Te mau faaoraraa maˈi semeio — eaha hoi to ratou faufaaraa?

Te faaroohia ra te taˈi tita, te taˈi pu, te pahu, te mau tophe e te mau sumebalo. Ma te uruhia, te ori ra te mau tane, te mau vahine e te mau tamarii. O te taime au hoi teie no te faatupu i te mau semeio.

Ma te ahuhia e te hoê ahu uouo roa, te haamata ra te taata faaora i te tuu i te rima i nia i te hoê taata huma e nee haere noa eita hoi ta ˈna e nehenehe e tia. E i muri iho, o te hoê ïa matapo, e faatapuni ra i to ˈna mata tei po roa i muri mai i te hoê titiˈa mata ereere. “Ua tupu te hoê semeio!” ta te feia mataitai ïa i tuô a haere noa ˈi te pirioi e a ite faahou ai te matapo...

E PINEPINE teie mau huru ohipa i te itehia i Afirita i roto e rave rahi mau Ekalesia e faatupu nei i te mau faaoraraa maˈi. Oia mau, i roto i taua mau pae fenua ra, mai roto atoa i te tahi atu mau fenua, e rave rahi mau taata faaora maˈi to reira no te mea te parau nei ratou e e nehenehe ta ratou e faatitiaifaro i te mau huru fifi atoa maoti te pure e te faaroo i te Atua. Te haere nei ïa vetahi mau taata e farerei i te feia faaora maˈi no te mea e fifi to ratou i te paeau moni; vetahi mau vahine ra ia nehenehe ta ratou tamarii e noaa mai, inaha e pinepine ratou i te faarirohia ei mau vahine haapaoraa ore i roto i te totaiete afirita.

Teie râ e pinepine no te mau fifi i te pae no te oraora-maitai-raa te taata e haere ai e farerei i te feia faaora maˈi. Noa ˈtu â ïa e ua î roa te ao nei i te raau e te rave nei te pae no te rapaauraa a te taote i te mau tutavaraa faahiahia mau no te haamâha i te mauiui o te feia maˈi, aitâ i iteahia i te taata te ravea no te rapaau i te mau maˈi atoa i te pae tino nei. Ua haamauˈa e rave rahi mau taata, ma te faufaa ore hoi i te mau tino moni rarahi no te maimiraa i te ravea e ora ˈi to ratou maˈi. No reira, eiaha roa ˈtu ïa e maerehia e no te aha e rave rahi e fariu tia ˈtu ai i nia i te feia faaora maˈi.

Te vai atoa ra teie e parau nei e ua ora mai ratou iho i te hoê faaoraraa semeio, e aita hoi ratou e ite ra nafea taua semeio ra ia patoi atu i te kerisetianoraa. Oia mau, i te mea hoi e e pinepine te feia i te rave i ta ratou ohipa na nia i te iˈoa o Iesu, e ere i te mea varavara ia itehia e e mau melo ta ratou mau pǐpǐ no te hoê haapaoraa rarahi e no te hoê Ekalesia e faatupu ra i te mau faaoraraa maˈi. Teie râ, mea tano anei ia haere atu te hoê taata haamori mau i te Atua e farerei i te hoê taata faaora no te faaora mai i to ˈna maˈi (Ioane 4:23)? E nehenehe mau anei e parau e na te Atua e faatupu ra i te mau faaoraraa maˈi e ravehia nei e te hoê taata faaora maˈi?