A haere mai i te tairururaa mataeinaa “Te mau hoa o te tiamâraa”!

E TORU mahana faufaa mau e horoa mai i te hoê haapiiraa no nia i te Bibilia teie e tiai maira ia outou. A haere mai i te hora 10 mairi i te 20 minuti i te poipoi mahana pae, i reira te tairururaa e haamata ˈi na roto i te tahi upaupa. A haere mai e faaroo i te oreroraa parau matamua ra, “No te aha e tuatapapa ˈi i te ture tia roa o te tiamâraa?,” e te tuhaa hopea o te rururaa no te poipoi, te oreroraa parau tumu ra: “Te tumu e te faaohiparaa i te tiamâraa no ǒ mai i te Atua ra.”

I te avatea o te mahana pae, e horoahia mai te tahi faaitoitoraa i te mau kerisetiano ia rave faahope roa ratou i ta ratou hopoia ei mau tavini no te Atua. “Mea ohipa roa—I roto anei i te mau ohipa faufaa ore aore ra i roto i te taviniraa a Iehova?” e “Te hoê nunaa tiamâ tei titauhia râ i te tahi ohipa,” o na upoo parau e piti ïa e vauvauhia ˈtu. E horoahia mai te faaitoitoraa ia faaohipa i te tiamâraa no te tavini ia Iehova na roto i te hoê hautiraa teata taata ora. No roto mai hoi i te mau ohipa i farereihia e Ezera e to ˈna mau hoa o tei hoˈi atu i Ierusalema mai Babulonia mai i te matahiti 468 hou to tatou nei tau, no te faaunauna i te hiero o te Atua.

I te rururaa o te poipoi mahana maa, e vauvauhia mai te hoê oreroraa parau e toru tuhaa, oia hoi “Te tiamâraa maoti te hopoia i roto te utuafare fetii.” I muri iho, e horoahia mai te oreroraa parau putapǔ mau no nia i te pûpûraa e te bapetizoraa kerisetiano, oia hoi “Ia tiamâ mai outou no te tavini ia Iehova.” I te avatea, e rave rahi o te hinaaro e faaroo i te oreroraa parau ra “E roaa anei te oaoaraa maoti te faaipoiporaa?” E hope te rururaa na roto i te hoê tuhaa faufaa roa o te riro ei oaoaraa rahi no te feia atoa e here nei i te tiamâraa.

E tae mai iho â paha outou i te poipoi sabati no te faaroo i te oreroraa parau e toru tuhaa “E tavini anaˈe ei feia ravaai taata.” E tuatapapa teie oreroraa parau i te parabole a Iesu no nia i te upeˈa e te iˈa e e hiˈopoa atoa i ta tatou tuhaa i roto i to ˈna tupuraa. E hope te rururaa no te poipoi na roto i te mau oreroraa parau faufaa roa ra “A vai ara noa i te ‘Anotau hopea’” e “O vai te ora ˈtu i te ‘Tau ati rahi ra’?” I muri iho, i te avatea, eiaha outou e mairi i te oreroraa parau huiraatira, “E arue anaˈe na i te ao apî tiamâ a te Atua.” Hou te oreroraa parau faaotiraa putapû mau, e ravehia mai te tauaparauraa no nia i te tumu parau o Te Pare Tiairaa no taua hebedoma ra. A afai mai i ta outou vea e tuatapapahia i taua hebedoma ra.

E faanahohia te mau tairururaa i Tahiti nei e i Raiatea i te avae atete. A ani atu i te mau Ite no Iehova no to outou vahi i te taime e te vahi i reira te tairururaa e tupu ai.