Ua tapeahia o Iesu

Ua haere o Iesu e te mau aposetolo na roto i te peho no Kiderona no te tae i te mouˈa Oliveta i muri aˈe i te tuiraa po. Ua omenemene maitai te avaˈe. I to ratou taeraa ˈtu i te ô i Getesemane, ua parau Iesu ia ratou: “A parahi na outou i ǒ nei e a ara.” Ua haere atura o Iesu i te hoê vahi aita i atea e ua tuturi oia. No to ˈna hepohepo rahi, ua pure oia ia Iehova: “Ia tupu to oe hinaaro.” Ua tono atura Iehova i te hoê melahi no te faaitoito ia Iesu. I to Iesu hoˈiraa ˈtu i ta ˈna mau aposetolo ra, ua ite oia e te taoto ra ratou. Ua parau oia: ‘A ara! E ere te taime tano no te taoto! Fatata to ˈu mau enemi i te tapea ia ˈu.’

I taua taime ra, ua tae atura o Iuda. Ua aratai oia i te hoê nahoa taata, e ˈoˈe e e raau ta ratou. Ua ite oia teihea roa o Iesu no te mea pinepine ratou i te haere i tera ô. Ua parau o Iuda i te mau faehau e na ˈna e faaite ia ratou o vai o Iesu. Ua haere oia ia Iesu ra ma te parau: ‘Ia ora na, Orometua.’ E ua apa ˈtura oia ia ˈna. Ua parau atura Iesu: ‘E Iuda, te taiva ra anei oe ia ˈu ma te hoê apa?’

Ua haere atura o Iesu i te nahoa taata ra no te ani atu: “O vai ta outou e imi nei?” Ua pahono ratou: “O Iesu no Nazareta.” Ua pahono atura oia: “O vau ïa.” Ua otohe atura te mau taata e ua topa ratou i raro. Ua ani faahou o Iesu i te nahoa taata: “O vai ta outou e imi nei?” Ua pahono faahou ratou: “O Iesu no Nazareta.” Ua pahono atura Iesu: ‘Ua parau atu hoi au e o vau. A tuu ïa i tera mau tane ia haere.’

I to Petero taaraa eaha te tupu ra, ua rave oia i te hoê ˈoˈe e ua tapu oia i te tariˈa o te hoê tavini a te tahuˈa rahi, o Malako to ˈna iˈoa. Ua tapea râ o Iesu i to Malako tariˈa e ua ora ihora oia. Ua parau atura Iesu ia Petero: ‘A faahoˈi i ta oe ˈoˈe i roto i te vehî. Ia aro oe ma te rave i te ˈoˈe, e pohe ïa oe i te ˈoˈe.’ Ua haru atura te mau faehau ia Iesu e ua taamu ratou i to ˈna na rima. Ua horo ê atura te mau aposetolo. I muri iho, ua afai te nahoa taata ia ˈna i te tahuˈa tiaau, o Ana to ˈna iˈoa. Ua uiui o Ana ia Iesu e ua afai oia ia ˈna i te fare o Kaiapha, te tahuˈa rahi. Eaha râ tei tupu no te mau aposetolo?