Aberahama—Peropheta e taua no te Atua
TE HAERE atura te mau nuu tahoêhia o na arii e maha no te pae hitia o te râ ma na roto i te pape no Eupharate. Te pee ra ratou i te eˈa a te mau arii, i te pae hitia o te râ no te peho no Ioridana. I roto i to ratou tere, ua faahaehaa ratou i te mau taata no Rephaima, te mau Zuzima, te mau Amina e te mau ati Hori. E i muri iho, hoˈi faahou maira ratou e haaati i te taatoaraa o te pae apatoa.
Eaha te tumu o taua tereraa a te nuu nei? Te faufaa e noaa mai, o te peho ïa no Ioridana, te hoê peho i ropu i te mau fenua tei haruhia mai i roto i te fenua Transjordanie e te pae apatoa (Genese 13:10). I reira, te ora ra te mau taata no na Oire-Pu e pae, oia hoi o Sodoma, o Gomora, o Adama, o Zeboima e o Bela, i te hoê oraraa haapeapea ore e te hotu maitai (Ezekiela 16:49, 50). I muri aˈe to ratou auraroraa ˈtu i te taata o tei manaˈohia e na ˈna e faatere ra i te mau nuu tahoêhia, o Kederalomara, arii no Elama, ua orure aˈera ratou i te hau. I teie nei, aita ratou e turu-faahou-hia ra e te mau nunaa tapiri, e tia ˈtura ïa ia ratou ia faaafaro e o ˈna. Ua upootia aˈera o Kederalomara e ta ˈna mau taata turu i te tamaˈi, e hoˈi atura ratou e e rave rahi ta ratou mau taoˈa i noaa mai.
I roto i te feia i hopoi-tîtî-hia, te vai ra te hoê taata parau-tia o Lota te iˈoa. E tamaiti fetii oia na Aberahama, e faaea ra i pihai noa iho i taua vahi ra, i te mouˈa no Heberona ra. A ite ai o Aberahama i te parau apî peapea mau, ua haaputuputu aˈera oia e 318 o ta ˈna mau taata. Ma te itoito e ma te tauturuhia mai e vetahi mau taata e ora ra na pihai iho, haere atura o ˈna e auau i na arii e maha e ua roohia aˈera ta ratou mau nuu faehau i te po. Horo ê atura te feia haru fenua. Ora maira o Lota e to ˈna utuafare, e oia atoa te tahi atu mau taata tei hopoi-tîtî-hia e ua roaa faahou maira te mau taoˈa i haruhia.
Mea tano anei ia tiaturi tatou i taua aamu ra i papaihia i roto i te 14raa o te pene a te Genese? Mea feruri-noa-hia anei taua aamu ra no te faariro i te tupuna o te mau nunaa e rave rahi, oia atoa o te mau ati Iuda, ei taata tuiroo no te nunaa? Eaha ˈtura ïa te nehenehe e parau no te tahi atu mau tupuraa o tei tapao i te oraraa o Aberahama?
Te manaˈo o te mau ekalesiatiko
I te omuaraa o te senekele XIX, ua parau te taata faaroo lutero e tuatapapa i te parau no nia i te Atua ra o Peter von Bohlen e, e ere o Aberahama i te taata mau no roto mai râ i te mau aai e aita roa ˈtu to te parau no nia i te haruraa fenua a Kederalomara e niu i roto i te Tuatapaparaa. I to ˈna aˈe pae, ua papai te orometua haapii o Julius Wellhausen e: “Aita hoê noa ˈˈe parau i haapapuhia e te Tuatapaparaa aamu e vai ra ia tatou nei, no nia i te mau patereareha.” Ua tuu oia i teie nei manaˈo e: “Mea maitai aˈe paha ia faariro ia [Aberahama] ei taata no roto mai i te hoê feruriraa ieie maitai.”
Ua pee atoa te mau taata tuatapapa i te parau no nia i te Atua no Beretane, i to ratou mau hoa helemani. “Ua hope te tau o te mau aamu rahi o te Genese no nia i te mau patereareha e aita roa ˈtu to ratou e faufaa i te pae no te Tuatapaparaa i to te mau aai no nia i (...) te arii ra o Arthur”, o ta Stopford Brooke ïa i papai i roto i ta ˈna buka Te Faufaa Tahito e te oraraa no teie nei mahana (beretane). “Te faataa noa mai nei te Genese (...) i te hoê hiˈoraa papu ore e te tano ore no nia i te oraraa e te huru o te mau patereareha”, o ta John Colenso ïa i parau, e epikopo oia no te Ekalesia beretane no te fenua aihua raau tahito no Beretane, te Natal. “Eita e nehenehe, o ta ˈna ïa i faahiti faahou mai, e tiaturi matapo noa i te tahi o taua mau aamu ra.”
Ua parare oioi roa aˈera taua mau manaˈo faahapa ra mai te maˈi e aamu ra (Timoteo 2, 2:17). I to tatou nei tau, aita te mau mirioni feia faaroo e tâuˈa faahou nei i te mau aamu no nia i te oraraa o te mau patereareha. Teie râ, ma te haama rahi o te mau taata tuatapapa i te parau no nia i te Atua no roto i te amuiraa faaroo kerisetiano, te haapapu nei vetahi mau taata tiaturi ore i te Atua i teie nei e ua rahi roa te faahaparaa i te Bibilia. Ei hiˈoraa, te taiohia ra i roto i te Bol’shaia Sovetskaia Entsiklopediia (Buka parau paari Rahi rusia) e: “I teie mau matahiti hopea nei, ua hiˈopoa-faahou-hia e rave rahi mau tuuraa parau a te faahaparaa bibilia ia au i te mau heruraa apî i itea mai, ia au iho â râ i te mau haamaramaramaraa i horoahia mai e ‘te haapiiraa i te pae no te ihipǎpǎ a te Bibilia’. Mai te huru ra ïa e e niu mau to te tahi mau peu bibilia i faarirohia na ei mau aai tumu ore (...) i te pae no te Tuatapaparaa aamu.” E hiˈopoa anaˈe na e mea nafea te haapiiraa i te pae no te ihipǎpǎ i te haamaramaramaraa i te aamu no nia i te oraraa o Aberahama.
Ura ǒ te Kaladaio ra
Ia au i te Bibilia, ua paari o Aberahama i “Ura ǒ te Kaladaio ra”. (Genese 11:27-31; 15:7.) I roto i te roaraa o te mau senekele, aita te vahi no Ura i iteahia mai. Ua manaˈo atura te feia faahapa e e oire iti haihai roa e te atea hoi o Ura, mai te peu noa ˈtu e e oire mau iho â teie. I muri aˈe, i to ratou feaa rahi, ua itehia maira ma te papu maitai i te mau toetoea oire i rotopu ia Babulonia e te ooa no Peresia, e o Ura iho â. Ua iteahia mai te mau tausani mau pǎpǎ tei papaihia i nia iho i taua vahi ra o tei haapapu e e oire pu o Ura i te pae no te hooraa taoˈa e e rave rahi mau taata no te mau huru nunaa atoa e ora na i reira. I te tau o Aberahama, te vai atoa ra i teie oire te mau fare haapiiraa i reira e haapiihia ˈi i te mau tamarii i te papai e i te taio i te numera.
Hau atu, ua haapapu mai te mau maimiraa i ravehia i Ura e ua ite maitai to ˈna feia hamani i te hohoˈa fare e eaha te pou, te araka, te apaparaa ofai e te tapoi fare menemene. E hamani atoa na te feia rima î no Ura i te mau piru nehenehe mau, te mau kinura faahiahia roa e te mau tipi auro. I roto e rave rahi mau fare, ua itea mai i te feia maimi i te pae no te ihipǎpǎ te mau faahaereraa pape hamanihia e te araea tunuhia, o te manii atu i roto i te hoê apoo rahi e nehenehe e naeahia e 12 metera i te hohonu.
Ua aratai taua mau maimiraa ra i te feia tuatapapa bibilia e rave rahi ia hiˈopoa faahou i to ratou manaˈo no nia ia Aberahama. “Ua manaˈo matou e ua riro noa o Aberahama ei taata o tei ora na i raro aˈe i te mau fare ie, e te ite ra matou i teie nei e ua ora paha o ˈna i roto i te hoê fare sima faanaho-maitai-hia i roto i te hoê oire”, o ta Sir Leonard Woolley ïa i papai i roto i ta ˈna buka Te tau tahito i faaitehia mai (beretane). “Ua faarue o Aberahama, ta te taata maimi i te pae no te ihipǎpǎ o Alan Millard ïa i parau i roto i ta ˈna buka Mau taoˈa faufaa no te mau tau bibilia (beretane), i te hoê oire nahonaho maitai, e pûpû mai na i te maitai e te hau, no te riro mai ei taata ratere i tâuˈa-ore-hia!”
Te haruraa a Kederalomara
Eaha te nehenehe e parau no nia i te upootiaraa o Aberahama i nia ia Kederalomara, arii no Elama? I te omuaraa o te senekele XIX, mea iti roa te parau i itehia no nia i te mau ati Elami. Aita te mau taata faahapa i te Bibilia i hinaaro e tiaturi e e mana to te fenua no Elama i nia ia Babulonia, e aitâ atoa hoi i nia i te fenua Paletetina. I teie nei mahana, ua taui te manaˈo no nia i te mau ati Elami. Te faaite ra te maimiraa i te pae no te ihipǎpǎ e e nunaa faehau puai mau o Elama. Teie ta te hoê buka faahororaa (Funk & Wagnalls Standard Reference Encyclopedia) e parau ra no nia i taua tumu parau ra: “Ua haamou aˈera te mau ati Elami i te oire no Ura i te matahiti 1950 hou to tatou nei tau. (...) I muri iho, e mana rahi ta ratou i faaohipa i nia i te mau upoo faatere no Babulonia.”
Hau atu, ua itehia mai te mau iˈoa o te mau arii no Elama i nia i te mau papairaa tahito. Te haamata ra vetahi na roto i te parau ra “Kudur”, e faahaamanaˈo ra i te parau ra “Kédor”. O Lagamar te iˈoa o te hoê ruahine rahi no Elama, fatata hoê â huru e o “laomer”. I teie nei, te papu nei i te mau taata tuatapapa i te aamu e e raatira mau iho â o Kederalomara, e te auraa o to ˈna iˈoa, o “te tavini a Lagamar” paha ïa. Ua papaihia i nia i te hoê pueraa papai babulonia i te mau iˈoa fatata hoê â huru e to te mau arii i tahoê na oia hoi: Tudhula (Tidala), Eri-aku (Arioka), e o Kudur-lahmil (Kederalomara) (Genese 14:1). I roto i te buka ra Parau huna a te faaiteraa no ǒ mai i te Atua ra (beretane), te parau faahou ra o A. Custance e: “Taa ê atu i taua mau iˈoa ra, mai te huru ra ïa e te tuati ra te mau ohipa rii i te mau ohipa i tupu na i Babulonia a haamau ai te mau ati Elami i ta ratou faatereraa i reira (...). Te haapapu maitai ra taua mau pǎpǎ ra i te mau Papai e no reira, ua oioi noa ˈtura te feia faahapa rahi i te imi i te ravea no te faaore roa i to ratou faufaa.”
E te haruraa o na arii e maha ra i te fenua? Te haapapuhia ra anei teie ohipa e te mau maimiraa i te pae no te ihipǎpǎ no ǒ mai i te Transjordanie e i te pae apatoa? Oia mau. I roto i ta ˈna buka Te maimiraa i te pae no te ihipǎpǎ i Iseraela ra (beretane), te faahiti ra te orometua haapii ra o Yohanan Aharoni i te parau no te oreraa o te hoê ui taata na mua ˈˈe i te tau Iseraela, e fatu na i te mau nunaa “rahi” i Transjordanie e i te pae apatoa “i te area matahiti 2000 hou to tatou nei tau”. Te haamau ra vetahi feia maimi i te pae no te ihipǎpǎ i to ˈna mou-roa-raa i te area matahiti 1900 hou to tatou nei tau. “Hoê â huru te mau farii repo no taua anotau ra i itehia mai i roto i te pae apatoa e te Transjordanie e te faaite ra te reira e ua mou taue noa ma te peapea mau taua ui taata ra”, ta Harold Stigers ïa e parau ra i roto i ta ˈna Faataaraa parau no nia i te Genese (beretane). Te farii atoa ra te feia faahapa i te Bibilia i teie manaˈo, e e nehenehe hoi e faahiti i teie parau a John Van Seters no roto i ta ˈna buka ra Aberahama i roto i te Tuatapaparaa aamu e te peu (beretane): “Te uiraa o tei ore i itehia i te pahonoraa, o te iteraa ïa e i hea roa taua mau taata ra i te revaraa, mai te peu e ua haere ratou i te hoê vahi ê atu, i te hopearaa o taua anotau ra.”
Te horoa maira paha te pene 14 o te Genese i te hoê faataaraa. Ia au i te tuatapaparaa a te Bibilia no nia i te tau, ua tapae o Aberahama i Kanaana i te matahiti 1943 hou to tatou nei tau. Ua tupu paha ïa te haruraa fenua i arataihia e Kederalomara i muri noa iho. I muri aˈe, i taua noâ senekele ra, ua haamou aˈera te Atua i te mau oire viivii no Sodoma e no Gomora i te auahi, e ua faataui roa teie ohipa i te huru oraraa o te peho i raro i te Ioridana i mutaa ihora mea hotu maitai (Genese 13:10-13; 19:24, 25). Ua ore atura te hinaaro o te feia haru fenua no te mau nunaa ěê mai, i taua vahi nei.
E nehenehe e faahiti i te tahi atu mau hiˈoraa e faaite ra e e tuea maitai te maimiraa i te pae no te ihipǎpǎ e te mau Papai ma te haamaramarama mai i te tahi mau ohipa i tupu i roto i te oraraa o Aberahama. Ua taotiahia râ te maimiraa i te pae no te ihipǎpǎ. E pinepine te mau haamaramaramaraa ta ˈna e horoa ra i te mea papu ore e ua vaiiho-noa-hia e na te feia e nehenehe e hape, e faataa mai i te reira.
Te faaiteraa e nehenehe e tiaturihia
O te faaiteraa a tei Poiete i te taata, te Atua ra o Iehova, te haapapuraa e nehenehe mau â e tiaturihia e faataa mai e ua ora mau iho â o Aberahama. I roto i te Salamo 105:9-15, te parau ra te Atua no nia ia Aberahama, ia Isaaka e o Iakoba mai ta ˈna ra mau “peropheta”. Hau atu i te tausani matahiti i muri aˈe i te poheraa o Aberahama, ua faahiti te Atua ra o Iehova i te parau no taua patereareha ra na roto e toru peropheta, ma te pii atoa ia ˈna e to ˈna ra “taua”. (Isaia 41:8; 51:2; Ieremia 33:26; Ezekiela 33:24.) Oia atoa, ua faahiti o Iesu ia Aberahama ei hiˈoraa. I roto i to ˈna oraraa i nia i te raˈi hou oia a parahi mai ai i nia i te fenua nei, ua ite mata roa te Tamaiti a te Atua i te mau auraa ta to ˈna Metua i atuatu e te patereareha ra. Ua nehenehe atura oia e parau i te mau ati Iuda e:
“Ahiri outou e tamarii na Aberahama ra, e haapao ïa outou i ta Aberahama ra parau. I tena na râ, te titau mai nei outou ia ˈu e taparahi, te taata i faaite atu ia outou i te parau mau i ta ˈu i ite i te Atua ra. Aore Aberahama i na reira. I popou na hoi to outou metua o Aberahama i to ˈu nei anotau ia ite oia, e ite atura hoi oia e oaoa ˈtura hoi. Ua parau maira te ati Iuda ia ˈna, Aore â hoi oe i tae i te pae o te ahururaa i to oe matahiti, e ua ite hoi oe ia Aberahama? Ua parau atura Iesu ia ratou, Amene, amene, e parau atu vau ia outou, Aita Aberahama i fanau, te vai nei au.” — Ioane 8:39, 40, 56-58.
Te horoa mai nei te haapapuraa o na Taata e piti o tei teitei aˈe i roto i te ao taatoa nei, i te mau tumu maitai roa ˈˈe no te farii i te mau mea atoa ta te Bibilia e parau ra no nia ia Aberahama (Ioane 17:5, 17). Noa ˈtu e te faahiti ra te Bibilia ia Aberahama ei hiˈoraa, aita râ oia e faateitei ra ia ˈna i nia i te tiaraa aito no te nunaa. O ta te aamu ïa no nia i to ˈna upootiaraa i nia i na arii e maha tei tahoê ia ratou, e haapapu ra. A hoˈi mai ai o Aberahama na te tamaˈi, ua arohahia aˈera oia e te arii ra o Melehizedeka, arii no Salema, o tei parau atu ia ˈna e: “Ia haamaitaihia hoi te Atua teitei o tei tuu mai i to mau enemi i to rima na.” O Iehova ta ˈna e arue ra no taua faaoraraa ra. — Genese 14:18-20.
Fatata roa râ tatou i te ite i te hoê upootiaraa hau atu i te faahiahia: o te upootiaraa ïa o taua Atua hanahana mau ra e noaa ia ˈna i te re i nia i “te hui arii o te fenua e o te ao atoa nei” i te tamaˈi rahi ra o Aramagedo (Apokalupo 16:14, 16). I reira e tupu roa ˈi teie parau tǎpǔ ta te Atua i faaite atu ia Aberahama, ta ˈna peropheta e to ˈna hoa, i te na ôraa e: “E maitai te mau fenua atoa o te ao nei i to oe na huaai.” Te tamata aˈena nei te mau mirioni taata i taua mau haamaitairaa ra. E nehenehe atoa outou e taiohia i roto i taua numera taata nei, mai ta te mau tumu parau i neneihia i roto i teie nei vea e faataa ra. — Genese 22:18.
[Hohoˈa fenua/Hohoˈa i te api 7]
(Hiˈo i te papai)
Te Miti Rahi
TE PAE APATOA
Damaseko
Harana
Eupharate
Hidekela
Ura
ELAMA
Te ooa o Peresia
[Hohoˈa fenua]
Damaseko
Dana
REPHAIMA
ZUZIMA
Sekema
Betela
Mataeinaa no Ioridana
Miti Taitai
Heberona
TE PAE APATOA
Te eˈa a te mau arii
EMIMA
Gomora
Sodoma
ATI HORI
[Hohoˈa]
Ua faaroo o Aberahama ia ˈna i faarue ia Ura, te hoê oire ruperupe mau.
Vetahi mau taoˈa i itehia mai i Ura:
1. Tipi e vairaa tipi auro
2. Te “reva” no Ura
3. Upoo puaatoro no roto mai i te afata maniania a te kinura
4. Ofai taoˈa
5. Taupoo faanehenehehia e te piru
[Faaiteraa i te tumu]
Hohoˈa: Ma te fariihia mai e te British Museum