Ua parau Petero e aita oia i ite ia Iesu

I te piha i nia, a putuputu ai o Iesu e ta ˈna mau aposetolo, ua parau oia ia ratou: ‘I teie po, e faarue outou pauroa ia ˈu.’ Ua na ô o Petero: ‘Eita roa ˈtu vau e faarue ia oe, noa ˈtu e faarue ratou pauroa ia oe!’ Ua parau râ Iesu ia Petero: ‘Hou te hoê moa e totereo ai, e parau oe e toru taime e aita oe i ite ia ˈu.’

I to te mau faehau afairaa ia Iesu i te fare o Kaiapha, ua horo ê aˈena te rahiraa o te mau aposetolo. I vai na râ e piti o ratou tei apee i te nahoa taata. Hoê o raua, o Petero ïa. Ua tomo oia i roto i te aua o te fare o Kaiapha e ua haere oia i pihai iho i te auahi no te haamahanahana ia ˈna. Ua ite atura te hoê vahine tavini ia Petero e ua parau atu oia: ‘Ua ite au ia oe! Ua apee oe ia Iesu!’

Ua parau atura Petero: ‘Aita! Aita vau e ite ra no te aha oe e parau ai i te reira!’ Ua haere atura oia i te uputa. I taua taime ra, ua ite te tahi atu tamahine tavini ia ˈna e ua parau oia i te nahoa taata: ‘Ua apiti atoa teie taata ia Iesu!’ Ua parau atura Petero: ‘Aita roa ˈtu vau i ite ia Iesu!’ Ua parau te hoê taata: ‘E pǐpǐ oe na ˈna! Ia au i ta oe huru paraparau, e taata Galilea oe mai ia Iesu.’ Ua horeo râ o Petero: ‘Aita vau i ite ia ˈna!’

I tera taime, ua totereo te hoê moa. Ua ite Petero ia Iesu i te hiˈoraa ia ˈna. Ua haamanaˈo atura oia i ta Iesu mau parau. Ua haere atura oia i rapaeau e ua taˈi ihora oia no te peapea rahi.

I roto i taua area taime ra, ua faaoti te Sunederi e haava ia Iesu i roto i te fare o Kaiapha. Ua faaoti aˈena ratou e haapohe ia Iesu e i teie nei, te imi ra ratou i te hoê tumu no te na reira. Aita râ ratou i nehenehe noa ˈˈe e faahapa ia ˈna. I te pae hopea, ua ani roa ˈtu o Kaiapha ia Iesu: ‘O oe anei te Tamaiti a te Atua?’ Ua pahono atura Iesu: ‘Oia mau.’ Ua parau atura Kaiapha: ‘Mea papu maitai i teie nei. Te faaino ra oia i te Atua!’ Ua faaoti te tiripuna: ‘Ia pohe tera taata.’ Ua poara ihora ratou ia Iesu, tutuha i nia ia ˈna, tapoˈi i to ˈna na mata e tupai ia ˈna ma te parau: ‘Mai te peu e peropheta oe, a parau mai o vai tei tupai ia oe!’

A hiti ai te mahana, ua afai ratou ia Iesu i te piha a te Sunederi e ua ani faahou ratou ia ˈna: ‘O oe anei te Tamaiti a te Atua?’ Ua pahono atura Iesu: ‘Na outou iho e parau i te reira.’ E ua faahapa ratou ia ˈna ma te parau e ua faaino oia i te Atua. Ua afai atura ratou ia ˈna i te aorai o Ponotio Pilato, te tavana Roma. Eaha tei tupu i muri iho? O ta tâua ïa e ite atu.