HAAPIIRAA 14

A haamatara i te mau manaˈo faufaa

Hebera 8:1

TE FA: A tauturu i te taata ia apee maite i te tumu parau e a faaite e nafea te mau manaˈo faufaa e tuati ai i te tumu parau.

A feruri i te fa o te tumu parau. Ua faaineinehia anei no te haamaramarama, no te haapapu, no te faaitoito? I muri iho, a faataa i te mau manaˈo faufaa ia naea ta oe fa.

A ui ia oe iho, ‘Eaha te mau uiraa aore ra manaˈo o te taata no nia i teie tumu parau? Eaha te uiraa aore ra manaˈo e hiti mai na mua?’ I muri iho, a apapa maitai i te mau manaˈo faufaa ia apee maite atu te taata. Mea ohie ïa no ratou ia taa e ia farii i ta oe e parau ra.
A haafaufaa i te manaˈo tumu. I te roaraa o te tumu parau, a faahiti pinepine i te mau taˈo o te haamanaˈo mai i te manaˈo tumu.
A haamatara i te mau manaˈo faufaa. A maiti noa i te mau manaˈo o te paturu i te tumu parau e o ta oe e haamatara i roto i te taime faataahia. Eiaha ia rahi roa te manaˈo, a haapapu maitai eaha te mau manaˈo faufaa, a faataime rii hou a faahiti ai i te tahi atu. Eiaha atoa e horo noa.

E faahiti paha oe i te mau manaˈo faufaa i te omuaraa aore ra i te pae hopea o te tumu parau. E apee maite atu ïa te taata e e mau maitai te haapiiraa i roto i to ratou feruriraa.