Iesu, to ˈna oraraa e ta ˈna taviniraa

Ua parau atura Iesu i ta ˈna na pǐpǐ e maha ia apee mai ia ˈna

I MURI aˈe a fatatahia ˈi oia i te taparahihia i Nazareta, te oire oia i paari ai, ua haere atura Iesu i Kaperenaumi, i pihai iho i te miti no Galilea. Tera te faatupu ra i te tahi atu parau tohu a Isaia, o tei faahiti i te parau e te nunaa no Galilea e ora i te pae miti e ite ïa oia i te hoê maramarama rahi mau.

A tamau noa ˈi oia i te faaanaana i to ˈna maramarama na roto i te pororaa i te Basileia i tera vahi, ua ite atura Iesu e maha o ta ˈna mau pǐpǐ. Ua apee mai ratou ia Iesu i roto i to ˈna mau tere tau mahana noa na mua ˈtu, teie râ, ua rave faahou ratou i ta ratou ohipa taiˈa ia ratou i hoˈi mai i Iuda ra e o ˈna. Mea papu e te imi ra Iesu ia ratou, no te mea ua tae mai hoi te taime no ˈna ia faaineine te tahi mau taata haapao maitai e te itoito o te faahaere ta ˈna ohipa i mua, i muri aˈe oia e reva ˈtu ai.

Te haere noa ra Iesu na te pae miti a ite ai oia ia Simona Petero e to ˈna mau hoa e horoi ra i ta ratou upeˈa, ua haere atura oia ia ratou ra. Ua paiuma ˈtura i roto i te pahi o Petero e ua ani atura ia ˈna ia faaatea ê atu i te fenua. I te taime ratou i atea rii ai i te pae, ua parahi aˈera Iesu i roto i te pahi e ua haamata aˈera i te haapii i te feia rahi roa i te pae miti.

I muri iho, ua faaue atura Iesu ia Petero e: “Ho atu i roto i te vahi moana e tuu i ta outou upeˈa i te hoê haroa.”

“E te Fatu, parau atura Petero, i haa noa na matou e aˈo noa aˈenei te rui, e aore roa i noaa, e tuu ra vau i te upeˈa o oe i parau mai na.”

Ua tuu atura ratou i te upeˈa e no te rahi te iˈa, haamata aˈera te upeˈa i te motumotu. Ua tarape oioi taua mau taata ra i to ratou mau hoa i roto i to ratou pahi i pahi noa ˈtu, ia haere mai e tauturu ia ratou. No te rahi hoi te iˈa, haamata aˈera na pahi tei î roa, i te tomo. Ite atura hoi Petero i te reira, tipapa ihora oia i raro i te pae turi o Iesu, i te na ôraa ˈtu e: “E haere ê oe e te Fatu, e taata hara hoi au.”

“Eiaha e mataˈu, i teie nei, ta Iesu ïa i pahono atu, e taata [ora] ta oe e noaa.”

“Apee mai ia ˈu, ta ˈna ïa i parau atu ia ratou, e faariro vau ia outou ei ravaai taata.” Tera te titauraa rû ta Iesu i faahiti atu ia Petero e i ta ˈna tuaana ia Anederea. O Iakobo raua Ioane, na tamarii a Zebedaio, te mau taata ravaai o tei haere atu ia raua ra. Ua horoa-atoa-hia ia raua titauraa nei e ua farii maira raua ma te ore e haamarirau. Inaha, ua faarue aˈera taua mau taata ra i ta ratou ohipa ravaai e o ratou na pǐpǐ matamua e maha tei apee atu ia Iesu ma te haapao maitai e te itoito. Luka 5:1-11; Mataio 4:13-22; Mareko 1:16-20; Isaia 9:1, 2.

◆No te aha Iesu i faaau atu ai i ta ˈna mau pǐpǐ ia pee mai ia ˈna? O vai ma taua mau pǐpǐ ra?

◆Eaha te semeio tei haamataˈu ia Petero?

◆Te titau ra Iesu i ta ˈna mau pǐpǐ ia rave i tei hea huru ravaai?