Eaha te tumu o te peapea i roto i te utuafare?

‘MEA hupehupe roa o ˈna!’ o ta Bob ïa i tuô. ‘Aita o ˈna i ite nafea ia atuatu i te fare!’

‘Haavare!’ o ta Jean ïa i patoi atu. ‘Eita iho â o ˈna e mauruuru, e pau ta ˈu ohipa e rave. Aitâ vau i ite aˈenei i te hoê tane maniania mai ia ˈna te huru.’

Eaha te fifi i roto i te oraraa o Bob raua o Jean?a E ere hoi i te mea maoro roa to raua faaipoiporaa, e maha noa avae, tera râ, ua piri roa raua i te ati. E ere hoi o raua anaˈe, inaha, te faaite ra te mau numera e mea pinepine roa te feiiraa i rotopu i te feia faaipoipo. Te parau nei te feia aravihi i teie nei e hoê afaraa o te mau faaipoiporaa apî atoa i te Fenua Marite o te hope na roto i te faataaraa. Te tae atoa mai nei te mau numera peapea mau no te tahi atu mau fenua e rave rahi. E ohipa matau-roa-hia te faataaraa. I roto i te hoê faito aitâ i itehia aˈenei e no te mau tumu huru rau, te roohia ra te utuafare fetii i te fifi.

Vetahi mau tumu no te peapea i roto i te utuafare

Mea teimaha roa no te mau tamarii ia tupu anaˈe te peapea i roto i te utuafare. Te faataa ra te vea ra Newsweek e: “Hoê i nia i te toru o te mau tamarii atoa i fanauhia i roto i na matahiti e hoê ahuru i mairi aˈenei [i te Fenua Marite] o te ora ˈtu i roto i te utuafare o te hoa faaipoipo apî o to ratou metua hou te 18raa o to ratou matahiti. Hoê tamarii i nia i te maha i teie mahana o te faaamuhia ra e te hoê anaˈe metua. Fatata e 22 i nia i te hanere o te mau tamarii i teie mahana o tei fanauhia i rapaeau i te faaipoiporaa; i roto ia ratou, hoê tamarii i nia i te toru, e potii apî roa to ratou metua vahine.”

Ma te faahiti i te hoê tumu i taaihia i te peapea i roto i te utuafare, te na ô ra te taata tuatapapa no nia i te hamani-ino-raa i te tamarii o J. Patrick Gannon e: “Te faaite maira te mau maimiraa apî e e mau ahuru mirioni taata o tei paari i roto i te mau utuafare arepurepu i reira ua faaruru ratou i te mau mahana atoa i te hamani-ino-raa, te taatiraa i rotopu i te fetii, aore ra te haamauiuiraa i te pae no te feruriraa e faatupuhia e te inu-hua-raa i te ava.” Eita e maerehia ia ore anaˈe teie mau rahiraa tamarii o tei farerei i teie mau huru tupuraa, e ite e nafea ia ape i te mau peapea o te utuafare ia riro mai ratou ei feia paari.

E faahapa paha vetahi feia tuatapapa i te mau tauiraa i te pae faanavairaa faufaa, i te pae totiale e te pae morare, o tei parare na roto i te mau fenua tei mua roa i te pae faanavairaa faufaa, ei tumu no te peapea i roto i te utuafare. Ei hiˈoraa, ua faatupu te numera rahi roa o te mau vahine o tei faaô atu ia ratou i roto i te pǔpǔ rave ohipa i te hoê faanaho-faahou-raa fifi mau o te mau tiaraa e te mau hopoia i te fare. Te ru haere noa ra te mau metua vahine ia noaa mai te mau ite no te rave i te tahi toroa, te tutava nei te mau metua tane ma te au ore hoi i te rave i te mau ohipa no te fare, e te tamata nei te mau tamarii ma te taˈi rahi i te ora i roto i te mau pu haapao tamarii.

E rave rahi mau utuafare o te faaruru nei i te mau faateimaharaa rahi i roto i te mau fenua na te ao atoa nei. Ua faaau te hoê metua rave ohipa i te reira i “te oraraa i te hoê huru tupuraa ru hopea ore.” Eita e maerehia e hoê afaraa o te feia i uiuihia i roto i te hoê uiuiraa manaˈo apî o tei parau e ‘mea ino roa ˈtu â te utuafare fetii marite i teie mahana ia faaauhia i to ˈna huru e 10 matahiti na mua ˈtu,’ e mea iti roa te feia e tiaturi nei e e maitai atu te mau ohipa.

No reira, ua riro te peapea i roto i te utuafare ei tumu parau tauaparauraa rahi na roto i te afata teata e te afata radio. Te taio hua nei te taata i te mau buka tauturu no nia i te utuafare, e te horoa nei vetahi i te mau aˈoraa papu e te anaanatae atoa. Noa ˈtu e mea maitai roa te faaitoitoraa e ‘tauaparau hau atu â’ aore ra ‘e faaite i to te tahi e to te tahi manaˈo,’ eita ïa te reira e navai no te arai i te tumu mau o te mau fifi o te utuafare. Na te tumu parau i muri nei e faataa mai i te reira e e faaite mai e nafea ia arai i te peapea i roto i te utuafare.

[Nota i raro i te api]