Ia tiaturi na tatou ia ia Iehova!
“E tiaturi outou ia Iehova, eiaha e faaea; e haapuraa taea-ore-hia hoi te Fatu ra o Iehova.” — ISAIA 26:4.
1, 2. Eaha te himene arueraa e itehia i roto i te Isaia 26:1-6, e no te aha?
E TIA MAU Â te tuu-roa-raahia te ‘oire o te mau fenua etaeta ra’ i raro, ia faahanahanahia ma te hoê himene upootiaraa (Isaia 25:3). No reira ˈtura ïa te parau tohu a Isaia e tamau noa ˈi i te Isa pene 26, irava 1 e tae atu i te 6 ma te hoê himene oaoa ei arueraa i te Fatu ra o Iehova. Te himenehia ra hoi taua himene nei i to tatou nei tau “i te fenua ra i Iuda”, inaha te auraa o te parau ra Iuda “Tei aruehia” ïa. Te faaohipa faahou ra te Bible Crampon-Tricot i te parau ra “Yah — Yahweh”, i reira te iˈoa o te Atua e tataipitihia ˈi. Auê atoa hoi te mau parau a taua himene nei tei hurihia i roto i te Tatararaa a te ao apî i te faahiahia e, inaha, ua huri-maitai-hia hoi te iˈoa o te Atua i reira!
2 A faaroo na i teie nei, i teie himene navenave mau ia faaroo: “E oire etaeta to tatou; o te ora ta te Atua e haapao ei patu e ei paruru. A iriti na outou i te mau uputa, ia tomo mai te fenua parau-tia, o tei [Iehova] haapao i te parau mau ra, i roto. O tei ore i aueue te manaˈo ra, e riro oe i te tiai ia ˈna, e ei hau rahi roa te hau, o oia i tiaturi ia oe ra. E tiaturi outou ia Iehova, eiaha e faaea; e haapuraa taea-ore-hia hoi te Fatu ra o Iehova. Ua faahaehaa oia i te feia parahiraa teitei; te oire teitei ra, ua tuuhia e ana i raro: ua tuu oia ia ˈna i raro roa i te repo; ua faafaito oia ia ˈna i raro i te vari ra. E taataahihia oia e te avae; te avae o te taata haehaa, te taahi o te feia veve.” Auê te oaoa mai te peu to roto atoa tatou i te feia e tiaturi ra i te Atua e e faahanahana ra ia ˈna ma teie nei himene, oia hoi i rotopu i te mau Ite no Iehova!
3. a) Eaha mau na te “nunaa parau-tia”, e o vai tei na roto mai i to ˈna mau “uputa” e matara noa ra? b) No te aha te faanahonahoraa a Iehova e tamau noa ˈi i te haere i mua i roto i te autahoêraa noa ˈtu te mau tutavaraa a te enemi?
3 Ma te papu maitai, e tuu roa o Yah Yahweh aore ra o Ia Iehova i te feia teoteo i raro e e faaora mai hoi i te feia e tiaturi tamau nei ia ˈna. I muri aˈe i to ˈna riroraa mai ei “taata haehaa”, ua riro maira te Iseraela varua ei “nunaa etaeta”, ei “nunaa parau-tia”. Ua tomo atoa mai te hoê feia rahi roa tei hau atu i te toru milioni teie e fanaˈo nei i te hamani maitai a te Atua na roto i te mau “uputa” e matara noa ra i roto i te faanahonahoraa a Iehova i faaauhia i ǒ nei i te hoê oire. Ua riro taua mau taata atoa ra ei fetii rahi, tei rahi aˈe hoi ia faaauhia i na fenua e 57 o te mau Hau (parauhia) amui. Area te “nunaa” a te Atua e te mau taata e apiti mai nei ia ˈna, mea tahoê mau â hoi ratou. I nia i te fenua atoa nei, te hinaaro o taua nunaa nei, te auraroraa ïa i te mau faaueraa tumu parau-tia a te Atua. Ua riro hoi ta ˈna “mau patu”, aore ra ta ˈna huru faanahonahoraa, ei paruru no te aro atu i te mau tutavaraa a Satani teie e haa nei i te haaviivii i to ˈna haerea haapao maitai no te parau mau. Eita ta te enemi e nehenehe e haafifi i te maitairaa o taua nunaa ra e tapea ra i to ˈna haapao maitai no to ˈna Atua. E mau tamau noa hoi to tatou tiaturiraa i nia ia ‘Ia Iehova, te Mato e a muri noa ˈtu’. — Isaia 54:17; 60:22.
4, 5. a) Eaha mau na te “oire teitei”, e no te aha e nehenehe ai e parau e te taataahihia ra, ei faahohoˈaraa, na te mau tavini a Iehova? b) Ua tupu te tupuraa matamua o te parau tohu a Isaia 26:10 i tei hea tau, e eaha hoi taua tupuraa ra? c) Eaha ˈtu â te tahi tupuraa o taua parau tohu nei?
4 A haa noa ˈi tatou e ia faaroohia mai te faaararaa e faaite maira e ua fatata roa o Iehova i te tuu i raro i te “oire teitei” ra o “Babulonia Rahi”, ua riro hoi te reira ei faaitoitoraa ia tatou i te iteraa i te feia haehaa e te feia veve o te fenua nei ia farii ma to ratou mafatu atoa i te parau apî maitai o te Basileia (Apokalupo 18:2, 4, 5). Ei faahohoˈaraa, te taataahi atoa nei ratou i taua “oire teitei” ra; e te reira eiaha noa na roto i te apitiraa ˈtu i roto i to ˈna haamouraa, na roto atoa râ i te haereraa e faaite i te mahana tahooraa a Iehova, o te tairi i te amuiraa viivii o te mau mea nei (Isaia 61:1, 2). A hia ˈtura ahuru matahiti i teie nei, to te mau Ite no Iehova hamani-maitai-raa i te feia iino i te haereraa ˈtu e farerei ia ratou i ǒ ratou no te faaite atu i te parau no nia i te Basileia, parau e ora ˈi. E tano maitai te mau faahopearaa i noaa i roto i taua ohipa nei, i te mau parau ta tatou e taio i roto i te Isaia 26:10 e na ô ra e: “Faaherehere noâ i te taata paieti ore ra, e ore â oia e haapii i te parau-tia; ei te fenua parau-tia ra oia e rave ai i te parau-tia ore, e ore hoi e haapao i te hanahana o Iehova.”
5 Inaha, te tupu ra taua parau tohu nei no nia i te ruperupe-faahou-raa te fenua, i to tatou nei tau. Noa ˈtu te ravea e pûpûhia ˈtura ia ratou, mea iti roa te taata e hinaaro ra e taui i to ratou oraraa ia noaa mai ia ratou i te haamaitairaa a Iehova i te “fenua parau-tia ra”. Eita roa ˈtu te feia e faaino ia Iehova e ta ˈna mau ite haapao maitai ‘e ite atu i te huru teitei o Iehova’, eita hoi ratou e ora ˈtu no te fanaˈo i te mau haamaitairaa faahiahia mau e niniihia mai i nia i te huitaata nei ia oti te iˈoa o Iehova i te haamoˈahia (Isaia 11:9). E nehenehe atoa taua parau tohu nei e tupu i nia i te mau taata e faatia-faahou-hia mai no te ora ˈtu i nia i te fenua e faarirohia ei Paradaiso. E patoi vetahi o ratou i te faaau atu i to ratou oraraa i nia i te mau faaueraa tumu ta te Atua i faataa maramarama maitai mai i roto i te tahi mau “otaro”; eita ˈtura hoi to ratou iˈoa e itehia i roto i “te buka ora ra”. — Apokalupo 20:12, 15; hiˈo Ezekiela 33:11.
O te hau ta Iehova i faaoti
6. Eaha ta te mau tavini haapao maitai a Iehova e faaite nei ma te oaoa, e no te aha?
6 Teie râ, te anaanatae rahi nei te mau tavini haapao maitai a te Atua e te haa nei hoi ratou ia upootia mau â te parau-tia a Ia Iehova. Te tiaoro nei ratou ia ˈna ia ‘faatupu oia i te hau’ no to ˈna nunaa e te pii nei ratou ma te oaoa e: “E Iehova, e riro oe i te faatupu i te hau no matou; o ta matou atoa nei hoi mau ohipa, ua ravehia e oe no matou. Ua faarahi oe i te fenua nei.” (Isaia 26:12, 15). I roto i te tahi tau 210 fenua e mau motu o te ao nei, te tamau nei â Iehova i te amui mai e rave rahi mau taata i faaauhia i te mau mamoe o ta ˈna nunaa i te pae varua. E rave rahi hanere tausani mau hoa apî tei bapetizohia. I te tahi mau avae, e taiohia hau atu i te pae hanere tausani pionie taa ê, tamau e tauturu. E te rahi noa ˈturâ te mau Piha o te Basileia e te mau Piha tairururaa teie e patuhia nei. Te faarahi nei te mau amaa a te Taiete Watch Tower i ta ratou mau fare faaearaa e ta ratou mau fare neneiraa, e ua hau atu â hoi ta ratou materia i te pae no te neneiraa. Te tamau noa nei â hoi te maraaraa!
7. Maoti te aha i haere ai te faanahonahoraa a Iehova i faaauhia i te hoê oire, i mua?
7 Ua tupu taua maraaraa nei no te mea te aratai nei te “[Tamaiti hui arii] no te hau” i te mau ohipa a te nunaa a te Atua i nia i te fenua nei. Mai ta Isaia e faahiti ra i nia ˈtu i roto i ta ˈna parau tohu, “e te tupuraa o to ˈna mana i te rahi e to ˈna hau, aore ïa e hopea; e mana hoi oia i nia i te terono o Davida, e i nia i to ˈna ra basileia ei haamau e ei faaitoito i te reira, ma te parau au e te parau-tia i teie nei e a muri noa ˈtu: na te itoito o Iehova sabaota teie e rave”. (Isaia 9:6, 7.) Ua tupu taua mau parau nei ma ta faahiahia mau i to tatou nei tau. Te fanaˈo nei hoi te feia e tiaturi ra ia Iehova i te hau e te parau-tia no roto mai i taua faatereraa hui arii ra, mai teie atu nei. Te fanaˈo nei ratou i te autahoêraa here mau e itehia nei e te mau pǐpǐ mau a Iesu (Ioane 13:34, 35). Te tiai noa nei ratou i te taime e fatata roa maira i reira Iesu e faatere ai i nia i te fenua taatoa nei, o te î i te “ite ia Iehova”. — Isaia 11:9; Daniela 2:35, 44, 45.
8. Eaha mau na te auraa o te mau parau a Iehova i papaihia i roto i te Isaia 26:20, e eaha hoi te mau “piha”?
8 A fatata roa mai ai te Basileia i te faatere mai, te taˈi puai ra te pii a Iehova i papaihia i roto i te Isaia 26:20 e na ô ra e: “Haere mai, e au mau taata e; a tomo i roto i to mau piha ra, a opani mai i to mau uputa ia oe ra; a faatapuni ai ia oe iho e vahi iti aˈe, ia hoê aˈe amoraa mata, e ia pee ê atu taua tahoo nei.” Te mau “piha” e parauhia ra i ǒ nei, eita e ore e auraa fatata roa to ˈna e te mau amuiraa tei hau atu i te 54 000 e tei faaauhia i te mau oire, i reira te mau Ite no Iehova o te fenua atoa nei e putuputu ai. Na te tau a muri aˈe ia tatou nei e faaite mai e eaha ta Iehova ohipa e rave, e nehenehe râ tatou e papu e ia haamou roa oia i te feia iino, e paruru oia i ta ˈna mau tavini e tiaturi ra ia ˈna, mai ta ˈna i na reira i te tau o Isaia a rave ai oia e ia hoˈi atu te ati Asura ino ra i to ˈna fenua. — Isaia 10:24-26.
Ua papu maitai te faaoraraa
9. a) Mea nafea to te arii ra o Hezekia faaiteraa e te tiaturi mau ra oia ia Iehova? b) Eaha hoi te huru te tia ia tatou ia faaite ia faaino mai aore ra ia hamani ino mai te mau taata mea riri roa na ratou ia Iehova?
9 I teie nei mahana, te tiaturi nei te mau tavini a Iehova ia ˈna mai te arii o Hezekia i tiaturi ia ˈna. Ua tuu na hoi taua arii ra i to ˈna tiaturiraa taatoa i nia ia Iehova, ma te faariro ia ˈna ei Fatu Teitei no ˈna. No reira, a uˈana ˈi te haamǎtaˈuraa a to Asura, ua pure aˈera oia ia Iehova i te na ôraa e: “E te Atua o Iseraela, e Iehova sabaota, e tei parahi i ropu i na kerubi ra, o oe te Atua, o oe anaˈe, no te mau basileia atoa o te ao nei; na oe i hamani i te mau raˈi, e te fenua atoa. E fariu mai i to tariˈa, e Iehova, e faaroo mai; e faaaraara i to mata, e Iehova, e hiˈo: e faaroo mai i te mau parau atoa a Senakeriba, ta ˈna i hapono mai ei faaino i te Atua ora nei.” (Isaia 37:16, 17). Ia faaooo mai te taata mea riri roa na ratou ia Iehova, ia faaino mai aore ra ia hamani ino mai ia outou, aita anei te hoê aniraa mai te reira te huru e ô maira i roto i to outou mafatu? Ma te tuu taatoa i to outou tiaturiraa i nia ia Iehova, aita anei outou e pure ra ia ore roa te faaino i to ˈna iˈoa? Tera mau hoi te huru feruriraa o Iesu na mua iti noa ˈˈe oia e pohe ai i nia i te pou haamauiuiraa. Ua ani atoa ˈtu oia e ia “faaatea-ê-hia” te auˈa ta ˈna e inu ra, no te faaino rahi e roohia i nia i to ˈna Metua. — Mataio 26:39-44.
10. a) Eaha ta te pure a Hezekia e faaite maira no nia i ta ˈna tapitapiraa matamua? b) A faaruru noa ˈi tatou i te mau fifi na mua ˈˈe ia Aramagedo, nafea tatou e nehenehe ai e riro atoa mai ia Hezekia?
10 Te faaite ra te pure a Hezekia e e ere roa ˈtu no te mea e te haapao noa ra oia ia ˈna iho i hinaaro ai oia e ora mai mai roto mai i te rima o to Asura; aita noa oia i tamata na i te faaora ia ˈna iho. Aita, ua hinaaro râ oia e ia faahanahanahia te iˈoa o Iehova e ia upootia To ˈna mana faatere. No reira hoi ta ˈna pure i faaoti ai mai teie te huru: “E teie nei, e to matou Atua, e Iehova, teie to ˈu hinaaro ia oe, e faaora oe ia matou i tana rima, ia ite te mau basileia atoa o te ao nei e, o Iehova oe, o oe anaˈe ra te Atua.” (Isaia 37:20). Oia atoa, a faaruru noa ˈi tatou i te mau fifi na mua ˈˈe i te tamaˈi hopea o Aramagedo, eiaha roa ˈtu ia moehia ia tatou e, ia faaauhia i te faahanahanaraa i te iˈoa o Iehova, tei te piti ïa o te tuhaa to tatou iho ora. Mai ta to tatou Fatu Teitei ra i parau e 60 taime na roto i te arai o ta ˈna peropheta ra o Ezekiela, “e ite hoi [te mau nunaa] e, o vau o Iehova”. — Ezekiela 38:23.
11. a) Eaha te hape ta Senakeriba i rave, e eaha ta Iehova i rave ia au i taua ohipa i tupu ra? b) Ia au i te ohipa i roohia i nia ia Senakeriba, e nehenehe tatou e tiaturi ia vai?
11 I muri aˈe i to Hezekia faaotiraa i ta ˈna pure, ua faaite atura o Isaia ia ˈna i te parau ta Iehova i faahiti ei faautuaraa ia Senakeriba. Auê hoi hape i ravehia e taua taata faaino nei e i te faainoraa i te Atua ora mau ra e! Na roto i te arai o Isaia, ua na ô atura oia ia Senakeriba e: “O vai ta oe i faaino mai, e o vai ta oe i tuhi mai nei? i faateitei mai oe i to reo ia vai ra, a nânâ ai oe i to mata i nia ê ra? e ere anei i Tei Moˈa i Iseraela nei?”. O Tei Moˈa i Iseraela ra hoi tei na reira i taua rui ra! Hoê anaˈe melahi ta Iehova tei navai no te tairi 185 000 faehau asura, te pu iho o te mau nuu a Senakeriba; ua faariro aˈera hoi oia ia ratou ei “[feia pohepohe]”. Ua hoˈi noa ˈtura taua arii teoteo ra i ǒ na i Nineve ma te haama, e ua taparahihia aˈera hoi oia na ta ˈna iho mau tamarii a haamori noa ˈi oia i te idolo. E nehenehe ta tatou e tiaturi ia Iehova: e na reira atoa mai oia ia Satani e ta ˈna mau nuu atoa, e faaino rahi nei e e hamani ino nei i te mau Ite no Iehova. — Isaia 37:23, 36-38.
E tahoohia te “feia i taparahihia” ra
12. a) Mea nafea to te Isaia 26:21 faataaraa mai i te ohipa e tupu e e faaotihia i Aramagedo? b) O vai te “feia i taparahihia” ra te tia mau ia tahoohia na mua ˈˈe ia Aramagedo, e nafea hoi ratou ia tahoohia?
12 E hohoˈa riaria mau ta tatou i faahiti aˈenei, e e riro hoi ei hohoˈa riaria roa ˈtu â i te taime te Atua e titau mai ai i te taata eaha ta ratou ohipa i rave ia tae i te “ati rahi” ra. (Mataio 24:21.) Te titau mai nei Iehova ia tatou ia feruri maite i nia i te rahi o taua taparahiraa ra: “Inaha hoi, te haere maira Iehova mai to ˈna ra vahi, e faautua i to te fenua nei i ta ratou hara: e na te fenua e faaite mai i te toto i manii i nia ia ˈna ra, e ore hoi oia e tapoˈi faahou i to ˈna mau taata taparahihia ra.” (Isaia 26:21). Na mua ˈˈe, e rave o Iehova e ia faatupu te mau puai politita i ta ˈna haavaraa i nia i te feia e farii nei i te hape a te mau faaroo; i taua mahana ra, eita ratou e faaorahia na to ratou mau atua haavare. E nehenehe ta te pâpa e tamau â i te faanahonaho i te tahi mau putuputuraa no te pure na roto i te haaputuputuraa i te mau haapaoraa atoa a “Babulonia Rahi”! Aita roa ˈtu hoê noa ˈˈe tia o te mau haapaoraa e rave rahi e faahanahana ra i te Atua ora mau ra, o Iehova. Mea hape hoi ta ratou mau haapiiraa, e aita e tano ra i te mau Papai, e tae noa ˈtu ta ratou mau ohipa e rave. Ua taparahi hoi te mau melo hoê â haapaoraa ta ratou i te tahi e te tahi i roto i te roaraa o te mau senekele e ua manii i te toto o te mau kerisetiano i faaea hau noa. I te senekele e 20, e rave rahi o ratou tei turu i te mau tia faatere haavî tei taparahi pohe roa i te mau Ite no Iehova i roto i te mau fare tapearaa e te mau vahi haavîraa, ma te pupuhi ia ratou aore ra ma te tâpû i to ratou arapoa. Mai ta Iehova i faaite papu mai na roto i te arai o ta ˈna mau peropheta, e tahoohia taua “feia i taparahihia ra”. — Deuteronomi 32:41, 43; Isaia 1:24; 63:4; Apokalupo 17:15-18; 18:21, 24.
13. Ia au i te parau tohu a Isaia, eaha hoi te ohipa e tupu i te “mahana o Iehova”, e e tano taua mau parau nei no vai?
13 Ia oti te haapaoraa hape i te haamouhia, o Iehova e fariu oioi mai ai i nia i te tahi atu mau taata e patoi ra i te Basileia o te Mesia. I nia i taua mau taata atoa, e tae noa ˈtu hoi ia “Babulonia Rahi”, e tano ai teie mau parau a te Atua i papaihia i roto i te Isaia 13:6, 9 e na ô ra e: “A auê na outou, ua fatata hoi te mahana o Iehova; ei pohe no ǒ mai na te Puaihope ia tae mai. Inaha, te fatata maira te mahana o Iehova, aore e taraa; te riri uˈana, e te tairoiro mahu ore, ia ano roa te fenua ra; e te feia rave hara atoa i roto ia ˈna ra, e haamouhia ïa e ana.” — Salamo 145:20; Apokalupo 19:11-21.
14. E tia i te mau nunaa ia haapao maitai i tei hea ˈtu â mau parau, e no te aha?
14 E tia mau â i te mau nunaa o te fenua nei ia haapao maitai i te mau parau ta Isaia i papai i muri iho, i te Isa pene 34, irava 1 e tae atu i te 8, o ta ˈna buka: “E haafatata mai, e te mau fenua, e faaroo mai; e haapao mai ia ˈu. (...) Te vai nei hoi te riri o Iehova i nia i te mau fenua atoa, e to ˈna ooo tei nia i to ratou atoa ra mau nuu; ua faataahia ratou e ana, ua horoahia ratou no te pohe. E na to ratou i pohe ra, e faarue-noa-hia ïa; e pee te hauˈa ino i nia i to ratou mau tino, e horoihia te mouˈa i to ratou toto. (...) O te mahana faaiteraa riri hoi te reira na Iehova.” — Ieremia 25:31-33.
Te hoê paradaiso hau
15. Eaha ta Isaia e parau ra i te Isa pene 35 o ta ˈna buka no nia a) i to tatou nei tau? b) no nia i te tau a muri atu?
15 I te Isa pene 35 o ta ˈna buka, te faataa ra o Isaia, te peropheta a te Atua na roto i te hoê huru paraparau nehenehe mau i te huru o te mau tavini a Iehova e fanaˈo i te tauiraa i tǎpǔhia mai; oia hoi te mau taata e tiaturi tamau ia ˈna. I te mea hoi e ua haaputupuhia ratou i roto i te hoê paradaiso i te pae varua, ‘te ite ra ïa ratou i te hanahana o Iehova e te mana o to ratou Atua’. Te tiai atoa ra ratou i te hoê paradaiso mau e te tupuraa teie nei parau tǎpǔ e na ô ra e: “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra: e pǔpû mai hoi te pape na te medebara, e te pape tahe i te fenua mǎrô ra.” (Isaia 35:1, 2, 5, 6). Te faaoaoa ra anei taua tiaturiraa nei ia outou? Te tiaturi ra anei outou ia Iehova, ma te papu maitai e e faatupu mau â oia i taua mau parau tǎpǔ atoa nei?
16, 17. a) Eaha te piiraa rû ta Isaia e tuu maira a faataa noa mai ai oia i te parau no nia i te Paradaiso? b) E tia i te mau tavini a Iehova ia pahono i taua piiraa nei mai te aha te huru?
16 E riro paha e e turai to outou tiaturi ia Iehova ia faaitoito atu outou i te mau pǐpǐ apî. Te faaoti ra te peropheta ra o Isaia i ta ˈna faataaraa parau no nia i te Paradaiso ma te horoa mai i teie nei piiraa rû i te na ôraa mai e: “E faaetaeta na outou i te rima paruparu, e tauturu outou i te turi turorirori. E parau atu outou i te aau taiâ, Ia itoito outou; eiaha e mǎtaˈu; inaha hoi to outou Atua. E faaitehia mai â te riri; te tahoo a te Atua ra: oia iho te haere hua mai e faaora ia outou.” (Isaia 35:3, 4). Oia mau, te hinaaro nei tatou e ia tuu atoa te taatoaraa o te mau taata i to ratou tiaturiraa i nia ia Iehova, inaha e nehenehe atu ai ratou e ora i nia i te fenua e faarirohia ei Paradaiso.
17 No reira, ia turu na tatou i te mau rima paruparu ia nehenehe ratou ia ‘tapea maite i te parau ora’. E faaitoito anaˈe na i te feia atoa e perehahu ra e e tauturu anaˈe na ia ratou i roto i te mau tuhaa e tia mau ratou ia tauturuhia ia “au to ratou haerea i te Fatu i te mau mea atoa e mauruuru ai [oia] ra”. Oia mau, e tamahanahana anaˈe i te feia atoa i paruparu, e ia faaitoito na tatou i te tahi e te tahi ia tupu noa mai te fifi aore ra te hamani-ino-raa, ia “rahi roa to [tatou] itoito ia parau i te parau [a te Atua] ma te mǎtaˈu ore”. (Philipi 1:14; Tesalonia 1, 5:14; Ephesia 5:15, 16.) No reira, e nehenehe tatou e papu e ia tae i te mahana tahooraa a Iehova, e riro ïa to tatou Atua i te haamaitai mai ia tatou ‘ia haere mai oia no te faaora i to ˈna nunaa’. Tei roto atoa anei outou i te feia e tiaturi ia Iehova e faaorahia ˈtu?
18. Eaha te tiaturiraa faahiahia to mua i te feia e tiaturi ia Iehova, e eaha ˈtura hoi ta ratou opuaraa?
18 Auê hoi tiaturiraa faahiahia mau e vai ra i mua i te feia tiaturi ia Iehova, i muri aˈe i taua mahana riaria mau ra! Aita faahou te feia hamani ino, taua mau taata rave hara ino mau ra. I roto i te hoê ao apî, e itea-faahou atu te feia mea here na ratou ia Ia Iehova, i te huru taata tia roa maoti ta ˈna Tamaiti, e inaha, eita ˈtura hoi ratou e roo-faahou-hia i te hara. Aita anei outou e hinaaro ra e ia tae oioi mai taua taime ra? Inaha hoi, e nehenehe to outou tiaturi ia Iehova e tauturu mai ia outou ia ite i taua mahana faahiahia mau ra. Oia mau, e tiaturi ia Iehova, e riro hoi te reira i te faaora ia outou.
Ei haapoto-noa-raa
◻ Te faaitoito maira te himene upootiaraa i papaihia i roto i te Isaia pene 26, ia tatou ia aha?
◻ Eaha te “oire teitei” ta Iehova e tuu roa i raro, e nafea hoi tatou ia taataahi ia ˈna?
◻ Eaha ta te pure ta Hezekia i faahiti a haamǎtaˈuhia ˈi oia e Senakeriba e haapii maira ia tatou?
◻ Mea nafea te “feia i taparahihia” ra ta Isaia 26:21 e faahiti ra, ia tahoohia?
◻ Eaha hoi ta tatou e ite atu ia tuu tatou i to tatou tiaturiraa i nia ia Ia Iehova?
[Tumu parau tarenihia i te api 31]
Ua horohia te Parahiraa-Moˈa?
Ma te faataa mai i te parau no nia i te hoê tumu parau i neneihia i roto i te Il Giornale no Milane i papaihia e Umberto Siniscalchi, teie ta te World Press Review e faataa ra: “Te horohia ra hoi te haavaraa teitei roa ˈˈe no Italia i te mea e ua faaore oia, i te avae tiurai [1987], i te parau i haamanahia no te tapea e toru tia o te fare moni no te Vaticana i ô i roto i te peapea i tupu i te pae no te fare moni ra Ambrosiano.” Te horoa ra hoi taua opuaraa nei, i faaotihia ia au i te hoê parau tahito roa i rotopu i te Vaticana e te faatereraa italia, i te mana rahi i te peretiteni o te fare moni oia hoi e arii epikopo oia, e tae noa ˈtu i to ˈna faatere rahi e te raatira rahi e haapao i te faufaa. Te na ô râ taua vea nei e: “Noa ˈtu â ïa e aita ratou e faahapa ra i te opuaraa a te mau haava, te parau nei vetahi mau taata manaˈo faahapahapa e te tuhi ra te faaauraa parau i ravehia e te Ture no Italia i te faatiaraa e tei te mau taata i rave i te mau hapa i nia i te repo italia, te mana eita e nehenehe e faahapa. Te titau nei te feia haava e ia ravehia te hoê faaotiraa ia nehenehe te Parahiraa-Moˈa ia horohia e te Ture italia no te mau ohipa eiâ ta ratou i rave i Italia.”