Te mau taˈo i nia i te pǎpai

Ua riro Belesazara ei arii no Babulonia. I te hoê po, ua titau manihini oia i te mau taata faufaa roa ˈˈe o te fenua i te hoê tamaaraa. E tausani taata tei haere mai. Ua faaue Belesazara i ta ˈna mau tavini ia afai mai i te mau auˈa auro ta Nebukanesa i rave i roto i te hiero o Iehova. Ua inu Belesazara e ta ˈna mau manihini i roto i teie mau auˈa auro e ua faahanahana ratou i to ratou mau atua. Fa mai ra te hoê rima e haamata ˈtura teie rima i te papai i te mau taˈo maere mau i nia i te pǎpai o te piha tamaaraa.

Ua riaria roa Belesazara. Ua ani oia i ta ˈna mau taata tahutahu ia haere mai e ua fafau oia ia ratou: ‘Mai te peu e e faataa hoê o outou i te auraa o tera mau taˈo, e faariro vau ia ˈna mai te toru o te taata puai roa ˈˈe no Babulonia.’ Ua tamata ratou i te faataa i te mau taˈo tei papaihia, aita râ hoê aˈe te nehenehe e na reira. Ua haere mai te arii vahine e ua parau oia: ‘Te vai ra hoê taata, o Daniela to ˈna iˈoa. Ua matau oia i te horoa i te mau faataaraa ia Nebukanesa. E nehenehe atoa oia e faataa i tera mau taˈo ia oe.’

Ua haere mai o Daniela i mua i te arii. Ua parau Belesazara ia ˈna: ‘Mai te peu e e nehenehe ta oe e taio e e faataa i teie mau taˈo, e horoa ˈtu vau ia oe i te hoê fifi arapoa auro e e riro oe te toru o te taata puai roa ˈˈe i Babulonia.’ Ua na ô Daniela: ‘Aita vau e hinaaro i ta oe mau taoˈa. E faaite râ vau i te auraa o tera mau taˈo. E taata teoteo to oe metua tane e ua faahaehaa Iehova ia ˈna. Ua ite iho â oe eaha tei tupu no ˈna. Ua faatura ore râ oe ia Iehova ma te inu i roto i te mau auˈa auro ravehia i roto i to ˈna hiero. Ua papai ïa te Atua i teie mau taˈo: MENE, MENE, TEKELE e PARISINE. Tera ïa te auraa: E haru to Medai e Peresia ia Babulonia e eita oe e riro faahou ei arii.’

E au ra e aita hoê aˈe te nehenehe e haru ia Babulonia. Ua paruruhia teie oire e te mau patu meumeu e te hoê anavai hohonu. I tera râ po, ua aro to Medai e to Peresia i te oire. Ua faatioi te arii no Peresia, o Kuro to ˈna iˈoa, i te anavai ia nehenehe ta ˈna mau faehau e haere na avae. A tapae ai ratou i te mau uputa o te oire, ua matara aˈena te reira! Ua tomo te nuu i roto i te oire e ua haru ratou i te reira. Ua haapohe atoa ratou i te arii. I muri aˈe, ua riro Kuro ei taata faatere ia Babulonia.

I roto hoê matahiti, ua faaite o Kuro: ‘Ua parau Iehova ia ˈu ia patu faahou i to ˈna hiero i Ierusalema. Ia hinaaro te nunaa o Iehova e apiti i te paturaa, e nehenehe ratou e hoˈi i Ierusalema.’ Mai ta Iehova i fafau, ua hoˈi te ati Iuda e rave rahi e 70 matahiti i muri aˈe i to Ierusalema haamouraahia. Ua faahoˈi Kuro i te mau auˈa auro e ario e te mau taoˈa ta Nebukanesa i rave i roto i te hiero. Ua ite anei oe e nafea Iehova i faaohipa ˈi ia Kuro no te tauturu i to ˈna nunaa?