1 ENOHA
Ua haere o ˈna e te Atua
UA ITE Enoha eaha te huru ia faaea o ˈna anaˈe. Ua faataa ê mai oia i te taata o to ˈna tau. O o ˈna anaˈe te taata i tera tau ta te Bibilia e parau ra: “Ua haere noa Enoha e te Atua mau.” Mea nafea te hoê taata haihai i nia i te fenua i te na reiraraa? E eaha ta Enoha e haapii mai i teie mahana no nia i te itoito?
E piti ohipa ta Enoha i rave o tei faaite e ua haere oia e te Atua mau, a tahi ta ˈna i patoi i te rave e a piti ta ˈna i rave. Ua patoi o ˈna i te pee i te haerea o te taata ino e haaati ra ia ˈna. O ˈna te hituraa o te uˈi mai Adamu raua Eva, ua paari roa râ Adamu. (A hiˈo i te reni tuatapaparaa tau “Mai te mahana o te mau upoo utuafare tae atu i te tau o te mau tavana.”) Ua parare te feruriraa orure hau o na metua matamua i nia i te huitaata. Ua haapohe ta raua tamaiti o Kaina i to ˈna taeae o Abela, te taata matamua o tei faaite i te faaroo. E haerea ino to te tahi mau huaai o Kaina, e ua hau atu â paha. (Gen. 4:23, 24) Ma te itoito aita Enoha i farii ia ohipa te feruriraa haavîraa uˈana o tera tau i nia ia ˈna. Ua vai hau noa oia e ua faaoaoa te reira i te Atua.
E rave rahi matahiti hou a fanauhia ˈi Enoha, ‘ua haamata te taata i te tiaoro i te iˈoa o Iehova.’ (Gen. 4:26) Ua faaohipa ïa ratou i te iˈoa o Iehova ma te faatura ore e na roto i te haamoriraa hape. Aita Enoha i rave mai ia ratou. Ua here e ua faatura oia i te iˈoa moˈa o Iehova, na te reira ïa e faataa ê ia ˈna i te feia o to ˈna tau.
I to Enoha faarururaa i te riri o te feia tei hae i ta ˈna poroi, ua paruru Iehova ia ˈna
Ua hinaaro rahi Enoha i te itoito no te ohipa ta Iehova i ani ia ˈna ia rave. Ua horoa te Atua i te hoê hopoia taa ê ia ˈna oia hoi ia ohipa ei peropheta. E titauhia ia ˈna ia faaite i te hoê poroi i te feia mea taa ê roa ia ˈna. Teie te poroi: “Inaha, ua haere mai Iehova e ta ˈna mau ahuru tausani melahi moˈa no te haava i te taata atoa e no te faautua i te feia atoa aita e faatura ra i te Atua no ta ratou mau ohipa ino atoa i rave e no te mea ua tuhi teie mau taata rave hara i te Atua.”
Mea au roa ia tapao e ua parau Enoha i ta ˈna poroi mai te mea ra e ua haava aˈena Iehova ia ratou. Na te reira e haapapu e e tupu mau iho â ta Enoha i parau. Ua faaite atoa te poroi e ua riri roa Iehova. E toru taime to Enoha parauraa “e feia aita e faatura ra i te Atua, e feia ohipa ino e e mau taata rave hara ratou.” Aita e ore ua faariri tera mau parau i te taata a poro ai Enoha. Ma te itoito râ, ua faaite o ˈna eaha ta te Atua i hinaaro ia faaroo ratou.
Mai te aha to ratou huru? Aita te Bibilia e faataa papu ra i te reira, tera râ te horoa mai ra te reira i te manaˈo e, e ati te tiai mai ra ia Enoha. Nafea? Te taio ra tatou: “Aita faahou oia i muri iho, ua rave hoi te Atua ia ˈna.” Eaha tei tupu? Peneiaˈe ua hamani-ino-hia Enoha na te taata ino i to ˈna tau. Aita râ i vaiihohia ia ratou ia haamauiui aore ra ia haapohe ia Enoha, no to Iehova here ia ˈna, ‘ua rave Iehova ia ˈna’ aore ra ua faataoto ia ˈna i roto i te pohe. No reira, aita hoê noa ˈˈe taata e nehenehe e haamauiui ia ˈna, e nehenehe râ Iehova e faahoˈi mai ia ˈna i te ora.
Na mua roa, ua horoa Iehova i te hoê ô taa ê ia Enoha. Te taio ra tatou: ‘Hou Enoha a ravehia ˈi, ua faaite te Atua ia ˈna e ua mauruuru oia ia ˈna.’ Peneiaˈe ua horoa Iehova ia Enoha i te hoê orama, no nia i te mea e tiai mai ra ia ˈna: te hoê oraraa hau i roto i te paradaiso i nia i te fenua! Hou a piri ai to Enoha mata no te taime hopea, ua papu ia ˈna e: ua here Iehova ia ˈna e ua haamaitai o ˈna ia ˈna no to ˈna faaiteraa i te hoê faaroo puai e i te itoito aueue ore!
A taio i te aamu Bibilia:
A aparau:
Mea nafea to Enoha faaiteraa i te itoito?
A faahohonu atu â
1. Mea nafea to te taata haamataraa i “te tiaoro i te iˈoa o Iehova”? (Gen. 4:26; w01 15/9 29 par. 3)
2. Eaha ta Enoha te taata matamua taiva ore i rave? E mea nafea o ˈna i te amoraa i ta ˈna hopoia? (w01 15/9 31 par. 5)
3. Hou o ˈna a haamata ˈi i te tohu, no te aha ua ite Enoha e tamatahia ˈi to ˈna itoito? (w06 1/10 20 par. 13-14) A
Hohoˈa A
4. Nafea paha oe ia ite, aita Enoha i haere i te raˈi mai ta vetahi e tiaturi ra? (Ioa. 3:13; Heb. 11:5, 13)
A feruri i te mau haapiiraa
Eaha te taime e hinaaro rahi ai tatou i te itoito no te poro? Ia au i te hiˈoraa o Enoha, eaha te nehenehe e tauturu ia tatou? B
Hohoˈa B
Eaha to Iehova huru ia haere tatou e o ˈna? (Mas. 27:11; Heb. 11:5)
E nafea oe ia pee i te itoito o Enoha i roto i to oe oraraa?
A huti mai i te haapiiraa
Eaha ta teie aamu e haapii mai no nia ia Iehova?
E nafea teie aamu e tuati ai i te opuaraa a Iehova?
Eaha ta ˈu e hinaaro e ani ia Enoha i te tia-faahou-raa?
A haapii hau atu â
Nafea te hiˈoraa o Enoha e tauturu ai ia oe ia faaruru i te haavîraa uˈana?
A hiˈo eaha tei tauturu ia Enoha ia faatupu i te faaroo.