E tiaturi anaˈe ia Iehova eiaha râ i te hoê “amuiraa [opuaraa ino]”!
1. Eaha tei roohia i te faanahonahoraa ite-mata-hia a Iehova, i roto i te roaraa o te Tamaˈi rahi Matamua?
I ROTO i te roaraa o te Tamaˈi rahi Matamua, ua faaino rahi roa aˈera te mau aroraa i rave-tahaa-hia e te mau aposata, i te mau tavini a Iehova. Ua uˈana atoa maira te hamani-ino-raa no ô mai i to ratou mau enemi i te pae haapaoraa ra. Ua opani ihora ta ratou pû, i Brooklyn (New York). Hau atu, aita ratou i tauturu-faahou-hia mai e te peretiteni, te papai parau e te haapao faufaa atoa hoi, te tia haapao i te mau piha raveraa ohipa, te hoê melo no te Tomite papairaa parau e e maha na faatere a te Totaiete — inaha, ua tapea-pauroa-hia ratou i roto i te fare tapearaa rahi no Atlanta, i Géorgie (Etats-Unis). Mai te mea ra e ua tae mai te hopea no te mau Taata haapii i te Bibilia i faatavaihia e te varua moˈa, e ua fatata roa mai to ratou faahanahanaraa i te mau raˈi ra. E ere râ te reira te ohipa i tupu!
2. Eaha te parau tohu a Isaia tei tupu i to tatou anotau, i te matahiti 1919?
2 Inaha, e nehenehe hoi e faatupu i te mau parau a Isaia 66:6-8 i to tatou anotau, i te tau uaaraa tiare no te matahiti 1919, ma te ani faahou i te mau uiraa i anihia e te peropheta: “E reo i te atuturaa no roto i te oire! e pii no roto i te hiero! te reo o Iehova i te tahooraa i tana mau enemi! Hou oia i mamae mai ai, ua fanau maira ta ˈna: aitâ i tupu mai te mauiui ia ˈna, i fanau mai ai ta ˈna e tamaroa. O vai tei faaroo aˈenei i te parau mai teie nei? o vai tei ite i te parau mai teie nei mau parau te huru? e fenua atoa anei te fanau mai i te mahana hoê? e fanau mai anei te fenua taatoa mai te amoraa mata nei? tei te mauiuiraa ra hoi i fanau mai ai ta Ziona mau tamarii.”
3. I te matahiti 1919, eaha te mea i haapapu mai e ua fanau mai o Ziona i te tamarii e ua fanauhia mai te hoê “[nunaa]” apî “mai te amoraa mata nei”?
3 Oia mau, mai te huru ra e ua faatia-faahou-hia mai ratou mai te pohe maira, ua faatupu aˈera te mau melo no te Taatiraa na te ao taatoa a te Feia haapii i te Bibilia i ta ratou tairururaa matamua i muri aˈe i te tamaˈi, i Cedar Point (Ohio), mai te 1 e tae atu i te 8 no setepa 1919. Ua tae atoa maira te peretiteni, te papai parau haapao faufaa, te taata haapao e te tahi atu mau faatere a te Totaiete, o tei matara noa mai i te fare tapearaa e tei faaore-roa-hia hoi te utua, i taua haaputuputuraa oaoa ra. Ua faaite ihora te peretiteni a te Totaiete, o J. Rutherford, e ua matara mai te hoê vea apî oia hoi L’Age d’Or — tei parauhia i teie nei A ara mai na! — e ua oaoa roa ˈˈera te feia i amui mai. I te tahi aˈe pae, hau atu i te 200 pǐpǐ apî tei bapetizo i taua tairururaa ra. Ua horoa maira ïa te faanahonahoraa teotaratia a Iehova i te ora i te mau tamarii o te ohipa ˈtu ma te itoito mau i roto i taua anotau ra i muri noa ˈˈe i te tamaˈi. E tia ˈtura ïa i taua “fenua taatoa [nunaa]” ra tei fanauhia mai mai te amoraa mata nei e tei tuuhia ˈtu i roto i te hoê “fenua” tei fanauhia mai i roto i te hoê â huru tupuraa, ia faaohipa i te mau ravea apî e te taiâ ore i roto i te pororaa.
4. a) Eaha te faahopearaa ta teie mau tupuraa atoa e faatupu mai i nia ia “Babulonia Rahi”? b) Ua riro te faaiteraahia i te mau taairaa mau e vai nei i rotopu ia “Babulonia Rahi” e te mau mana o te raˈi tei puai aˈe i te taata nei, ei haamataraa no te aha?
4 Ua riro aˈera taua tupuraa ra ei patoiraa na “Babulonia Rahi”, te amuiraa o te mau haapaoraa hape atoa o te ao nei. Ua hitimaue ihora oia e ua peapea roa ˈˈera ta ˈna mau melo, te amuiraa faaroo kerisetiano iho â râ. Ua ite maite atura oia e e haapeapeahia to ˈna hau. Inaha, e haafifihia te mau tiaraa ta ˈna e titau ra i te pae no te haapaoraa. E faaite-tahaa-hia to ˈna mau taairaa e te mau mana no te raˈi mai tei puai aˈe i te taata nei, eiaha hoi e te Atua o te Bibilia Moˈa ra, e “te atua o teie nei ao” râ — o Satani, o ˈna hoi te tumu no te anetimesia tei tohu-aˈena-hia mai i roto i te Bibilia (Korinetia 2, 4:4; Ioane 1, 2:18). Inaha, ua riro taua faaiteraa ra, ei haamataraa noa no to ˈna pohe, no te mea na te Haava rahi no te ao taatoa nei iho, e rave i ta ˈna haavaraa e e faatupu atu ai. Eita oia e faaora mai ia ˈna i te mana a to ˈna mau tane politita tahito ra, o te riri roa hoi ia ˈna i taua taime ra.
5. a) No te aha te amuiraa faaroo kerisetiano e vaiiho ai ia ˈna ia haavarehia, e mea nafea te Atua o te Bibilia i te hiˈoraa ia ˈna? b) Eaha te mea ta “Babulonia Rahi” e ore e ite nei?
5 Noa ˈtu e e Bibilia atoa ta ˈna, oia hoi te Buka e tohu ra i taua mau ohipa atoa ra, e vare roa te amuiraa faaroo kerisetiano iho. E tiaturi atu oia i te mau nunaa o te faahiti atu i te pii ra “E hau e aita e ino!”, inaha, te faatupu nei oia i ta ˈna mau oroa faaroo i roto mau i taua mau nunaa ra. I roto i taua mau oroa ra, e faanaho te mau Ekalesia ta ˈna e amui ra, i te mau titauraa moni o te faarahi nei i ta ratou taoˈa. Teie râ, i mua i te aro o te Atua o te mau Papai Moˈa ra, ‘mea veve, mea matapo e te vai tahaa noa ra’ oia. Aita oia i tuu i to ˈna tiaturiraa i roto ia Iehova, e eita atoa oia e fanaˈo i te mau taoˈa rahi mau i te pae varua ta Iehova e pûpû ra (Apokalupo 3:17, 18). Eita oia e ite ra i te parau i papaihia i nia i te patu. Eaha ïa ta matou e hinaaro ra e parau?
Te hoê parau i papaihia i nia i te patu
6. I teie nei, e hoˈi tatou i te mau hora hopea o tei hea puai o te ao nei no te tau Tahito, e eaha hoi te huru o te nunaa tahito a Iehova i taua tau ra?
6 Ia nehenehe tatou e taa i taua mau parau nei, e tia ia tatou ia hoˈi faahou i muri e tae roa ˈtu i te mau hora hopea no te Toru o te Puai o te ao nei ia au i te aamu a te Bibilia, oia hoi o Babulonia, tei nia hoi to ˈna oire pû i te mau pae pape o te Eupharate. O Belesazara te arii hopea no Babulonia o tei faatere na i taua oire ra, tei reira atoa hoi te vahi i faatiahia ˈi te pare no Babela, i reira hoi to te Atua Mana-Hope ra haapurararaa i te feia patu i te pare ma te haapeapea i to ratou reo hoê (Genese 11:1-9). I te tau i ora ˈi o Babulonia i to ˈna mau hora hopea, ua faatîtîhia ïa te nunaa tahito a Iehova, te nunaa ati iuda, i roto i taua fenua etene ra. Ua fatata roa râ na matahiti e 70 ra no to ˈna vai-tîtî-noa-raa i te hope.
7. a) No te aha te arii Belesazara i faatupu ai, ma te haapeapea ore, i te hoê oroa amuraa maa rahi na ta ˈna mau tia mana? b) Eaha te ohipa i tupu i taua oroa ra, e eaha ta te reira i faatupu i nia i te arii?
7 Ua haere maira te mau nuu a te mau Medai e te mau Peresia tei tahoê, e o te riro mai hoi ei Maharaa o te Puai rahi o te ao nei o te aamu bibilia, no te aro ia Babulonia. Teie râ, mai te huru ra e eita taua oire ra, mea paari roa hoi ta ˈna mau patu, e nehenehe e haruhia. Te tahe ra te Eupharate na ropu i taua oire ra, e e matara na opani veo e piti o tei tâpûhia hoi i roto i te mau patu o te oire, i nia i taua anavai rahi ra. No to ˈna tiaturi e mea paruru-maitai-hia te oire, faatupu aˈera te arii ra o Belesazara ma te haapeapea ore i “te tahi oroa rahi amuraa maa, no te taata mana hoê tausani” — teie hoi ta ˈna oroa rahi amuraa maa hopea. Inaha, ite atura oia i te hoê rima i te fâraa mai e i te papairaa i nia i te hoê patu i teie mau parau tohu: “MENE, MENE, TEKELE, UPHARISINE.” (Daniela 5:1, 5, 25). Ua tupu ïa te reira i te rui no te 5 no atopa 539 hou to tatou anotau. Ua ahoaho aˈera te mau manihini atoa i te fauraraa mai taua parau i papaihia ra. Ma te rûrû noa hoi, pii atura te arii Belesazara ra i te mau taata paari — te mau tahutahu e te mau hiˈohiˈo, tei tui roa hoi te roo no to ratou ite i te tatara i te mau tapao e te mau tohu. Aita râ ratou i manuïa i te faataaraa ˈtu i te mau parau semeio, aita atoa hoi ratou i nehenehe e taio atu i te reira. Eaha ˈtura ïa te tia ia rave i teie nei?
8, 9. a) I te pae hopea, eaha te manaˈo i parauhia ˈtu i te arii? b) Eaha te tatararaa ta Daniela i horoa mai no nia i te parau i papaihia i nia i te patu? c) No te aha te oroa rahi amuraa maa tei faanahohia e te arii Belesazara i faatupu ai i te hoê parau tohu riaria mau?
8 E tia ˈtura ïa ia haere e tii i te hoê ati Iuda. Eaha? Te hoê ati Iuda? Oia mau, hoê i rotopu i te mau tamaiti hui arii, i rotopu i te mau taata huimana ta te emepera ra o Nebukanesa i rave mai i Ierusalema, to ratou fenua tumu, e ta ˈna i hopoi mai i Babulonia, ia horoahia ˈtu na ratou te hoê haapiiraa ia tavini ratou i te arii. Tera noa hoi te ravea hopea maitai aˈe. Parau atura te arii vahine i te arii ra, ia pii atu ia Daniela, ta ˈna i faaite atu te hoê taata tei î i te paari, te hoê taata aravihi no te tatara e no te faaite i te auraa o te mau tapao (Daniela 5:10-12). Mea ohie roa na tatou ia faahohoˈa i te maniania ore i itehia i roto i te piha o te oroa tamaaraa i to Daniela faaiteraa mai i te auraa o te mau parau huna i te emepera o te Toru o te Puai rahi o te ao nei no te aamu bibilia e i ta ˈna mau tia mana, ia au i te aniraa a te arii Belesazara.
9 Ua parau atura Daniela: “I reira taua pae rima ra i te hopoiraahia mai; e teie taua parau i papaihia maira. Teie taua parau i papaihia ra, MENE, MENE, TEKELE, UPHARISINE. Teie te auraa i taua mau parau nei: MENE; Ua taiohia e te Atua to basileia, e ua faaoti. TEKELE; Ua faitohia oe i te faito, e aita i tia. PERESEa: Ua tufahia to oe ra basileia, e ua horoahia i to Medai e to Peresia.” (Daniela 5:24-28). Ua haavahavaha roa te arii Belesazara, ta ˈna mau tia mana e ta ratou mau vahine i te haamoriraa i te Atua a Daniela. Mea nafea hoi? Na roto i te inuraa i te uaina i roto i te mau farii auro i ravehia mai i roto i te hiero a Iehova i Ierusalema, i te taime a haamouhia ˈi taua oire moˈa ra i te matahiti 607 hou to tatou anotau. Ua riro ïa te reira ei faainoraa haavahavaha hau atu ia anoihia i te ino i rave-aˈena-hia e Babulonia. — Daniela 5:3, 4, 23.
Ua tomo atura o Kuro, te taata haru fenua i tohuhia mai, i roto i te oire
10, 11. a) Ia au i ta Iehova i tohu mai, na vai e haru mai ia Babulonia, e na roto i tei hea mau parau to Isaia faataa-atea-raa mai i taua haruraa ra? b) Mea nafea to Iehova raveraa ia tupu taua parau tohu nei e ia faautuahia o Belesazara e ta ˈna mau tia mana ma te tano mau hoi?
10 I roto i te Isaia 45:1-3, ua faaite atea mai te Atua Teitei e: “Te na ô nei Iehova i tei faatahinuhia e ana ra, ia Kuro, tei tapea-hua-hia e au tana rima atau ra, ia vi te mau fenua ia ˈu i mua i tana aro, e ia tatara i te tatia i te tauupu o te mau arii ra: e ia heheu vai i te mau uputa i mua ia ˈna; e ore hoi te mau uputa e opanihia. O vau iho te haere na mua ia oe, e na ˈu e faatitiaifaro i te mau vahi piˈo, e vavahihia e au te mau opani veo ra, e tâpûhia e au te mau teˈa auri e mairi atu i raro. E horoa ˈtu vau ia oe i te mau taoˈa no te pouri, i te mau taoˈa i huna-roa-hia i raro i te vahi moe ra: ia ite hoi oe e, o vau o Iehova; o tei mairi i to iˈoa ia oe ra.”
11 Ia tupu taua parau tohu nei, ua horoa aˈera o Iehova ia Kuro te Peresia i te manaˈo ra e faatioi i te mau pape o Eupharate e a tahe atu ai i roto i te hoê roto fatata mai. I te taime te anavai e marô ai, pou aˈera te mau faehau a Kuro i roto i te tahora e, i te mea e ua poiri roa, haere ihora ratou e tae roa ˈtura i ropu i te oire. I te mea e aita na opani e piti e matara ra i nia i te hiti anavai i opanihia, paiuma aˈera ratou i nia i te mau pae pape, haru ihora i te mau taata tiai e tomo atura i roto i te piha o te oroa. E hopearaa riaria tei roohia i te oroa tamaraa a Belesazara e ua riro hoi te reira ei faautuaraa tano mau i nia i taua arii ra e ta ˈna mau tia mana. Aita anei ratou i faaite i te hoê haerea faaino e te haavahavaha i mua i te “Fatu o te mau raˈi ra” na roto i to ratou haaviiviiraa i te mau farii a te hiero i eiâhia na i roto i te fare moˈa a Iehova, i Ierusalema?
12. a) I te mea e ua tohu mai o Isaia e na Kuro e haru mai ia Babulonia, no te aha ïa o Daniela i horoa ai i te hopoia no te haruraa i taua oire ra ia Dariu te Medai? b) Te faahohoˈa ra o Dariu e to ˈna turu, o Kuro te Peresia, ia vai?
12 Ia au i te irava hopea o te pene 5 Da 5:31 no te parau tohu a Daniela, i muri aˈe i to te arii Belesazara taparahiraahia, “riro atura taua basileia ra ia Dariu i Medai, ua tae i te ono ahuru e ma piti i to ˈna ra matahiti”. I te mea e mea paari aˈe o Dariu ia Kuro te Peresia, ua horoa ˈtura o Daniela i te hopoia no te haruraa ia Babulonia na teie arii medai tei faatere na i nia i te Hau emepera medai-peresia mai te matahiti 539 e tae atu i te matahiti 537 hou to tatou anotau. Te faahohoˈa mau ra teie arii i te Atua ra o Iehova. Te faahohoˈa ra ïa o Kuro te Peresia, te turu o Dariu, ia Iesu Mesia, ta Iehova e faaohipa ma te hanahana rahi no te upootia ˈtu e no te haamou ia “Babulonia Rahi”, te amuiraa o te mau haapaoraa hape atoa o te ao nei.
13, 14. Ma te feaa ore, i nia i te aha to Daniela hutiraa mai i te ara-maite-raa o Kuro te Peresia, e te haamata ra te buka a Ezera, tei papaihia hoi i muri aˈe i te hopoi-tîtî-raahia, na roto i tei hea mau parau?
13 I to Kuro parahiraa i nia i te terono o te Hau emepera medai-peresia, i te matahiti 537 hou to tatou anotau, peneiaˈe ua huti mau â te peropheta Daniela i to ˈna ara-maite-raa i nia i te parau tohu no nia ia ˈna, parau tohu tei papaihia i roto i te Isaia 45. Teie te omuaraa o te buka a Ezera, tei papaihia i muri aˈe i te faatîtîraa:
14 “Tae aˈera i te matahiti matamua o te arii o Peresia ra o Kuro, ia tupu te parau a Iehova i te vaha o Ieremia [no nia i te roaraa o te faatîtîraa, oia hoi 70 matahiti (Ieremia 25:12; 29:10, 14)], i faaaraara ˈtu ai Iehova i te aau o te arii o Peresia ra o Kuro, ia papai i te tahi ture papai, e ua faaite haere e ati noa ˈˈe to ˈna fenua, na ô atura, Te na ô maira te arii o Peresia o Kuro, Ua horoa mai te Atua no te raˈi o Iehova, i te mau basileia atoa o te ao nei; e ua poroi mai ia ˈu e faatia i te tahi hiero no ˈna i Ierusalema, i Iuda ra. O vai to ˈna taata i toe i roto ia outou na? Ia ite mai hoi to ˈna Atua ia ˈna, e haere oia i Ierusalema, i Iuda ra, a faatia ˈi i te hiero no te Atua o Iseraela no Iehova: o te Atua mau ïa, ei Ierusalema oia e haamorihia ˈi.” — Ezera 1:1-3.
E faahuˈahuˈa te Kuro Rahi ia “Babulonia Rahi”
15. a) Anafea te taata e faahohoˈahia e Kuro, i haamata ˈi i te faatere mai? b) Eaha te tiaraa aueue ore ta te mau Ite no Iehova e rave nei i mua i te mau opuaraa ino atoa e faaineinehia nei e te mau Hau amui, e no te aha?
15 I to tatou nei anotau, ua haamata te taata i faahohoˈahia e Kuro Rahi o te tau tahito, i te faatere mai ei arii i te matahiti 1914, i te hoperaa “to te Etene anotau”, mai ta Iesu iho i tohu mai i roto i te Luka 21:24. Ma te ore roa ˈtu e tâuˈa i teie ohipa faufaa roa no te ao atoa nei, ua faahiti ihora te mau nunaa melo no te O.N.U. i te matahiti 1986 ei Matahiti no te hau i roto i te ao atoa nei. Eita râ te mau Ite no Iehova e vaiiho ia ratou ia haavarehia na roto i ta ratou ohipa. Ia faahiti-mau-hia te parau ra “E hau e aita e ino” i tohuhia mai, eita ratou e tahoê atu i te mau turu politita e te mau hoa o “Babulonia Rahi”. Eita ratou e haapopou i taua faaiteraa faufaa ra i faahitihia i teie taio mahana i mairi roa hoi i roto i te aamu o te mau nunaa. Eita ratou e turu atu i te hoê noa ˈˈe opuaraa ino e faanahohia e te mau Hau amui aore ra te hoê faanahonahoraa ê atu e opua nei e haamau i te hau (Isaia 8:12). Tera râ, e rave faahou mai ratou i te mau parau i papaihia i roto i te Isaia 8:20: “E i te ture, e i te faaiteraa parau e imi ai. Ia ore ratou ia parau, mai tei au i teie parau, eita ïa e noaa ia ratou te maramarama o te poipoi.” (V.C.J.S.) Ma te faataa i te tumu no to ratou tiaraa aueue ore, e parau atu ratou e: “E riro hoi te Atua ia matou nei.” (Isaia 8:10). E haapapu mai taua mau parau etaeta ra e aita roa ˈtu ta te Atua ra o Iehova e tuhaa i roto i te mau ravea politita e ravehia nei e te mau nunaa no te haamau i ‘te hau e te ino ore’, area râ, te haava nei oia ia ratou ma te papu maitai.
16. Mea nafea te parau tohu i papaihia i roto i te Apokalupo 17:16, 17 e hope roa ˈi i te tupu, e eaha ˈtura ïa te huru o te mau tavini o Iehova?
16 Na roto i to ˈna ohiparaa mai ma te aravihi na roto i te arai a to ˈna Kuro Rahi, e tuu atu o Iehova i roto i te mafatu e te feruriraa o te mau raatira politita no teie nei ao, ia fariu tia ˈtu ratou i nia ia “Babulonia Rahi”, te amuiraa o te mau haapaoraa hape atoa o te ao nei. Ma te ohipa mai te hoê puaa oviri tahae ra e tara to ˈna, e patia ˈtu ratou ia ˈna e e pohe roa ˈtu oia. E hope roa te parau tohu i papaihia i roto i te Apokalupo 17 i te tupu e e oaoa roa ïa te mau Ite no Iehova i nia i te fenua atoa nei. — Apokalupo 17:16, 17; 19:1-3.
E tamau tatou i te atuatu i te mau taairaa maitai e o Iehova
17. Noa ˈtu e aita ta te mau Ite no Iehova e tuhaa i roto ia “Babulonia Rahi”, eaha te ohipa ta te mau tia mana o te ao nei e rave?
17 I muri aˈe, noa ˈtu e aita ta te mau Ite no Iehova e tuhaa i roto ia “Babulonia Rahi”, ua matau-maitai-hia râ ratou no te mea e faaite papu ratou i ta ˈna mau ohipa, e noa ˈtu e te faataa ê roa nei ratou i te mau ohipa politita o te ao nei, e fariu tia atoa ˈtu te mau melo politita aita hoi ta ratou e tiaturiraa i te pae no te faaroo, i nia ia ratou. No to ratou hinaaro e ohipa mai te mau faatere haavî ra te huru, e raatira i nia i te mau tuhaa atoa o te totaiete taata nei, e aro atu ratou i te mau ite haapao maitai no te Atua teitei ra, te Tumu no te mau faatereraa parau-tia atoa.
18. Eaha te ohipa faahiahia mau e tei hau roa ˈtu hoi i te riaria i tupu i te diluvi no te tau o Noa ra, ta Iehova e faatupu mai?
18 I reira mau te Arii Mana Hope no te raˈi e te fenua nei e ohipa mai ai ia ite e ia taa te feia haapohe ia “Babulonia Rahi” e, te Atua e mau ite to ˈna i te XXraa o te senekele, e Atua ora ïa e te mana-hope — te hoê Atua e tiaraa to ˈna no te titau i te mau taata ta ˈna i poiete ia haamori ia ˈna ma te mafatu taatoa e ma te tahoê i raro nei, i nia i to ˈna taahiraa avae oia hoi te fenua nei. E ohipa mai oia ma te riaria e inaha, e mamû roa ïa ta ˈna mau ite no to ratou maere — e ite mata ˈtu hoi ratou i te aroraa eita râ ratou e aro atoa ˈtu. E tamaˈi atu oia i te hoê aroraa aita i itehia aˈenei, e te hanahana hoi, e e upootia mai oia i taua aroraa ra (Apokalupo 16:14, 16; 19:19-21). E tapao taua ohipa ra i te hopea o te amuiraa ino o te mau mea nei e raatirahia ra e te Diabolo, e e rahi aˈe te hanahana o taua ohipa ra i to te diluvi rahi o te tau o Noa ra.
19. O vai te mau ite o te nehenehe e haapapu mai e ua faaite roa mai o Iehova iho ia ˈna mai te Mana Hope no te ao atoa nei, e eaha ïa ta te reira e faaite mai?
19 Ua faaohipa na o Iehova i te tahi mau ite no te haapapu e ua haamou oia i te hoê ao tahito na roto i te hoê diluvi tei haaparemo i te mau taata atoa tei faaea na i rapaeau mai i te araka. Oia atoa, i nia i te hoê faito rahi aˈe, e faaohipa oia i te mau ite i nia i te fenua nei no te parau e ua faaite roa mai oia ia ˈna iho mai te Arii o te ao taatoa nei (Petero 2, 3:6, 7, 13, 14). Ta ˈna mau ite, o te feia ïa o te tiaturi nei ia ˈna no te haamau i te hau e te ino ore, i roto i teie nei ao tei faautuahia. Auê ïa outou i te oaoa e mai te peu e tei roto outou i taua mau ite ra o te paruruhia na roto i te hoê semeio. I reira e haapapu-roa-hia ˈi e no ô mai to outou hau e to outou ino ore i te Atua ra o Iehova eiaha râ no ô mai i te tahi taatiraa, aore ra opuaraa ino, i ravehia e te mau puai politita no te amuiraa o te mau mea nei e raatirahia nei e te Diabolo.
20. Eaha te huru o Iehova i muri aˈe i taua aroraa ra, e eaha ˈtura ta tatou e opua mau nei i te rave?
20 Ia hope taua tamaˈi ra, e rahi atu â te hanahana o te Atua ra o Iehova. E faˈihia ïa oia mai te Atua e tia ia haamorihia e ia tavinihia — te Atua o te mau atua atoa, no ˈna noa iho hoi teie mau parau a te papai salamo i faauruahia e te Atua e: “Te vai ra oe, e te Atua, mai tahito mai â e a muri noa ˈtu!” (Salamo 90:2). Ma te hoê huru haamauruuru o te rahi noa ˈtura, e tamau â tatou i te tiaturi i te Atua ra o Iehova e e taai noa ˈtu tatou ia ˈna na roto i te arai o te Kuro Rahi ra, o Iesu Mesia.
[Nota i raro i te api]
a Mai te peu e mea rahi e parauhia ïa “Upharisine”, e mai te peu e hoê anaˈe ra e parauhia ïa “Perese” e teie hoi te auraa “amahamaha”.
Te haamanaˈo ra anei outou?
◻ Eaha te mea ta “Babulonia Rahi” e ore e ite nei?
◻ Eaha ta te hopea riaria o te oroa tamaaraa a Belesazara e faahohoˈa maira?
◻ Na vai e upootia mai i nia ia “Babulonia Rahi”?
◻ Eaha te tiaraa o te mau Ite no Iehova i mua i te mau huru opuaraa ino atoa e ravehia e te mau Hau amui?
◻ No te aha te feia atoa e tiaturi nei ia Iehova no te faatupu i te hau e te ino ore e oaoa ˈi?
[Hohoˈa i te api 18]
Te faataa ra o Daniela i te parau huna i papaihia i nia i te patu mai te hoê poroi faautuaraa no te Hau emepera babulonia.