A HAAMATA I TE HOÊ APARAURAA
HAAPIIRAA 3
Te hamani maitai
Faaueraa tumu: “E hamani maitai te here.”—Kor. 1, 13:4.
Eaha ta Iesu i rave?
1. A hiˈo i te VIDEO aore ra a taio i te Ioane 9:1-7. E a aparau i teie mau uiraa:
Eaha ta Iesu i rave na mua roa, ua faaora anei aore ra ua poro oia i te taata matapo?—A hiˈo i te Ioane 9:35-38.
No te aha ua ineine teie taata i te faaroo ia Iesu?
Eaha te haapii mai i to Iesu hiˈoraa?
2. E faaroo mai te hoê taata i ta tatou poroi ia anaanatae tatou ia ˈna.
A pee i to Iesu hiˈoraa
3. A faaite i te aumihi i te taata. A tamata na i te feruri eaha ta teie taata e manaˈo ra.
A ui ia oe iho: ‘Eaha te mau fifi ta teie taata e farerei ra? Eaha te tauturu ta ˈna e hinaaro e te mea e anaanatae ai o ˈna?’ E tauturu te reira ia oe ia faaite i te aumihi ma te aau tae.
A faaite te tâuˈa ra oe i te manaˈo o te taata ta oe e faaroo ra. Mai te peu e faaite mai o ˈna i to ˈna huru aau no te tahi mau ohipa aore ra i te hoê fifi ta ˈna e faaruru ra, eiaha e taui i te aparauraa.
4. A paraparau ma te hamani maitai e te faatura. E itehia to oe hamani maitai e te hinaaro e tauturu atu i teie taata na roto i ta oe huru paraparau. A maiti maitai i te mau taˈo e te toparaa reo e eiaha e faahiti i te mau parau o te haamauiui ia ˈna.
5. A tauturu atu. A imi i te taime tano no te tauturu i teie taata. Ia faaite oe i te hamani maitai, e matara ohie mai to ˈna manaˈo.