Ua paraparau Iehova ia Samuela

E piti tamaiti ta Eli, te tahuˈa rahi. Ua tavini raua ei tahuˈa i te sekene. O Hophini e o Phinehasa ïa to raua iˈoa. Aita raua i pee i te mau ture a Iehova e ua rave ino raua i te nunaa. Ia pûpû to Iseraela i te mau tusia na Iehova, e rave Hophini e Phinehasa i te iˈo maitai roa ˈˈe na raua. Ua ite ia Eli eaha ta ta ˈna na tamaiti i rave. Aita râ Eli i aˈo ia raua. E vaiiho anei Iehova ia tupu noa te reira?

Noa ˈtu mea apî aˈe Samuela ia Hophini e ia Phinehasa, aita oia i pee i to raua hiˈoraa. Ua au roa Iehova ia Samuela. I te hoê po, a taoto ai Samuela, ua faaroo oia i te hoê reo o tei pii ia ˈna. Tia ˈtura oia, horo atura oia ia Eli ra ma te parau: ‘Teie au!’ Na ô râ Eli: ‘Aita vau i pii ia oe. A haere e taoto.’ Hoˈi atura Samuela i roto i to ˈna piha. Ua tupu faahou â te reira. A faaroo ai Samuela i te reo i te toruraa o te taime, ua ite ia Eli e o Iehova tei pii ia Samuela. Ua parau Eli ia Samuela ia faaroo faahou oia i te reo, e mea tia ia parau: ‘A faaite mai, Iehova. Te faaroo ra to tavini.’

Hoˈi atura Samuela i roto i to ˈna piha. E ua faaroo oia: ‘Samuela! Samuela!’ Pahono atura oia: ‘A faaite mai na, te faaroo ra to tavini.’ Ua parau atura Iehova ia ˈna: ‘A parau ia Eli e e faautua vau ia ˈna e i to ˈna utuafare. Ua ite oia e te rave ra ta ˈna na tamaiti i te mau ohipa ino i roto i ta ˈu sekene. Aita râ oia i aˈo ia raua.’ I te poipoi i muri iho, ua tatara Samuela i te mau opani o te sekene mai ta ˈna i matau i te rave. Ua riaria oia i te faaite i te tahuˈa rahi eaha ta Iehova i parau ia ˈna. Ua pii râ Eli ia ˈna e ua ani atu: ‘Samuela, eaha ta Iehova i parau ia oe? Faaite mai na.’ Ua faaite atura Samuela pauroa i ta Iehova i parau.

A paari ai Samuela, ua tamau Iehova i te turu ia ˈna. I to ˈna fenua, ua ite te mau Iseraela atoa e ua maiti Iehova ia Samuela no te riro ei peropheta e ei tavana.