Te tahi mau poroi a te mau melahi no to tatou nei tau
“E ua tono maira [te Atua] i tana melahi, e ua faaite maira.” — APOKALUPO 1:1.
1. Eaha te auraa hape i pinepine i te horoahia no te parau ra Apokalupo, e eaha ta te Apokalupo e parau maira no nia i te tau a muri aˈe?
APOKALUPO. E pinepine teie parau i te faaohipahia i teie senekele e 20, aita râ hoi e papu-maitai-hia ra te auraa! Aita te Bibilia e faaohipa ra i taua parau nei no te faataa mai i te parau o te haamouraa o te huitaata atoa nei i roto i te hoê ati atomi. Inaha hoi, te auraa o teie parau heleni o te parau ra ïa “faaiteraa”. Oia mau, na roto i te tahi mau hohoˈa e faataa mai i te mau ohipa e tupu a muri aˈe, te faaite maira te buka bibilia a te Apokalupo, i te mau ohipa e faahope atu i muri iho, i nia i te hoê tau oaoa aita e hopearaa no te huitaata nei. Mai teie hoi te huru to Ioane, aposetolo a Iesu, omuaraa i te buka Apokalupo: “E ao to ˈna to tei taio, e to te feia e faaroo i teie nei parau tohu, e te haapao i tei papaihia i roto ra: ua fatata te tau e tupu ai.” — Apokalupo 1:3.
2, 3. No te aha e itehia ˈi e rave rahi mau ati i roto i te ao nei, e eaha ta Iehova e rave?
2 Aita teie nei ao e ite nei i te oaoa. E taa ia tatou eaha te tumu i roto i te hoê himene ta Mose i papai tau 3 460 matahiti i teie nei e na ô ra e: “Ua ino ratou, e ere hoi to ratou ra tapao i to [te mau] tamarii [a te Atua], e ui faefaea e te piˈo ra.” (Deuteronomi 32:5). E tano maitai teie mau parau no teie ui, tei riro hoi te mau peu morare i te ore e tano. O ta te mau api matamua ïa o te buka ra Mau haamauˈaraa i te pae no te nuu e i te pae totiare i roto i te ao nei i te matahiti 1987-1988 (beretane) e haapapu maitai ra: “Te faaino nei te hororaa i te pae no te mau mauhaa tamaˈi, i te oraraa o te mau nunaa atoa. Te haamauˈa nei te mau Etats-Unis e te Hau rusia, raua toopiti atoa ra, fatata 1,5 milia dala marite i te mahana tataitahi, no ta raua mau nuu. Teie râ, no nia i te poheraa o te mau tamarii, tei te tiaraa ahuru ma vau te mau Etats-Unis e te fenua Rusia tei te tiaraa maha ahuru ma ono ïa i roto i te mau nunaa. Fatata hau atu i te tataimaha te haamauˈaraa a te mau fenua e haere ra i mua i te pae faanavairaa faufaa, i te pae no te nuu ia faaauhia i ta ratou haamauˈaraa i te pae no te oraora-maitai-raa o te tino. I roto râ hoi i taua mau fenua nei, e rave rahi hanere milioni taata teie e pohe nei i te poia, e e 20 % o te mau tamarii teie e pohe nei hou ratou e taeahia ˈi i te pae matahiti.”
3 Te tahi atu â mau tumu e amui mai nei i roto i taua huru tupuraa ino mau, teie ïa: te topa-roa-raa te mau peu i te pae morare, te topa-roa-raa te utuafare, te rahi-roa-raa te ohipa taparahi taata e te mǎtaˈu i roto i te ao nei, te ereraahia i te aroha e te oreraa e haapao i te ture ta teie nei ui e faaite nei. Auê hoi tatou i te oaoa, ia ite tatou e te opuaraa a Iehova te “[haamouraa ïa i te feia e faaino nei i te fenua]”! (Apokalupo 11:18.) I roto 16 orama, te faataa papu maitai maira te buka bibilia a te Apokalupo nafea te Atua ia faatupu i taua opuaraa ra.
“Mau melahi” e mau “tapao”
4. Eaha te tiaraa o te mau melahi i roto i te parau no te Apokalupo, e mea nafea to te mau orama faataaraa mai i te huru o te melahi faufaa roa ˈˈe?
4 Te haamaramarama maira te Apokalupo i te parau tohu matamua a te Bibilia, i papaihia i roto i te Genese 3:15, ma te haapapu mai eaha te faahopearaa o te au ore e vai ra i rotopu ia Satani e te faanahonahoraa a te Atua i faaauhia i te hoê vahine, e tae noa ˈtu i ta raua na ‘huaai’. Te faaite maira oia mea nafea Iehova a tahi, ia haava i to ˈna mau enemi, e i te tahi aˈe pae i te feia mea here na ratou ia ˈna e e turu nei i to ˈna mana hope. Ua faaitehia mai te Apokalupo e te hoê melahi ia Ioane ra na roto i te mau “tapao”. E tiaraa to te tahi atu mau melahi, aore ra mau vea, i roto i te ohipa pororaa e te tupuraa o taua mau tapao nei. Te faaitehia mai nei te melahi rahi roa ˈˈe i roto i te Apokalupo 1:5, oia hoi o ‘Iesu Mesia, te Ite parau mau ra, te matahiapo mai te pohe maira, e te Arii o te mau arii o te ao nei’. I roto i te mau “tapao”, aore ra orama, te faataahia maira oia mai te hoê “Liona” te huru e te hoê “Arenio”; e parau-atoa-hia oia o “Mihaela” e e rave rahi taime mai te hoê melahi puai ra te huru. — Apokalupo 5:5, 13; 9:1, 11; 10:1; 12:7; 18:1.
5. Eaha to roto i te orama matamua a te Apokalupo, e nafea te reira e tano ai no tatou?
5 I roto i te orama matamua (Apokalupo 1:10 e tae atu i te 3:22) e ite tatou i te tahi mau poroi faahiahia mau a Iesu i faahanahanahia ra na te mau “melahi” aore ra mau tiaau o na amuiraa e hitu no Asia e faahohoˈa ra i te amuiraa a te mau Ite o Iehova o te ao taatoa nei i te “mahana o te Fatu ra”. No tatou atura ïa taua mau poroi ra, oia mau, no tatou e ora nei i teie mahana! E tia ia tatou ia ‘faaroo maite eaha ta te varua e parau ra i te mau amuiraa’, ua haapaohia hoi taua mau faaararaa e mau aˈoraa ra ei faaitoitoraa ia tatou, ia ore tatou e taiva, ia fariihia mai ta tatou ohipa e rave ra, ‘to tatou here, to tatou faaroo, ta tatou taviniraa e to tatou faaoromai’. — Apokalupo 1:10; 2:7, 10, 19.
6. Nafea tatou e nehenehe ai e fanaˈo i te mau poroi tataitahi i faataehia ˈtu i na amuiraa toohitu no Asia?
6 Mai te amuiraa no Ephesia, peneiaˈe ua tavini tatou ia Iehova ma te ore e taiva e ua faaite tatou i to tatou mauruuru ore rahi no te mau ohipa a te mau apotata e faatupu nei i te mau amahamaharaa. Teie râ, mai te peu e ua toetoe mai to tatou here, ia tatarahapa na ïa tatou e ia faaohipa faahou na ïa tatou i to tatou here matamua, ma te uˈana mau. Mai te mau melo o te amuiraa no Semurina i taoˈahia i te pae varua, ia faaitoito atoa na ïa tatou i te faaite e e tia mau iho â tatou ia haamauruuruhia ia ‘mau papu tatou e tae noa ˈtu i te pohe’, mai te peu e e tia. Mai te mau kerisetiano ta Satani i tamata i Peregamo, e tia ia tatou ia fariu ê i te haerea o te taata haamori idolo, taiata aore ra turu i te mau pupu faaroo e faaohipahia na paha e tatou i mutaa ihora. Ua faaarahia ˈtu te mau kerisetiano o Tuatira i taua mau herepata ra, e oia hoi i te faaohiparaa a te mau taata mai ia Iezebela. Tatou atoa, e tia ia tatou ia haapao maitai! Te taata i pohe i te pae varua, mai te mau kerisetiano Saradi, e tia ïa ia ˈna ia ara i teie nei a maoro roa. E opani rahi hoi tei iritihia i mua ia tatou nei no te taviniraa, mai tei iritihia i mua i te mau kerisetiano no Philadelephia; ia noaa atoa na ia tatou hoê â puai e o ratou e ia noaa atoa na ia tatou i te re ia tae mai te fifi ra! Mai te peu e ua pumahana te hoê o tatou nei, mai to Laodikea, e tia ia ˈna ia farii mau i to ˈna veve i te pae varua e ia tatarahapa. Te patoto mai nei o Iesu i te opani. Ia farii na ïa tatou paatoa ia ˈna e ia amu tatou e o ˈna i te maa varua e operehia mai nei i roto i ta tatou na 55 000 amuiraa i purara haere i roto i te ao taatoa nei. — Apokalupo 1:11; 2:7, 10, 11, 17, 29; 3:6, 13, 22.
Te terono o te Atua, te hoê otaro, e te hoê uiraa
7. Eaha te mau himene e himenehia i roto i te piti o te orama, e e faaitoito mai te reira ia tatou ia aha?
7 I roto i te piti o te orama, te ite ra o Ioane i te terono hanahana o Iehova i nia i te raˈi. Te itehia ra to tatou Atua i roto i to ˈna hanahana rahi, te hoê hanahana aita e faaauraa. E maha na kerubi e tavini ra ia ˈna, e tae noa ˈtu te mau nuu melahi, te mau kerisetiano i noaa ia ratou i te re i nia i te ao nei e tei faatiaha mai mai te pohe ra. E himene arueraa putapû mau â ta ratou! Teie hoi taua himene ra: “E au te hanahana ia oe, te Fatu, e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” Te toro ra o Iehova i te hoê otaro i te Arenio i taparahihia e tei Hoo mai ia tatou. Te arue nei te mau mea atoa i poietehia ia Iehova e te Arenio. — Apokalupo 4:11; 5:2-5, 11-14.
8. Eaha ta tatou e ite ra i roto i te toru o te orama a te Apokalupo, e nafea te reira e tano ai no to tatou nei tau?
8 E tuatapapa anaˈe na tatou i teie nei i te toru o te orama. Te haamata ra te Arenio i te tatara i na tapao taati e hitu o te otaro. Eaha ïa ta tatou e ite ra? A tahi, i roto i te mau raˈi, tei nia o Iesu i faakorona-apî-hia i te hoê puaahorofenua teatea, e faahohoˈa ra i te tamaˈi tano mau. I muri iho, te aratai ra te taata i nia i te hoê puaahorofenua uteute i te fenua nei, i roto i te hoê tamaˈi rahi. O te hoê puaahorofenua ereere te haere mai i muri iho, oia hoi te oˈe, e i muri noa ˈtu ia ˈna o te hoê ïa puaahorofenua maheahea, oia hoi te maˈi e te taata i nia ia ˈna ra ua mairihia ïa oia te Pohe. O Hade te apee ra ia ˈna, no te horomii e hia rahiraa milioni taata. Ua haamata te hororaa o taua feia e horo ra na nia i te mau “[ati]” tei tairi i te huitaata nei i te matahiti 1914 e tae atu i te matahiti 1918 ra, mau ati ta te mau melo o taua ui ra e ora nei e haamanaˈo maitai nei â (Mataio 24:3-8). Te tamau noa nei â taua feia i nia i te mau puaahorofenua ra i ta ratou hororaa. E a iritihia ˈi te pae e te ono o na tapao taati ra, te tupu noa nei â te mau ohipa te tahi i muri aˈe i te tahi e tae roa ˈtu i ‘te mahana rahi o te riri o Iehova e o te Arenio’. Teie atura ïa te uiraa: “O vai te taata e mau?” — Apokalupo 6:1-17.
Te mau taata e ‘nehenehe e mau’
9. Eaha te hohoˈa faahiahia mau ta te maha o te orama e hohora mai nei i mua ia tatou?
9 O te maha o te orama to muri iho. Te faaite maira oia e o vai te ora ˈtu i te mahana o te riri o te Atua, e no te aha. Te tapea nei te tahi mau melahi e ia ore na mataˈi haamouraa e maha ia farara mai i nia i te fenua nei, ia nehenehe te mau melo o te Iseraela i te pae varua — 144 000 — ia tapao-taatoa-hia. “I muri aˈe i te reira”, o te hoê hohoˈa faahiahia ta te orama e faaite maira: “E feia rahi roa, e e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono e i mua i te Arenio, ma te ahu teatea i te ahuraa e te amaa tamara i to ratou rima; e ma te pii hua hoi to ratou reo, i te na ôraa e, Tei to tatou Atua te ora tei parahi i nia iho i te terono ra, e tei te Arenio.” (Apokalupo 7:1-10). Tei rotopu anei outou i taua feia rahi ra?
10. a) Eaha ta te hoê faaauraa no nia i te parau o te oroa Haamanaˈoraa o te matahiti 1935 e to te matahiti 1987 e haapapu maira no nia i te tupuraa te maha o te orama? b) Eaha te uiraa te tia ia tatou tataitahi i teie nei ia ui, e no te aha?
10 I te matahiti 1935 ra, e 32 795 taata tei amui mai i roto i te oroa Haamanaˈoraa i te poheraa o Iesu i tupu i roto i te ao taatoa nei. I roto i taua numera ra, e 27 006 tei rave i te pane e te uaina, ei haapapuraa e o ratou te toea o na 144 000, e ora nei â i nia i te fenua nei, e atuatu ra i te tiaturiraa e ora i nia i te raˈi. I muri aˈe, i taua noâ matahiti ra, ua haapapu-maitai-hia te tiaraa o te feia rahi roa. Te atuatu atoa nei taua mau taata haehaa ra, e tiaturi nei e ora e a muri noa ˈtu i nia i te fenua nei e faarirohia ei paradaiso, i te faaroo i roto i te toto i maniihia e Iesu; te haere mai nei ratou ia Iehova ra, te pûpû nei ia ratou no ˈna, te bapetizo nei ia ratou e te tavini nei ia ˈna ma te itoito ma te tiaturiraa oaoa e e ora ˈtu ratou mai roto atu i “te ati rahi”. I te oroa Haamanaˈoraa i te matahiti 1987, e 8 965 221 taata tei apiti mai, e 8 808 taata anaˈe râ tei rave i te pane e te uaina. Te faaite maira taua tabura nei e e rave rahi milioni taata i teie mahana e mau melo ratou no te feia rahi roa aore ra teie e manaˈo nei e riro ei mau melo no te feia rahi roa. Tei roto atoa anei outou ia ratou e e nehenehe anei outou e “mau” ia tae i ‘te mahana rahi no te riri o Iehova e o te Arenio’? Ia rave outou i te mau taahiraa avae e au e tapae atu ai outou, o to outou ïa ora ta outou e faaineine ra. — Apokalupo 6:15-17; 7:14-17.
Te faaite ra te faaotoraa pu i te mau haavaraa a te Atua
11. Eaha te mau haavaraa i porohia na roto i te ravea o te mau pu i roto i te pae o te orama, e nafea te reira ia tano no to tatou nei tau?
11 Te hohorahia ra te hitu o te tapao taati ra, e o te pae o te orama atura ïa o te Apokalupo to mua ia tatou nei. Toohitu pue melahi i mua i te aro o te Atua. E hitu pu tei horoahia ˈtu na ratou, o ta ratou e faaohipa ia nehenehe te mau pororaa ta te mau tavini a Iehova e faaoto atoa nei, ia faaroohia i roto i te ao taatoa nei mai te matahiti 1922 maira. Te faaite ra na “pu” matamua e maha i te mau haavaraa i faahitihia ˈtu i nia i “te toru o te tufaa” o te mau taata, mai te huru ra ïa e o te feia no roto mai i te amuiraa faaroo kerisetiano. Te haapapu maira ratou e ua riro te tuhaa o “te fenua” nei (te amuiraa o te mau mea iino a Satani e vai maitai ra, ia hiˈohia) e o “te miti” (te pueraa taata arepurepu o te huitaata nei) no roto mai i te amuiraa faaroo kerisetiano, e tae noa ˈtu ‘to ˈna mau anavai, to ˈna mau pape pihaa ra’ (te mau haapiiraa e te mau manaˈo philosopho a te amuiraa faaroo kerisetiano) e to ˈna mau marama i haapouri (te mau upoo faatere haapaoraa, tei erehia i te maramarama i te pae varua), ei tumu no te riri o te Atua. E fa mai te hoê “[aeto]” e maue ra, e faahohoˈa ra hoi i te hoê melahi, na ropu i te reva e te faaite ra na oto pu tootoru e faaroohia a muri aˈe e e “pohe [ïa], e pohe, e pohe [no] te feia e parahi i te ao nei”. — Apokalupo 8:1-13.
12. Na vai e tatara i te apoo o te abuso, e i to tatou nei mau mahana, nafea te hoê ata “akaride” i te patiaraa i te mau upoo faatere haapaoraa?
12 E teie nei, te faaoto ra te pae o te melahi i ta ˈna pu. A hiˈo na! “Te hoê fetia” — te Fatu ra o Iesu — te iriti ra i te uputa o te apoo o te abuso e au auahi ra, e ua na roto maira te akaride [vivi] i te au auahi. Te faataa maira te reira ma te faahiahia mau ia Iesu, tei faaora i te matahiti 1919 ra i te mau ite a te Atua i faatavaihia i te varua mai roto mai i te huru ohipa ore. Ma te turuhia e te mana o te Atua, te tairi nei ratou i te mau aua a te mau upoo faatere haapaoraa na roto i te faaiteraa i te hape o ta ˈna mau haapiiraa e to ˈna huru haavarevare ia “pae aˈe marama [avae]”, oia hoi te maororaa o te oraraa o te hoê vivi. Te haapapu maira te reira e eita te ui o te mau akaride taipe o to tatou nei tau e mou hou Iehova e te Mesia e haava ˈi i te mau nunaa. Ua opere ê na taua ata akaride [vivi] ra i te mau milia buka bibilia e ua poro ratou i te mau haavaraa uˈana mau e patia nei mai te aero o te hoê pata. Teie ta Ioane e parau ra i muri iho: “Ua mure atura te hoê pohe; e inaha, e piti â pohe toe, te faaine maira.” — Apokalupo 9:1-12; Mataio 24:34; 25:31-33.
13. a) Te faahohoˈa ra na melahi e maha i ruruuhia i pihai atu i te pape no Eupharate, tei tatarahia i muri iho, ia vai, e eaha te ohipa te tia ia ratou ia faatupu? b) Te faahohoˈa ra te mau muriadi mau nuu puaahorofenua i te aha, e te vai ra to ratou mana i roto “i to ratou vaha e aero” i roto i tei hea auraa?
13 Te oto ra te ono o te pu, ma te faaite mai i te piti o te “pohe”. Ua tuuhia e maha melahi tei ruruuhia i pihai atu i te anavai no Eupharate, o te faahohoˈa ra ma te tano maitai i te faaoraraahia mai te mau ite faatavaihia a te Atua i te matahiti 1919 ra, tei vai na hoi i raro aˈe i te faatîtîraa a Babulonia. Ua faaineinehia ratou no te “taparahi pohe roa i te toru o te pupu o te taata nei” ma te parau e ua pohe te mau upoo faatere haapaoraa a te amuiraa faaroo kerisetiano i mua i te aro o Iehova. Te hinaaro ra râ ratou i te tauturu no te haaparare i taua ohipa pororaa ra, e ua turu maira Iehova ia ratou ma te horoa mai i te hoê tiaa rahi taata ei hoa ohipa no ratou. Te aro amui nei ïa te mau ite faatavaihia e to ratou mau rima tauturu mai te hoê nuu taata na nia i te puaahorofenua ra, “e piti ïa muriadiraa i te muriadi”. Tei roto to ratou mana i “to ratou vaha”, ia faaite ratou i te mau haavaraa a Iehova i te fare o te taata, i roto atoa hoi i to ratou “aero”, i te mea e te vaiiho nei ratou i muri ia ratou i te tahi mau buka aore ra vea bibilia e faaite nei e te fatata roa maira te mahana tahooraa a te Atua. — Apokalupo 9:13-21; Ohipa 20:20, 21.
14. a) O vai te “melahi puai” e parauhia ra i roto i te ono o te orama, e te aha ra oia e eaha ta ˈna e parau ra? b) Eaha te auraa o te parau ra, a vai “momona [noa ˈi] mai te meli” ra i roto i te vaha, e ‘haamaramara te otaro haihai ra i te opu’?
14 I teie nei, te matara ra te ono o te orama. E ite tatou i reira i te hoê “melahi puai”, te Fatu ra o Iesu, i nia i te hoê tiaraa taa ê mau. Te tapea ra oia i te hoê otaro iti i roto i te rima. Te faaroohia ra te mau reo e te mau haruru patiri, e ua tǎpǔ ihora na nia i te iˈoa o to tatou Poiete rahi e: “E e ore e mahia e tae ai taua tau ra. Ia tae râ i te tau faaotoraa a te toohitu o te melahi ra, ia faaoto oia i ta ˈna ra pu, ia tupu faaoti roa te parau aro a te Atua.” Te titauhia ra o Ioane i muri iho ia rave i te otaro iti e a amu atu ai. Mea “momona [hoi] mai te meli” taua otaro ra i roto i to ˈna vaha mai te parau no nia i te Basileia, tei roto atoa te mau haamaitairaa e hopoihia mai e “te raˈi apî e te fenua apî”, ia riro ei poroi au mau no te pupu a Ioane i faatavaihia i te varua e no to ˈna mau hoa i teie nei mahana. Te faahuru ê nei râ te ohipa pororaa i te mahana haavaraa a te Atua i “te mau nunaa e rave rahi, e te mau fenua e te mau reo ěê, e te arii atoa”, ia vetahi pae. A rohi, e a faaitoito! A tiaturi, ia papu mau â outou e e horoa mai o Iehova i te puai e au no te faaite i ta ˈna mahana haavaraa. — Apokalupo 10:1-11; 21:1, 4; Ioane 1, 5:4; Isaia 40:29-31; 61:1, 2.
Te hitu o te pu e te toru o te pohe
15. a) Eaha te ohipa e tupu ia faaitehia mai te parau no te toru o te ati e ia faaoto mai te hitu o te melahi i ta ˈna pu? b) E riro te faaiteraahia te Basileia ei ati i roto i tei hea auraa?
15 I muri aˈe i to ˈna tohuraa no nia i te tamataraa a te enemi e “haapohe” i te mau ite a te Atua i te matahiti 1918 ra, e i muri aˈe i to ˈna faataaraa mai ma te faahiahia mau mea nafea “te varua ora no ǒ mai i te Atua ra”, i te faaoraraa mai ia ratou i te matahiti 1919 ra ia nehenehe ratou e poro i roto i te ao taatoa nei, teie ta Ioane i papai: “Ua mure aˈenei te piti o te pohe, e inaha, te fatata maira te toru o te pohe.” Nafea hoi oia ia haere mai? Teie ta te irava e parau ra: “E ua faaoto maira te toohitu o te melahi i ta ˈna.” Ua tuati atura ïa te toru o te pohe i te oto pu hopea. A faaroo na! “E e mau reo rarahi atura tei nia i te raˈi, i te na ôraa e, O te basileia ra o teie nei ao ua riro ei basileia no to tatou Fatu [Iehova] e no ta ˈna ra Mesia, e e vai ïa te hau ia ˈna e a muri noa ˈtu.” Te faahitihia ra i ǒ nei i te parau no te Basileia o te Atua i horoahia ˈtu i roto i te rima o Iesu Mesia, teie e faatupu nei e na 144 000 feia aiˈa, i te parau aro a te Atua, ma te turu i te mana hope mure ore o te Atua ra o Iehova, te Puai Hope. Ua riro anei taua ohipa pororaa i te Basileia ra ei pohe? No te feia paieti ore ra, e, inaha te faaite maira oia e e “[haamou te Atua i te feia e faaino nei i te fenua]”. — Apokalupo 11:1-19.
16. Eaha te mau faaiteraa faahiahia mau e vauvauhia maira i roto i te hitu o te orama?
16 A hiˈo na i teie nei i te hitu o te orama. A hiˈo na, te auraro o te faanahonahoraa i nia i te raˈi a te Atua, oia hoi ta ˈna vahine, ia ˈna! Ua hapu oia e te mauiui nei oia no te fanau mai i te hoê tama i tiai-maoro-hia na. A tahi ra, e e ere hoi teie te taime hopea, te Apokalupo e faahiti ai i te parau no te hoê teni rahi uteute, “te ophi tahito o te parauhia o te Diabolo, e o Satani hoi, o tei haavare i to te ao atoa nei”. Ua ineine oia i te rave e ia pau te tamaroa ia ˈna mai to ˈna iho â fanauraahia ra. Fatata roa te “au ore” i tohuhia mai “i rotopu i [te ophi] e te vahine” i te hope roa. E fanau taua vahine ra i te hoê tamaroa e hopoi-oioi-hia ˈtu i te Atua ra i to ˈna ra terono. — Apokalupo 12:1-6, 9; Genese 3:15; Daniela 2:44; 7:13, 14.
17. a) O vai o Mihaela, e mea nafea to ˈna ohiparaa mai ia au maite i te auraa o to ˈna iˈoa mai te matahiti 1914 maira? b) A faataa mai i te taa-ê-raa e vai ra i rotopu i na ‘ati tootoru’ e te “ati o te fenua” e faahitihia ra i roto i te Apokalupo 12:12.
17 Taua tamaroa ra o te Basileia ïa, tei haamauhia i roto i te mau raˈi i te matahiti e ore roa ˈtu e moehia, oia hoi te matahiti 1914. E parau-atoa-hia ta ˈna Arii, o Iesu Mesia, o Mihaela, te auraa ra “O vai tei riro mai te Atua ra te huru?”. Ua pahono oioi atura oia i taua uiraa nei na roto i te haereraa ˈtu e aro ia Satani e te huriraa mai taua teni tahito ra e ta ˈna mau demoni i nia i te fenua nei. Mai te matahiti 1914 mai, e “ati” aˈera ‘to te fenua e to te tai, i raro atu na hoi te Diabolo ia ratou na, e riri rahi hoi to ˈna, no te mea ua ite oia maa taime poto to ˈna e toe nei’. Eiaha tatou e hape i taua ati nei, e farereihia nei i roto i te huru peapea mau o te huitaata nei, e na ‘ati e toru’ ta Iehova e faatupu i nia i te feia paieti ore ia haava mai oia ia ratou. — Apokalupo 12:7-12.
18. a) Eaha te ati ta te Diabolo ra o Satani i tamata i te tuu mai i nia i te mau tavini haapao maitai a Iehova na mua ˈˈe e i roto i te roaraa o te Piti o te Tamaˈi rahi? b) Te opua noa nei â te Diabolo i te aha, e eaha ta te mau orama e tiâ ia tuatapapahia e faaite mai?
18 Ua tamata te Diabolo i te faatupu i te ati i nia i te mau tavini haapao maitai a te Atua e vai nei â i nia i te fenua nei. Na mua ˈˈe e i roto i te roaraa o te Piti o te Tamaˈi rahi, ua haapuai mai oia i nia ia ratou e rave rahi mau hamani-ino-raa no te haamou i te ohipa a te “toea” o te faanahonahoraa a te Atua i faaauhia i te hoê vahine — te feia i rotopu i na 144 000 e tavini nei â i te Atua i roto i te taata nei. Ua haapao Iehova e ia horomii te fenua, oia hoi te amuiraa o te mau mea iho a Satani, i taua rahiraa hamani-ino-raa ra. Teie râ, te tamau noa nei â o Satani ma to ˈna riri rahi, i te aro i te mau Ite o Iehova (Apokalupo 12:13-17). Eaha ïa to te reira faahopearaa? E pahono mai taua na orama tooiva ra e toe ra i taua uiraa nei. — Habakuka 2:3.
EI HAAPOTO-NOA-RAA
□ Mea nafea to Iehova faaohiparaa i te mau melahi i roto i te buka Apokalupo?
□ E tano te mau poroi ta Iesu i faatae atu i na amuiraa toohitu, no tatou i roto i tei hea auraa?
□ Eaha ihora ïa te faahopearaa o te mau oto o na pu toohitu?
□ Te faahohoˈa ra te ata akaride [vivi] e te mau nuu puaahorofenua e rave rahi, ia vai?
□ No te aha te fanauraahia te Basileia o te Atua e tuati ai i te “toru o te ati”?
[Tumu parau tarenihia i te api 22]
MAU PENE E MAU IRAVA TEI REIRA TE MAU ORAMA I TE FAAITERAAHIA:
□ ORAMA 1 1:10 e tae atu i te 3:22
□ ORAMA 2 4:1 e tae atu 5:14
□ ORAMA 3 6:1-17
□ ORAMA 4 7:1-17
□ ORAMA 5 8:1 e tae atu 9:21
□ ORAMA 6 10:1 e tae atu i te 11:19
□ ORAMA 7 12:1-17
□ ORAMA 8 13:1-18
□ ORAMA 9 14:1-20
□ ORAMA 10 15:1 e tae atu i te 16:21
□ ORAMA 11 17:1-18
□ ORAMA 12 18:1 e tae atu i te 19:10
□ ORAMA 13 19:11-21
□ ORAMA 14 20:1-10
□ ORAMA 15 20:11 e tae atu i te 21:8
□ ORAMA 16 21:9 e tae atu i te 22:5
[Tumu parau tarenihia/Hohoˈa i te api 23]
NA ORAMA 16 O TE APOKALUPO: MAU TUMU PARAU FAAHIAHIA MAU
1 Iesu, i rotopu i na [vairaa] lamepa e hitu ra, aore ra mau amuiraa, e faatae ra i te mau poroi here mau na roto i te arai o na fetia e hitu, te mau tiaau i faatavaihia ra.
2 I mua i te terono i nia i te raˈi a Iehova, te horoahia ˈtura i roto i te rima o te Arenio i noaa ia ˈna te re, te hoê otaro te vai ra te mau parau no nia i te haavaraa i roto.
3 Te haere ra o Iesu Mesia e haapau e ia pau atu, a faaino noa ˈi te tahi atu mau taata i nia i to ratou mau puaahorofenua i te huitaata nei e a fatata noa mai ai te mahana o te riri o te Atua.
4 Te faaoti ra te haaputuputuraa o na 144 000 e o te feia rahi roa a haa noa ˈi te mau melahi ia ore te ati rahi ia tupu.
5 Te poro ra te mau melahi i te parau haavaraa na roto i te ravea o te mau pu, e te faaite tahaa nei hoi te mau Ite o Iehova, mai te hoê nuu akaride ra, i te huru o te haapaoraa hape.
6 I roto i te hitu o te oto pu, ua faaora-faahou-hia mai te mau “ite” a te Atua no te haere e faaite i te Basileia o Iehova e o ta ˈna Mesia i faaarii-apî-hia.
7 I muri aˈe i te fanauraahia te Basileia i te matahiti 1914 ra, ua huri mai te Mesia ia Satani e ta ˈna mau demoni i nia i te fenua nei.
8 E fa mai e piti na puaa taehae, e te horoa ra te piti o te puaa politita i te aho ora no te hohoˈa o te puaa matamua, oia hoi te mau Hau Amui.
9 Te ootihia nei te feia e ‘mǎtaˈu nei i te Atua e a faahanahana ˈtu ai ia ˈna’ no te ora mure ore, e te tahi pae no te haamouraa ïa.
10 E tapae roa te niniiraahia na auˈa toohitu o te riri o te Atua, i nia i to ˈna faito, ia haamouhia te feia atoa i faaô mai i roto ia ratou i te “mataˈi” viivii a Satani.
11 Ua faatopahia te vahine faaturi rahi ra, oia hoi te haapaoraa hape na te “puaa” politita, e e haamou oia ia ˈna i muri iho.
12 I muri aˈe i te haamouraa o Babulonia Rahi, te ravehia ra te mau faaineineraa hopea no te faaipoiporaa o te Arenio e o ta ˈna vahine, oia hoi na 144 000 melo.
13 I muri aˈe i te haamouraa o te vahine faaturi rahi, e haamou Iesu, te upoo o te mau nuu o te raˈi ra, i te mea e toe ra o te amuiraa a Satani i nia i te fenua nei.
14 Te hurihia ra o Satani i roto i te abuso; te haamata ra ïa te Faatereraa hoê tausani matahiti a te Mesia e o ta ˈna vahine, na 144 000 mau melo.
15 I raro aˈe i te “raˈi apî” (te basileia oia hoi o Iesu Mesia e ta ˈna vahine), e fanaˈo te “fenua apî” (te totaiete taata) i te mau haamaitairaa eita e nehenehe e parau no ǒ mai ia Iehova ra.
16 Te tahe ra te mau faanahoraa i ravehia e te Atua no te faaora i te maˈi o te taata e no te horoa mai no ratou i te ora, i ropu i te hoê oire hanahana oia hoi, te Ierusalema Apî.