaiiho oia i te reira ia tia mai no tatou. E farii oia i te reira mai te mea e tera ta tatou e ani i roto i ta tatou pure ahiri e ua ite tatou i to ratou auraa no tatou, e ma te tano mau, e faatupu oia i teie mau aniraa.

Te pure e te tiaturiraa no te tamau noa

19. No te aha te pure e te tiaturiraa e tamau noa ˈi e a muri noa ˈtu?

¹⁹ E tamau noâ tatou i te pure i to tatou Metua i te raˈi ra e a muri noa ˈtu, no to tatou mauruuru no te ao apî e ta ˈna mau haamaitairaa atoa. (Isaia 65:24; Apokalupo 21:5) E tamau noa atoa tatou i te oaoa i roto i te tiaturiraa, no te mea e vai noa mai te tahi mau tiaturiraa e a muri noa ˈtu. (A faaau e te Korinetia 1, 13:13.) Eaha te mau mea apî ta Iehova e faatupu ia hope anaˈe te mahana sabati o ta ˈna i haamau ei tau faafaaearaa no te fenua nei, eita tatou e nehenehe e feruri noa ˈˈe. (Genese 2:2, 3) No a muri noa ˈtu, e faaherehere oia i te mau ohipa aroha manaˈo-ore-hia na to ˈna nunaa, e te faaineine ra te tau no a muri aˈe i te mau ohipa faahiahia no ratou i te pae no te raveraa i to ˈna hinaaro.

20. Eaha ta tatou faaotiraa, e no te aha?

²⁰ Maoti teie tiaturiraa putapû mau i mua ia tatou, ia ati maite anaˈe na tatou paatoa ia Iehova na roto i te tamau-maite-raa i te pure, e tia ˈi. Ia ore roa tatou ia faaea i te haamauruuru i to tatou Metua i te raˈi ra no te mau haamaitairaa atoa o ta tatou e fanaˈo nei. I te tau mau ra, e tupu te mau mea ta tatou e tiai ra ma te oaoa, e hau atu â i ta tatou e nehenehe e feruri aore ra e opua, no te mea “ei te hau ê roa ˈtu ta [Iehova] ia rave, i te mau mea atoa ta tatou e ani nei e ta tatou e manaˈo nei.” (Ephesia 3:20) Inaha, ia faatae na tatou paatoa, i te arueraa, te hanahana e te mauruuru e a muri noa ˈtu i to tatou Atua o Iehova, “tei faaroo i te pure ra”!

[Nota i raro i te api]

Nafea outou ia pahono mai?

◻ No te aha e titauhia ˈi ia tamau maite tatou i te pure?

◻ Eaha ta tatou e haapii na roto i te hiˈoraa o te feia hou te tau kerisetiano no nia i te pure?

◻ Eaha ta te hiˈoraa o Iesu e haapii ra ia tatou no nia i te pure?

◻ Nafea tatou ia tuu i ta tatou mau hopoia i nia ia Iehova e eaha te faahopearaa?

[Hohoˈa i te api 29]

Ua tamau noa o Daniela i te pure noa ˈtu te haamǎtaˈuraa e e taorahia o ˈna i roto i te apoo liona