A faaoaoa ia Iehova maoti te faaiteraa i te hamani maitai
‘Eaha ta Iehova hinaaro ia oe ra maori râ o te rave i te parau-tia, e ia here hoi i te hamani maitai, e te haere ma te haehaa i te aro o to Atua?’—MIKA 6:8.
1. No te aha eita tatou e maere i te mea e e titau Iehova i to ˈna nunaa ia faaite i te hamani maitai?
TE TITAU nei Iehova ia faaite to ˈna nunaa i te hamani maitai. Eita tatou e maere i te reira. Te faaite nei hoi te Atua i to ˈna maitai i te taata atoa, e tae noa ˈtu i te feia iino mauruuru ore. I roto i teie tuhaa, ua parau atu o Iesu Mesia i ta ˈna mau pǐpǐ e: “E aroha râ outou i to outou mau enemi; e hamani maitai, e horoa, eiaha noa ˈtu ei manaˈo hoo; e e utua rahi ïa ta outou; e riro hoi outou ei tamarii na te Teitei: e hamani maitai hoi to ˈna i te feia mauruuru ore e te taata ino. E aroha atoa hoi outou mai to outou Metua e aroha maira.”—Luka 6:35, 36.
2. Eaha te mau uiraa no nia i te hamani maitai o te tia ia tatou ia tuatapapa?
2 Mai ta Mika 6:8 e faaite ra, te feia e haere ra e te Atua, e tia mau â ia ratou ia ‘here i te hamani maitai.’ Oia mau, te oaoa nei Iehova ia here ta ˈna mau tavini i te hamani maitai e ia faaite ratou i te reira ma te aau mehara. Eaha mau na râ te hamani maitai? Eaha te mau haamaitairaa e noaa mai na roto i te faaiteraa i te hamani maitai? E mea nafea e nehenehe ai e faaite i teie huru maitai?
Eaha mau na te hamani maitai
3. Nafea outou ia tatara mai i te parau no te hamani maitai?
3 Te hamani maitai, o te huru ïa e turai ia tatou ia anaanatae mau ia vetahi ê. E faaitehia te reira na roto i te mau ohipa o te tauturu e te mau parau o te faatura ia vetahi ê. Te auraa o te hamani maitai, o te haamaitairaa ˈtu ïa i te taata maoti hoi i te rave i te tahi ohipa ino. Te hoê taata hamani maitai, o te hoê ïa taata auhoa, te mǎrû, te au roa, e te maitai. E haerea horoa noa to ˈna, e e faatura ˈtu o ˈna ia vetahi ê. Ua riro hoi te hamani maitai ei tuhaa no te huru i faaauhia i te ahu o te mau kerisetiano mau atoa, mai ta Paulo i faaitoito na i te na ôraa e: “[A faaahu ia outou i te] aroha noa, e te hamani maitai, e te haehaa, e te mǎrû, e te faaoromai rahi.”—Kolosa 3:12.
4. Mea nafea to Iehova horoaraa mai i te hiˈoraa no nia i te faaiteraa i te hamani maitai i te huitaata nei?
4 Ua riro o Iehova ei hiˈoraa i te pae no te faaiteraa i te hamani maitai. Mai ta te aposetolo Paulo i parau, ‘i te itearaahia mai te hamani maitai e te here o to tatou Faaora ra te Atua, i te taata,’ i reira ‘to ˈna faaoraraa mai ia tatou ia au i to ˈna aroha maoti te hopuraa o tei aratai ia tatou i te ora e maoti te faaapîraa ia tatou na roto i te varua moˈa.’ (Tito 3:4, 5) Ua tamâ, aore ra ua ‘faahopu,’ te Atua i te mau kerisetiano faatavaihia i roto i te toto o Iesu, ma te haafanaˈo ia ratou i te maitai o te tusia taraehara o te Mesia. Ua faaapî-atoa-hia ratou na roto i te varua moˈa, e ua riro mai nei “ei taata apî” na nia i te tiaraa tamarii a te Atua i faatavaihia e te varua. (Korinetia 2, 5:17) Oia mau, ua taea-atoa-hia te hamani maitai e te here o te Atua i te taata i nia i te “feia rahi roa” no roto mai i te mau nunaa atoa, o tei “horoi i to ratou ahu, e ua teatea, i te toto o te Arenio ra.” (Apokalupo 7:9, 14; Ioane 1, 2:1, 2) Hau atu, tei raro aˈe pauroa te feia faatavaihia e te feia rahi roa, e tiaturi nei e ora i nia i te fenua, i te zugo “mǎrû” o Iesu.—Mataio 11:30.
5. No te aha tatou e tiaturi ai e e faaite te feia i arataihia e te varua o te Atua i te hamani maitai ia vetahi ê?
5 Tei roto atoa te hamani maitai i te hotu o te varua moˈa o te Atua, aore ra to ˈna puai ohipa. Te na ô ra o Paulo e: ‘Te hotu o te varua, o te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te hitahita ore. Aore roa e ture e patoi i te reira.’ (Galatia 5:22, 23) No reira, eaha tei titauhia i te feia e arataihia ra e te varua o te Atua? Ma te papu maitai, e tia ia ratou ia faaite i te hamani maitai ia vetahi ê.
6. E turai te hamani maitai i te mau matahiapo e te tahi atu mau kerisetiano ia pee i teihea haerea?
6 E rave rau mau ravea no te faaite i te hamani maitai. Te faaite nei tatou i to tatou hamani maitai ia aroha tatou ia vetahi ê. Ei hiˈoraa, e faaite te mau matahiapo kerisetiano i te hamani maitai ia aroha ˈtu ratou i te hoê taata hara tei tatarahapa e ia imi ratou i te ravea no te tauturu ia ˈna i te pae varua. Maoti te hamani maitai no ǒ mai i te Atua ra, e riro te mau tiaau ei feia faaoromai, te faatura, te maitai, e te mǎrû. E turai te reira ia ratou ia ‘hamani maitai i te nǎnǎ.’ (Ohipa 20:28, 29) Inaha, e tia i teie hotu o te varua oia hoi te hamani maitai i te faariro i te mau kerisetiano atoa ei feia aroha, te faaoromai, te faatura, te maitai, te auhoa, e te farii maitai.
A ape i te hamani maitai tano ore
7. No te aha e parauhia ˈi e ua riro te hamani maitai tano ore ei paruparu?
7 Te faariro nei vetahi i te hamani maitai mai te hoê paruparu. Te manaˈo nei ratou e e tia i te hoê taata ia riro ei taata aroha ore, ei taata haavî atoa i te tahi taime, ia mǎtaˈu vetahi pae i to ˈna puai. Teie râ, ua tano roa te parau ra e “ua riro te haavîraa ei hohoˈa haavare noa no te puai o te taata paruparu.” I te parau mau râ, e titauhia i te puai no te riro ei taata hamani maitai e oia atoa no te ape i te hamani maitai tano ore. E ere te hamani maitai, oia hoi te hotu o te varua o te Atua, i te tahi huru paruparu e te farii noa i te haerea ino. Ua riro râ te hamani maitai tano ore ei paruparu o te aratai i te hoê taata ia farii i te hara.
8. (a) Ia hiˈohia to ˈna haerea i nia i ta ˈna mau tamaiti, mea nafea to Eli faaiteraa i to ˈna paruparu? (b) No te aha e tia ˈi i te mau matahiapo ia ara ia ore ratou ia topa i roto i te hamani maitai tano ore?
8 Mea paruparu roa te tahuˈa rahi no Iseraela ra o Eli i te pae no te aˈoraa ˈtu i ta ˈna nau tamaiti, o Hophini raua o Phinehasa, o tei tavini na ei tahuˈa i te sekene. Aita ratou i mauruuru i te tuhaa o te tusia i faataahia na raua ia au i te Ture a te Atua, e ua rave aˈera raua i te hoê tavini no te titau i te iˈo ota i te taata e hopoi mai i te tusia hou te mii o te iˈo e pûpûhia e tutuihia ˈi i nia i te fata. E haerea faufau roa atoa to te mau tamaiti a Eli e te mau vahine e tavini ra i te uputa o te sekene. Maoti i te tatara roa i te toroa a Hophini raua o Phinehasa, ua aˈo rii mǎrû noa ˈtu o Eli ia raua, ma te faatura hau atu i ta ˈna mau tamaiti i te Atua iho. (Samuela 1, 2:12-29) Eita e maerehia i te mea e “te iti ra te parau a Iehova i te reira anotau”! (Samuela 1, 3:1) Eiaha roa ˈtu ïa te mau matahiapo kerisetiano ia topa i roto i te tahi feruriraa hape aore ra ia faaite i te hamani maitai tano ore o te nehenehe e faaino i te maitai i te pae varua o te amuiraa. Eita te hamani maitai mau e tapo i to ˈna mata i mua i te mau parau e te mau ohipa iino o te ofati i te mau ture a te Atua.
9. (a) Eaha te haerea o te tauturu ia tatou ia ore e topa i roto i te hamani maitai tano ore? (b) Mea nafea to Iesu faaiteraa i te puai i to ˈna faarururaa ˈtu i te mau apotata?
9 Ia ore tatou e faaite i te hamani maitai tano ore, e tia ia tatou ia pure no te ani i te tauturu a te Atua ia noaa mai te puai e haapapuhia ra i roto i te mau parau a te papai salamo ra e: “Ia atea ê atu outou, e te feia parau ino ra; e haapao vau i te parau a tau Atua.” (Salamo 119:115) E tia atoa ia tatou ia pee i te hiˈoraa o Iesu Mesia, o te ore roa ˈtu e nehenehe e faahapahia i te mea e ua faaite oia i te hamani maitai tano ore. Inaha, ua riro o Iesu ei hiˈoraa faahiahia roa ˈˈe i te pae no te faaiteraa i te hamani maitai mau. Ei hiˈoraa, ‘ua aroha oia i te nunaa no te mea ua purara ratou e ua faarue-taue-hia, mai te mamoe tiai ore ra.’ No reira, aita te feia aau mehara i mǎtaˈu i te haafatata ˈtu ia Iesu, e tae roa ˈtu i te afai atu i ta ratou mau tamarii nainai ia ˈna ra. A feruri na i te hamani maitai e te mǎrû o ta ˈna i faaite ‘ia ˈna i tauahi mai i te mau tamarii a haamaitai atu ai ia ratou’! (Mataio 9:36; Mareko 10:13-16) Noa ˈtu e e taata hamani maitai o Iesu, ua tapea maite râ oia i te mea tia i mua i te aro o to ˈna Metua i te raˈi ra. Aita roa ˈtu o Iesu i farii noa ˈˈe i te ohipa ino; ua noaa ia ˈna i te puai no ǒ mai i te Atua ra no te faaite tahaa i te hapa o te mau raatira faaroo haavare ra. I roto i te Mataio 23:13-26, ua faahiti o ˈna e rave rahi taime i te parau ra: “Auê outou, e te mau papai parau e te mau Pharisea, e haavare outou!” I te mau taime atoa, ua haapapu o Iesu i te tanoraa o te haavaraa a te Atua.
Te hamani maitai i taaihia e te aroha
10. Nafea te mau pǐpǐ a Iesu e faaite ai i te hamani maitai e te here i to ratou mau hoa faaroo?
10 No nia i ta ˈna mau pǐpǐ, te na ô ra o Iesu e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) E eaha te tahi tuhaa o te aroha o tei riro ei tapao no te mau pǐpǐ mau a Iesu? Te na ô ra o Paulo e: “E faaoromai roa to te aroha, e te hamani maitai.” (Korinetia 1, 13:4) Ia riro tatou ei feia faaoromai e te hamani maitai, oia hoi te auraa e e tapoˈi tatou i te mau hapa e te mau vahi paruparu o vetahi ê, mai ta Iehova e rave ra ma te hamani maitai rahi. (Salamo 103:10-14; Roma 2:4; Petero 2, 3:9, 15) E fa atoa mai te here e te hamani maitai kerisetiano ia roo-anaˈe-hia te tahi mau hoa faaroo i te ati i te tahi vahi o te fenua nei. Ma te faaite hau atu i te tahi noa ‘hamani maitai i matauhia i rotopu i te mau taata,’ te faaite nei te mau kerisetiano no te tahi atu mau vahi i te here autaeae na roto i te pûpûraa i te mau ô materia no te tauturu i teie feia haamori ia Iehova.—Ohipa 28:2.
11. Ia au i te mau Papai, eaha te aroha?
11 Ua taaihia te hamani maitai e te aroha i roto i te parau ra “aroha hamani maitai,” e faaohipa-pinepine-hia nei i roto i te mau Papai. No roto mai teie hamani maitai i te here taiva ore. Ia au i te parau hebera i hurihia na roto i te parau ra “aroha” (cheʹsedh), te titauhia ra hau atu i te haapao-maitai-raa. O te hamani maitai teie o te mau maite ma te here i nia i te hoê tumu e tae roa ˈtu i te taime e naeahia ˈi te tapao i taaihia i teie tumu. Ua faaite mai Iehova i to ˈna aroha aore ra to ˈna here taiva ore, na roto e rave rau mau ravea. Ei hiˈoraa, ua faaite oia i to ˈna aroha na roto i te mau ohipa faaoraraa e parururaa o ta ˈna i rave.—Salamo 6:4; 40:11; 143:12.
12. Ia pure te mau tavini a Iehova ia noaa mai te tauturu aore ra te faaoraraa, eaha ta ratou e nehenehe e tiaturi?
12 Eita e maerehia ia huti te aroha o Iehova i te taata ia ˈna ra! (Ieremia 31:3) Ia titau anaˈe te mau tavini haapao maitai o te Atua i te faaoraraa aore ra i te tauturu, ua ite ratou e ua riro mau â to ˈna aroha ei here taiva ore, o te ore roa ˈtu e faarue mai ia ratou. No reira, e nehenehe ratou e pure ma te tiaturi papu, mai ta te papai salamo i rave i te na ôraa e: “Te tiaturi nei au i te aroha no oe ra; e oaoa tau aau i te ora na oe ra.” (Salamo 13:5) I te mea e eita te here o te Atua e taiva, eita ta ˈna mau tavini e tiaturi faufaa ore noa i to ˈna aroha. Ia pure anaˈe ratou ia noaa mai te tauturu aore ra te faaoraraa, ua papu maitai ia ratou e: “E ore hoi Iehova e faarue i to ˈna taata, e ore e haapae i ta ˈna ra tufaa.”—Salamo 94:14.
Te mau haamaitairaa e noaa mai na roto i te hamani maitai
13, 14. No te aha te hoê taata hamani maitai e fanaˈo ai i te mau hoa taiva ore?
13 Ma te pee i te hiˈoraa o Iehova, “e faaite” ta ˈna mau tavini “i te hamani maitai e te aroha, te taata atoa i to ˈna ihora taeae.” (Zekaria 7:9; Ephesia 5:1) “Te unauna o te taata ra, to ˈna ïa hamani maitai,” e e ooti mai te taata e faatupu i teie huru maitai i te mau haamaitairaa rahi. (Maseli 19:22) Eaha vetahi o taua mau haamaitairaa ra?
14 E turai te hamani maitai ia tatou ia haapao i te huru o vetahi ê e e tauturu te reira ia tatou ia atuatu i te mau auraa maitatai i rotopu i te tahi e te tahi. Te taata e haapao i te huru o vetahi ê, e parau ïa oia e e rave atoa oia i te mau ohipa aore ra e faatitiaifaro oia i te mau huru tupuraa fifi na roto i te mau ravea o te faatura e o te ore e faaino ia vetahi ê. E parahi noa te taata “rave ino” ra o ˈna anaˈe iho, area ra, “o tei hamani maitai i to ˈna varua, e taata hamani maitai ïa.” (Maseli 11:17) E ape te taata i te hoê taata ino, e haafatata ˈtu râ ratou i te hoê taata o te faaite mai i te aroha. No reira, e fanaˈo te hoê taata maitai i te mau hoa taiva ore.—Maseli 18:24.
15. Eaha ta te hamani maitai e nehenehe e faatupu i roto i te hoê utuafare amahamaha i te pae faaroo?
15 E nehenehe te hoê vahine kerisetiano e huti mai i ta ˈna tane aita to roto i te parau mau maoti te hamani maitai. Hou oia e ite ai i te parau mau e to ˈna ahuraa i te ‘huru taata apî, o tei hamanihia ia au i te Atua ra, i te parau-tia e te maitai mau ra,’ e vahine iria paha oia, e te maniania atoa. (Ephesia 4:24) Ahiri e ua ite ta ˈna tane i te tahi mau maseli, e farii iho â paha o ˈna e “te parau a te vahine avau ra, e topatapata tuutuu ore ïa” e “mea maitai ia parahi noa i te medebara, i te parahi i ǒ te vahine avau e te iria.” (Maseli 19:13; 21:19) I teie nei râ, e nehenehe te haerea mâ o te vahine kerisetiano e to ˈna faatura hohonu, tei apitihia mai e te mau huru maitatai mai te hamani maitai, e tauturu ia ˈna ia aratai mai i ta ˈna tane i roto i te faaroo mau. (Petero 1, 3:1, 2) Oia mau, e riro te reira ei haamaitairaa no to ˈna hamani maitai.
16. Mea nafea tatou e faufaahia ˈi i te hamani maitai e faaitehia mai i nia ia tatou?
16 E faufaahia tatou ia faaite mai vetahi i te hamani maitai i nia ia tatou no te mea e rahi atu tatou iho i te haamaitai ia vetahi ê e i te faaore i ta ratou hapa. Ei hiˈoraa, ahiri e ua titau tatou i te tauturu i te pae varua e ua haapaohia mai tatou na roto i te hoê huru raveraa maitai e te mǎrû, eita anei te reira e turai ia tatou ia faaite atoa ˈtu i teie huru maitai i nia ia vetahi ê? E nehenehe tatou e tiaturi e e faaite te feia paari i te pae varua i te maitai e te mǎrû inaha ua papai o Paulo e: “E mau taeae, ia roohia-noa-hia te hoê taata i te hapa ra, e faaora outou o tei haapao i ta te [v]arua ra i te reira, ma te aau mǎrû, ma te manaˈo ia oe iho, o te roohia-atoa-hia oe e te ati.” (Galatia 6:1) E paraparau te mau matahiapo ma te mǎrû e te hamani maitai ia tauturu atu ratou i te feia faaroo tei rave i te hara. Noa ˈtu e ua fanaˈo tatou iho i teie huru tauturu aore ra aita, eaha ta te Atua e titau ra i te feia atoa e tavini ra ia ˈna? E tia i te mau kerisetiano atoa ia faaite i te hamani maitai ia vetahi ê e e tia atoa ia haapao i teie aˈoraa a Paulo: “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.” (Ephesia 4:32) Oia mau, mai te peu e ua faaore mai te hoê taata i ta tatou hapa aore ra ua tauturuhia mai tatou i roto i te hoê fifi i te pae varua, na roto i te hoê huru raveraa hamani maitai, eita e ore e e rahi atoa ˈtu tatou iho i te faaore i te hapa a vetahi ê e i te faaite i te mǎrû e te hamani maitai.
Ia mauruuru tatou i te hamani maitai rahi o te Atua
17. I te mea e e feia hara anaˈe tatou mai to tatou fanauraa mai â, e tia ia tatou ia haamauruuru taa ê i teihea huru hamani maitai?
17 I te mea e ua fanau-paatoa-hia tatou ei feia hara tei faautuahia i te pohe, te vai ra te hoê hamani maitai te tia ia tatou ia haamauruuru taa ê. O te hamani maitai rahi ïa o te Atua ra o Iehova. Ia tiamâ mai te feia hara i te faautuaraa o te pohe e ia faarirohia ratou ei feia tia, e titauhia te hamani maitai o te ore roa ˈtu e tia ia tatou ia fanaˈo. Ua parau atu o Paulo, o tei faahiti i te hamani maitai rahi o te Atua tau 90 taime i roto i ta ˈna mau rata e 14 i faauruahia mai e te Atua, i te mau kerisetiano i Roma tahito ra e: “Ua rave paatoa hoi i te hara, e ua ere i te haamaitai a te Atua ra. I tia-noa-hia mai ïa e to ˈna ra aroha mau, i te ora e vai i te Mesia ra ia Iesu.” (Roma 3:23, 24) Ia haamauruuru mau na tatou i te hamani maitai rahi o te Atua ra o Iehova e tia ˈi!
18, 19. Nafea tatou ia ore tatou ia mairi i te tapao o te hamani maitai rahi o te Atua?
18 Ia ore tatou e mauruuru, e nehenehe tatou e erehia i te tapao o te hamani maitai rahi o te Atua. No nia i teie manaˈo, te na ô ra o Paulo e: “E teie nei, e vea matou na te Mesia mai te mea e, te aˈo nei te Atua i te taata ia matou nei; ei mono matou i te Mesia, i te aˈoraa ˈtu i te taata e, E faafaite outou i te Atua. Ua faariro hoi oia ia ˈna, i tei ore i ite i te hara ra, ei taraehara na tatou; ia faarirohia tatou ei feia parau-tia i te aro o te Atua ia ˈna ra. E teie nei te aˈo atoa ˈtu nei matou, te rave ohipa amui nei, ia outou, e eiaha outou e farii faufaa ore noa i te aroha mau o te Atua ra; (te parau ra hoi oia [i roto i te Isaia 49:8] e, Ua faaroo vau ia oe i te anotau au ra, e ua turu atu vau ia oe i te mahana faaoraraa ra: e inaha, teie taua anotau au ra; inaha, teie taua mahana faaoraraa ra.) Aore roa i tuu i te turoriraa i te taata atoa, ia ore ia faainohia te toroa nei: te faaite hua nei râ matou ia matou iho e e rave ohipa na te Atua i te mau mea atoa nei.” (Korinetia 2, 5:20–6:4) Eaha ta Paulo e hinaaro ra e parau?
19 Ua riro te mau kerisetiano faatavaihia ei mau tia e mono ra i te Mesia, e ua riro te feia rahi roa ei feia i tonohia e a ˈna ra. Te faaitoito nei ratou paatoa i te taata ia faafaite atu i te Atua ia noaa mai te ora. Aita o Paulo e hinaaro ra ia fanaˈo te taata i te hamani maitai rahi o te Atua ra o Iehova na roto ia Iesu Mesia e ia mairi i ta ˈna tapao. O te ohipa ïa e tupu mai te peu e eita tatou e rave i te ohipa te tia ia tatou ia rave maoti te hamani maitai rahi. Mai te peu e e atuatu tatou i te mau auraa maitatai e te Atua ei feia o tei faafaite ia ˈna, eita ïa tatou e fanaˈo faufaa ore noa i to ˈna hamani maitai rahi ia faatupu tatou i “te toroa faafaite nei; teie hoi taua parau ra, ei roto te Atua i te Mesia i te faafaiteraa i to te ao nei ia ˈna iho.” (Korinetia 2, 5:18, 19) E hamani maitai rahi atoa ˈtu tatou ia vetahi ê na roto i te tautururaa ia ratou ia faafaite atu i te Atua.
20. Eaha ˈtu â ta tatou e tuatapapa?
20 E faaohipa te mau tavini a Iehova i to ratou taime e ta ratou mau faufaa no te rave i te mau ohipa hamani maitai ia tutava ratou i te tauturu i te taata i te pae varua na roto i te taviniraa kerisetiano. Eaha râ ta tatou e nehenehe e haapii na roto i te mau hiˈoraa no roto mai i te mau Papai i te pae no te faaohiparaa i te hamani maitai? E tuatapapa anaˈe na i te tahi o teie mau hiˈoraa e tae noa ˈtu i te tahi atu mau ravea no te faaoaoa ia Iehova na roto i te faaiteraa i te hamani maitai.
Eaha ta outou e pahono mai?
◻ Eaha te hamani maitai?
◻ Nafea tatou ia ape i te topa i roto i te hamani maitai tano ore?
◻ No te aha te nunaa o Iehova e tiaturi ai i to ˈna aroha?
◻ Eaha vetahi mau haamaitairaa e noaa mai na roto i te hamani maitai?
◻ Eaha te tia ia tatou ia rave ia ore tatou e mairi i te tapao o te hamani maitai rahi o te Atua?
[Hohoˈa i te api 21]
Maoti te hamani maitai, e riro te mau matahiapo kerisetiano ei feia faaoromai, te faatura e te maitai
[Hohoˈa i te api 23]
E nehenehe te hamani maitai o te vahine kerisetiano e tauturu i ta ˈna tane ia farii i te faaroo mau
[Hohoˈa i te api 25]
E nehenehe tatou e hamani maitai ia vetahi ê na roto i te tautururaa ia ratou ia faafaite atu i te Atua