Iesu, to ˈna oraraa e ta ˈna taviniraa

Te faatupu ra Iesu i te hoê parau tohu a Isaia

A ITE ai oia e te opua ra te mau Pharisea e te mau taata o Heroda e taparahi ia ˈna, ua haere ê atura o Iesu na te miti ra o Galilea e ta ˈna mau pǐpǐ. I reira, ua haere maira te mau tiaa rahi taata ia ˈna ra mai Paletetina atoa mai, e to rapae atu hoi. E rave rahi mau taata ta Iesu i faaora, e inaha ua oioi noa ˈtura te mau taata atoa i roohia i te mau maˈi rarahi ino mau i te haere mai e tapea mai ia ˈna.

I mua i taua mau taata e rave rahi ra, te ani ra Iesu i ta ˈna mau pǐpǐ ia haapao e ia ineine noa te tahi poti no ˈna. A atea ê atu ai oia i te hiti pape, e nehenehe atura hoi ta ˈna e ape e ia ore te taata e faahepo noa mai ia ˈna. E nehenehe ta ˈna e haapii atu ia ratou mai roto mai i te poti aore ra e haere mai i te hoê pae o te hiti pape e tae atu i te tahi no te tauturu atu i te feia i reira.

Te haapapu maira te pǐpǐ ra o Mataio e ua faatupu te ohipa a Iesu i “te parau a te peropheta ra a Isaia”. I muri aˈe, te faahiti ra oia i te parau tohu ta Iesu i faatupu, oia hoi:

“Inaha tau tavini, tei haapaohia e au ra; tau here e au maite ai tau aau: e tuu roa ˈtu vau i tau Varua i nia iho ia ˈna, e na ˈna e tuu atu i te ture i te mau Etene. E ore oia e mârô, e ore hoi e pii, e e ore hoi to ˈna reo e itea i te mau aroâ. Te aeho paruparu ra e ore oia e ofati; e te mori ama mohimohi ra e ore oia e tinai, e ia faatupu roa oia i ta ˈna ra mau ture. E e tiaturi atoa te mau Etene i to ˈna ra iˈoa.”

O Iesu mau â ïa te tavini herehia tei au maite i te mafatu o te Atua. Te faaite maira oia ma te maramarama maitai e eaha mau na te parau-tia, tei haapourihia hoi na roto i te mau peu tuutuu a te mau haapaoraa hape. Oia mau, no to ratou faaohiparaa i te ture a te Atua ma te hape, aita ˈtura te mau Pharisea i haere e tauturu i te hoê taata maˈi i te mahana sabati! No reira, ma te haapapu maitai mai e eaha mau na te parau-tia mau, ua faaora Iesu i te feia i faaroo ia ˈna i te mau haapiiraa tia ore; no reira te mau faatere haapaoraa i tamata ˈi i te haapohe ia ˈna.

‘E ore oia e mârô, e ore hoi e pii, e e ore hoi to ˈna reo e itea i te mau aroâ.’ Eaha ïa te auraa o teie parau? Inaha, i to Iesu faaoraraa i te mau taata, ua ‘parau hua ˈtura râ oia ia ratou e eiaha roa ratou e faˈi ia ˈna’. Aita hoi oia e hinaaro ra ia faahiti-rahi-roa-hia to ˈna parau i roto i te mau aroâ e ia faarahi-roa-hia te paraparau inaha, e huru ê roa ïa te mau parau e afaifaihia i rotopu i te mau taata.

Hau atu â, ua afai mai Iesu i ta ˈna parau tamahanahana i te feia e au, e faahohoˈaraa noa hoi teie, i te mau aeho paruparu ra, tei ofatifatihia e tei taataahihia. E au hoi ratou i te mori e ama ra tei mohimohi roa e tei fatata roa i te pohe. Eita Iesu e ofati i te aeho paruparu aore ra e tupohe i te mori ama mohimohi ra. Ua ite râ oia, ma te mǎrû e te here, nafea ia faaitoito i te feia haehaa. O Iesu mau â hoi te taata ta te mau nunaa atoa e nehenehe e tiaturi! Mataio 12:15-21; Mareko 3:7-12; Isaia 42:1-4.

◆ I roto i tei hea auraa to Iesu faataa-maramarama-raa mai e eaha mau na te parau-tia, ma te ore e mârô e e pii haere na roto i te mau aroâ?

◆ O vai ma te feia i faahohoˈahia i te aeho paruparu e i te mori ama, e eaha te huru o Iesu i nia ia ratou?