Te fanauraa hanahana roa ˈˈe: tapao e e haamauhia te hau i roto i te ao taatoa nei
“Ua fanau mai hoi te hoê tǎmǎ na tatou, ua horoahia mai te hoê tamaiti na tatou; ei nia i to ˈna ra tapono te hau vai ai: e mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau.” — ISAIA 9:6.
1. I raro aˈe i te faatereraa a vai te hau i roto i te ao taatoa nei e riro mau ai ei ohipa papu mau? Nafea tatou e ite ai i te reira?
TE HAU i roto i te ao taatoa nei i raro aˈe i te faatereraa a te “Arii o teie nei ao”, te Diabolo ra o Satani, auê ïa moemoeâ e (Ioane 12:31)! Te hau râ i roto i te ao taatoa nei, i raro aˈe i te Faatereraa a te “Arii no te hau” ra o Iesu Mesia, tera te hoê ohipa papu mau e tupu. Te haapapu maira Iehova i te reira i roto i te parau tohu no nia i te fanauraa e i te oraraa o te “Arii no te hau” ra. Teie ta tatou e taio i roto i te Isaia 9:6, 7: “Ua fanau mai hoi te hoê tǎmǎ na tatou, ua horoahia mai te hoê tamaiti na tatou; ei nia i to ˈna ra tapono te hau vai ai: e mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau. E te tupuraa o to ˈna mana i te rahi e to ˈna hau, aore ïa e hopea; e mana hoi oia i nia i te terono o Davida, e i nia i to ˈna ra basileia ei haamau e ei faaitoito i te reira, ma te parau au e te parau-tia i teie nei e a muri noa ˈtu: na te itoito e Iehova sabaota teie e rave.”
2. a) Ua horoahia te parau tohu i faaitehia i roto i te Isaia 9:6, 7, i roto i tei hea mau huru tupuraa? b) Nafea tatou e ite ai e e faatura mau Iehova i te faufaa ta ˈna i faaau e o Davida no te hoê basileia mure ore ei maitai no to ˈna huaai?
2 Inaha, ma te anaanatae mau tatou e tuatapapa ˈi i taua parau tohu faahiahia mau ra no nia i te fanauraa hanahana roa ˈˈe! Na mua ˈˈe râ, e ia nehenehe tatou e farii popou mau i taua parau tohu ra, e hiˈo anaˈe na eaha te taime te horoaraahia te reira. Tei te mau mahana ïa o Ahaza, i te tau te mau nunaa e opua ˈi e haru mai i te basileia o Iuda. Noa ˈtu â hoi to ˈna auraro ore i te Atua, ua faatiahia taua arii nei ia parahi i nia i te terono o Iehova. Te fanaˈo ra oia i te faaoromai o te Atua no te faufaa no nia i te hoê basileia mure ore ta Iehova i faaau atu ia Davida ei maitai no to ˈna huaai. Noa ˈtu â ïa e aita o Davida i faatiahia e patu i te hoê hiero no Iehova, ua horoahia ˈtu râ na ˈna te hoê haamaitairaa. Ta te mau Parau a te peropheta ra o Natana ïa e haapapu maira: “Te faaite atu nei hoi Iehova ia oe e na ˈna e patu i to fare na. E to oe na fare e to oe ra basileia, e mau ïa i mua ia oe ra: to oe ra terono, e mau ïa e a muri noa ˈtu.” (Samuela 2, 7:11, 16). No te maitai taua parau tohu ra a te Atua, i oaoa ˈi te arii Davida i te manaˈoraa oia e e tupu mau â te reira ma te faahiahia mau.
3. a) Ua tupu taua faufaa i faaauhia ˈtu ia Davida i nia ia vai, e mea taa ê roa oia i roto i tei hea auraa? b) No nia i te faufaa no te Basileia, eaha te tapao ta te Diabolo i haamau?
3 Ua tupu taua faufaa ra i faaauhia ia Davida na roto i te Tamaiti a Davida, o Iesu Mesia, te “Arii no te hau”. Aita aˈenei fare hui arii o te fenua nei i faaauhia aˈenei te hoê faufaa mai te reira te huru no te hoê basileia o te riro hoi te faatereraa hui arii e te hau i te vai e a muri atu. Ua riro taua faufaa i faaauhia no te hoê Basileia ei parau aroraa e tuuhia ˈtu i mua i te mau basileia atoa o teie nei ao e o Satani hoi te arii aore ra te raatira. Mai reira mai, ua haamau aˈera te Diabolo e ta ˈna mau demoni ei tapao na ratou, te haamou-roa-raa i te fare o Davida e te faaoreraa i te tiaturiraa e e tia mai te hoê mono e faatere mai aita e hopearaa. Ua itea aˈera ia Satani te tahi mau mauhaa no te faatupu i taua ohipa ra, i roto i te mau arii ra mai ia Rezina no Arama, ia Peka no na opu hoê ahuru no Iseraela, e i te arii ra no Asura.
Totovaraa i te faufaa i faaauhia i te Basileia
4. Mea nafea to te Diabolo ohiparaa no te tamata i te rave e ia ore te faufaa no nia i te Basileia i faaauhia e Iehova ia Davida, ia tupu?
4 Eaha hoi te opuaraa a te Diabolo? Faariaria ïa i te arii no Iuda ia Ahaza, ia faaau atu oia i te hoê faufaa ino mau e te arii no Asura. E nafea râ ïa oia? Ua aratai aˈera oia i te arii no Iseraela ra ia Peka e ia Rezina, te arii no Arama ia tahoê raua no te aro atu i te fare o Davida. Ua tahoê aˈera hoi ratou no te tatara mai te arii no Iuda ra o Ahaza e no te haaparahi atu ei arii te tamaiti a Tabeala, te hoê taata ta ratou i maiti e ta ratou e faariro ei arii e arataihia e ratou. O vai hoi taua tamaiti no Tabeala ra? E ere oia, e e mea faufaa mau hoi, i te hoê huaai no te fare o Davida. Eita ˈtura ïa te faufaa a te Atua e nehenehe e faaauhia e o ˈna e tae atu ai i to ˈna Mono e faatere e a muri atu aore ra “Arii no te hau”. Taua tamaiti no Tabeala ra te parahi mai i nia i te terono no Iuda, e taata ïa teie no ratou, eiaha râ no te Atua. No reira, te faaite mai nei te Bibilia i te mau huru raveraa a Satani no te haˈa e ia ore te faufaa no nia i te Basileia i faaauhia e Iehova ia Davida ia tupu noa ˈtu.
5, 6. Eaha te huru o Ahaza i mua i te totovaraa i ravehia i nia i te fare o Davida, e eaha te parau faaitoitoraa ta Iehova i faatae atu ia ˈna ra?
5 Eaha ihora ïa te huru o te arii ra o Ahaza i mua i taua haamataˈuraa ra? Ua haamata aˈera oia e to ˈna nunaa i te mataˈu. Ua faatae maira Iehova i te mau faaitoitoraa ia Ahaza ia ore oia ia tii i te tauturu i pihai iho i te arii no Asura, te arii no te puai e ati noa ˈˈe teie nei ao i taua tau ra, ma te faaau atu hoi i te hoê faufaa e oia. Ua tono atura oia i ta ˈna peropheta ia Isaia ia Ahaza ra ma teie nei parau i faaitehia i roto i te Isaia 7:4-9:
6 “Eiaha e mǎtaˈu, (...) No te mea, ua opua Arama i te ino ia oe; o Epheraima [te opu matamua o te basileia no Iseraela], e te tamaiti a Remalia [Peka], i te na ôraa e; Tatou i nia e rave ia Iuda, e auau atu; e vahi mai tatou i te tahi pae no tatou iho; e faaarii tatou i te tahi arii i ropu, oia te tamaiti a Tabeala. Te na ô maira te Atua ra o Iehova, E ore ïa parau e tia, e ore hoi e tupu. (...) Ia ore outou ia faaroo ra, e ore outou e haapapuhia.”
Te hoê tapao tei faaite mai e aita te totovaraa i manuïa
7. a) Na te aha i aratai ia Iehova ia faahiti i te parau tohu faahiahia mau e itehia i roto i te Isaia 7:14? b) Ua riro te fanauraa o Emanuela ei tapao papu no te aha e eaha te tiaraa o te mau tamaiti a Isaia?
7 Mea na reira to Iehova faaiteraa e eita te feia totova e manuïa. Ua tae i te taime e tohu ai te Atua i te hoê parau tohu faufaa roa, inaha te faaite ra te reira i te parau no te Tamaiti hui arii o te faufaa o te Basileia i faaauhia ia Davida. Mea nafea râ oia i te faahitiraa i taua parau tohu faahiahia mau ra? Ia ˈna i parau atu i te arii ra ia Ahaza, ua faaue atura Iehova ia ani oia i te tapao semeio ta ˈna e hinaaro ra; e fariihia hoi te reira ei tapao papu mau e e ofati te Atua i te totovaraa i ravehia i nia i te fare o Davida. Ua patoi atu râ o Ahaza i te reira. Eaha ihora ïa te ohipa i tupu? Teie ta te Isaia 7:14 e parau ra: “E tena na, na Iehova iho e horoa i te tahi tapao no outou: inaha! e tô te paretenia, e e fanau i te tamaiti, e mairihia hoi to ˈna iˈoa o Emanuela.” Te auraa o taua iˈoa nei teie ïa: “Te Atua i ǒ tatou nei”. I te mea hoi, e riro o Emanuela e te tahi atu nau tamaiti a Isaia ei tapao, te na ô râ te peropheta i roto i te Isaia 8:18: “Inaha vau, e te mau tamarii ta Iehova i ho mai na ˈu ra! ei tapao e ei maereraa i Iseraela nai, na Iehova sabaota ra.” No reira, ua riro atura ïa te fanauraa o Emanuela ei tapao papu maitai e e haamou-roa-hia te mau taata totova atoa e ta ratou mau totovaraa e rave i nia i te Tamaiti mono o taua faufaa ra.
8. a) Eaha ta te parau e vai ra i roto i te Isaia 7:15, 16, e parau ra no nia ia Emanuela, e eaha ihora ïa te faahopearaa? b) Eaha te tahi tumu e ore ai e papu-maitai-hia ˈi o vai te Emanuela o te tau o Isaia?
8 Aita te Bibilia e parau ra e na vai i fanau mai i te tamaiti i mairihia i te iˈoa ra ia Emanuela. E nehenehe râ e manaˈohia e na te hoê potii ati iuda, oia hoi te piti o te vahine a Isaia. Noa ˈtu e eaha, ia au i te parau tohu, eita te tamaiti iti e nehenehe e ite i te maitai e te ino e e farerei na arii toopiti e patoi ra i te fare o Davida, i te hoê hopea ino mau (Isaia 7:15, 16). Ua tupu mau â taua parau ra. Inaha, mai te peu e aita tatou e papu maitai ra i te parau no nia ia Emanuela o te tau o Isaia, e riro paha ïa e ia ore te manaˈo o te mau ui a muri aˈe ia ruri ê i te Emanuela Rahi, o te fa mai ei tapao semeio no te raˈi mai.
9. a) Ua riro te tupuraa te tapao e te manuïa-ore-raa te totovaraa i ravehia i nia i te faufaa no nia i te Basileia, ei tapao no te aha? b) Eaha te totovaraa rahi roa ˈˈe o te aamu taata atoa nei?
9 Parau mau, i te mau mahana o Ahaza, ua tupu te tapao e te manuïa-ore-raa te totovaraa rahi i ravehia i nia i te faufaa a te Atua no nia i te Basileia, i nia i te hoê faito nainai. Teie râ, e tapao faaite te reira e e tupu taua tapao nei e te manuïa-ore-raa taua totovaraa ra i roto i te ao taatoa nei, i nia i te hoê faito rahi i teie tau hopea to tatou nei. Oia mau, e mau ite tatou i teie mahana no te totovaraa rahi roa ˈˈe o te aamu taata nei. No te aha hoi tatou e nehenehe ai e parau i te parau no te totovaraa? No te mea aita roa ˈtu te mau nunaa e tauˈa nei i te faanahoraa ta Iehova i rave no te haamau i te hoê hau e vai e a muri atu, e e tae roa atoa hoi ratou i te patoi atu i te mau tia o te “Arii no te hau”. Te arataihia ra te totovaraa i nia i te Tamaiti mono o te faufaa i faaauhia no te Basileia, oia hoi, te “Arii no te hau”. Eaha râ ïa te tupuraa hopea o taua parau tohu ra? Ia taa ia tatou te tapao, e taa atoa ïa ia tatou te hopea o taua totovaraa rahi ra.
Fanauraahia te “Arii no te hau”
10. a) I roto i te tupuraa taatoa te parau tohu i faaitehia i roto i te Isaia 7:14, na vai i fanau mai te tamarii — oia hoi te tapao e te Tamaiti mono o te faufaa no te Basileia? b) Nafea te papai aamu ra o Mataio i te tahoêraa ia Emanuela, oia hoi te tapao, i te fare o Davida?
10 I roto i te tupuraa taua parau tohu ra i roto i to ˈna taatoaraa, te potii i fanau mai i te aiû — te tapao e te Tamaiti mono o te faufaa no te Basileia — o Maria ïa, te hoê paretenia ati iuda apî no roto mai i te opu o te arii ra o Davida. Ua faaite maira te melahi ra o Gaberiela ia ˈna e e fanau mai oia i te hoê tamaiti o te mairihia i te iˈoa ra ia Iesu, ta Iehova e horoa ˈtu “te terono o to ˈna ra metua o Davida no ˈna”, e ‘ore roa to ˈna basileia e mure’. (Luka 1:26-33.) Ma te faauruahia e te Atua, e tahoê te taata papai aamu ra o Mataio ia Emanuela, oia hoi te tapao, i te fare o Davida. Inaha, teie ta tatou e taio i roto i te Mataio 1:20-23: “Ua fa maira te hoê melahi a te Fatu, faaheitaoto maira ia ˈna [ia Iosepha], na ô maira, E Iosepha a Davida ra, eiaha e mǎtaˈu i to vahine ra ia Maria ia aratai mai i te utuafare, no te Varua Maitai hoi i hapu ai oia. E te tamaiti ta ˈna e fanau, o ta oe ïa e topa ˈtu ia Iesu; e faaora hoi oia i to ˈna taata i ta ratou hara. Tia mau atura tei parauhia mai e te Fatu i te vaha o te peropheta i taua mau mea atoa nei, a na ô mai ai ra e, Inaha, e hapu te hoê paretenia, e e tamaiti ta ˈna e fanau, e e topahia oia ia Emanuela; oia hoi Te Atua i ǒ tatou nei, ia iritihia ra.”
11. I hea e afea te fanauraa o Emanuela i tupu ai?
11 I hea e afea ra to Emanuela fanauraahia? Tei nia te mata o te mau ati Iuda i te eˈa maitai maoti te mau parau a Mika 5:2 i faahitihia i roto i te Mataio 2:6 e na ô ra e: “E o oe hoi, e Bete-lehema, i te fenua o Iuda nei, aore roa oe i iti roa i roto i te mau oire arii o Iuda, e na roto mai ia oe te hoê Tavana, e na ˈna e aratai i to ˈu nei taata ia Iseraela.” I te matahiti 2 hou to tatou nei tau, i roto i te oire o Betelehema, to te “Arii no te hau” fanauraahia; i reira hoi te parau tohu anaanatae mau a te Isaia 9:6, 7, i te haamataraa i te tupu.
12, 13. O vai tei itea i te hoê hanahana rahi a fanau ai te “Arii no te hau”, e ua apeehia taua fanauraa ra i tei hea mau tupuraa oaoa e te hanahana?
12 O vai i rotopu ia tatou nei o te ore e oaoa ia riro mai oia ei metua tane no te aiû e faarirohia ˈtu ei “Arii no te hau”? Ua faahanahana rahi mau taua fanauraa ra i te Metua arii o taua Tamaiti hui arii ra. Aita aˈenei, oia aita aˈenei fanauraa taata nei i apeehia aˈenei i te oaoa rahi.
13 Ua fa maira te melahi a Iehova, ma te oaoa, i te mau tiai mamoe ra e haapao ra i ta ratou mau nana i taua rui ra, i roto i te mau aua i rapaeau mai ia Betelehema, e “ua ati ihora ratou i te maramarama i te anaana o [Iehova]”. Ua faaite maira ïa oia i te fanauraa o te faatupu i te parau tohu a te Atua o te na ô ra e: “I nauanei hoi i fanau ai te Ora no outou i te oire o Davida, oia hoi te Mesia ra o te Fatu.” Ei haafaufaa ˈtu â i te ohipa i tupu, ua itea aˈera te hoê nahoa rahi melahi ra i roto i te raˈi, i te haamaitairaa i te Metua o taua aiû fanau apî ra, i te na ôraa e: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei.” Oia mau, eita anei e tia ia faaite te mau melahi i te hau a te Atua no te mau taata atoa e ite-au-hia mai e te Atua i te mahana fanauraa o te tamaiti e riro mai ei “Arii no te hau”? — Luka 2:8-14.
14, 15. a) Eaha te mau ohipa i tupu tei turai i te mau tamarii a te Atua ia arue ia ˈna? b) No te aha, i roto i te aamu o te ao nei, aita aˈenei e fanauraa mai te reira te huru i tupu aˈenei?
14 Na mua roa ˈtu i te fanauraa o te riro mai ei “Arii no te hau”, ua arue te mau melahi i te Atua i te hoê taime. Ua tupu te reira i te tau o te poieteraa, ia ˈna i hamani i te fenua (Ioba 38:4). Ua ite anei outou i te mau hohoˈa o te fenua i ravehia na te feia e haere i roto i te reva teitei? Mai te peu e e, ua ite ïa outou tei itehia e te mau melahi anaˈe i taua tau ra. Eaha ihora ïa to ratou huru? Teie ta te Ioba 38:7 e parau maira: “A fatu atoa ˈi te mau fetia poipoi i te himene, e ua pii noa te mau tamarii atoa a te Atua i te oaoa.”
15 No reira, e ere anei e mea tano mau â ia tahoê te mau tamarii a te Atua i to ratou reo au mau ia faaroo, ei himene arueraa i te taime fanauraa hanahana roa ˈˈe o tei faahanahana aˈenei i te fenua nei? Mai te hoê metua tane i te fenua nei e haapopouhia ia fanau mai ta ˈna tamaiti matahiapo, e tia atoa te Metua i te raˈi ra e te Tumu atoa hoi o taua fanauraa hanahana mau ra i roto i te mau fanauraa atoa, ia faahanahanahia e te mau melo o to ˈna utuafare i roto i te mau raˈi. Auê ïa taua himene au mau ra i te faaoaoa i te Atua, a tahi râ hoi e riro mai ai ei metua tane i roto i te mau huru tupuraa apî roa! Aita i iteahia aˈenei i roto i te aamu o teie nei ao, te hoê fanauraa mai te fanauraa o te tamaiti o te riro mai ei “Arii no te hau”.
Te anaana ra te hoê “maramarama rahi”
16. Afea e mea nafea te tahi atu tuhaa o te parau tohu e vai ra i roto i te Isaia pene iva i te tupuraa?
16 A haamata ˈi Iesu i ta ˈna taviniraa i mua i te huiraatira, ua tupu faahou te parau tohu e vai ra i roto i te Isaia pene iva. Te parau ra hoi no nia i na irava matamua, e faaite ra e e anaana te hoê “maramarama rahi” i nia i “te feia i haere noa na te pouri ra”. Ua faataahia mai te tupuraa o taua mau irava nei na te taata papai aamu ra o Mataio, tei papai ma te faauruahia e te Atua e: “Faarue ihora i Nazareta, haere atura [Iesu] e parahi atura i Kaperenaumi i te oire i te pae roto ra, i te otia i te fenua o Zebuluna e Naphatali: tia mau atura tei parauhia mai e te peropheta ra e Isaia i reira, i te na ôraa mai, Te fenua o Zebuluna, e te fenua o Naphatali, i te pae Ioridana i te hiti roto, i Galilea i ǒ te Etene ra; te feia i parahi i te pouri ra, ua hiˈo ïa i te maramarama rahi; e te feia i parahi i te vahi mǎrû-pohe ra ua hitihia ratou e te maramarama. I reira to Iesu haamataraa i te aˈo, i te na ôraa e, A tatarahapa, te fatata mai nei te basileia o te ao.” — Mataio 4:13-17.
17. No te aha Iesu i nehenehe ai e faaanaana i te maramarama i nia i te mau taata no Zebuluna e no Naphatali, e eaha te auraa taua maramarama ra no te feia e parahi ra i roto i te pouri?
17 Tei te pae apatoerau no Iseraela, te vairaa o Zebuluna e o Naphatali, e tei roto atoa hoi ia raua te mataeinaa no Galilea. Tei te hiti o Naphatali i te anavai i te pae tooa o te râ o te miti no Galilea. I to ratou ïa pororaa i te parau apî maitai no nia i te Basileia o te Atua, i roto i taua mau vahi ra, to Iesu e ta ˈna mau pǐpǐ faaanaanaraa i te maramarama i nia i te feia, e parahi noa ra i roto i te pouri e hia ˈtura maororaa. Teie ta Iesu i parau i roto i te Ioane 8:12: “O vau te maramarama o teie nei ao, o te pee mai ia ˈu ra, e ore ïa e haere noa i te pouri, e maramarama ora ïa to ˈna.” No reira, maoti o Iesu, ua noaa atura i te feia i “parahi i te vahi mǎrû-pohe ra” i “te maramarama ora”, inaha ua horoa oia i to ˈna ora “ei hoo no te taata e rave rahi”. O ˈna ta Iehova i faaohipa no te faaanaana i te maramarama i nia i te mauhaa e nehenehe ai te ora e noaa i te taata. — Mataio 4:23; 20:28.
18. a) Nafea tatou e ite ai e e ere taua “maramarama rahi” ra no te feia no Galilea anaˈe? b) Eaha ta tatou e tuatapapa i roto i te tumu parau i mua nei?
18 E ere taua “maramarama rahi” ra e faaite ra i te parau no te ore-roa-raa te pohe e te haavîraa, no te mau taata no Galilea anaˈe. Aita anei o Isaia i tohu e aore e hopea te tupuraa o te mana i te rahi, e e tiaraa faufaa roa to te “Arii no te hau”? Oia, teie hoi ta tatou e taio i roto i te Isaia 9:6, 7: “E mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau. E te tupuraa o to ˈna mana i te rahi e to ˈna hau, aore ïa e hopea.” I roto i te tumu parau i mua nei, e tuatapapa ïa tatou i te tiaraa o Iesu ei “Aˈo, te Atua puai, te Metua no te ui a muri atu,” e ei “Arii no te hau”.
Te haamanaˈo ra anei outou?
◻ Eaha te totovaraa i ravehia i te mau mahana o te arii ra o Ahaza?
◻ Eaha tei tupu, i nia i te hoê faito nainai, no nia i te tapao e vai ra i roto i te Isaia 7:14?
◻ Eaha te tupuraa taatoa o taua tapao ra?
◻ No te aha te fanauraa o te “Arii no te hau” i riro ai ei fanauraa hanahana roa ˈˈe tei ore aˈenei i itehia i te fenua nei?