Maoti Iehova i puai mai ai Samasona

E rave rahi taata no Iseraela tei haamori faahou i te mau idolo. Ua vaiiho ïa Iehova i to Philiseti ia faatere i to Iseraela fenua. Tera râ, i vai na vetahi mau taata no Iseraela tei here ia Iehova. O Manoa ïa, hoê o ratou. Aita e tamarii ta Manoa e ta ta ˈna vahine. I te hoê mahana, ua tono Iehova i te hoê melahi no te farerei i te vahine a Manoa. Ua parau te melahi ia ˈna: ‘E fanau oe i te hoê tamaiti. E faaora oia i to Iseraela i te rima o to Philiseti. E riro oia ei Nazira.’ Ua ite anei oe o vai te mau Nazira? E mau tavini taa ê ïa a Iehova. Aita te mau Nazira i faatiahia ia tâpû i to ratou rouru.

I muri iho, ua fanau te vahine a Manoa i te hoê tamaiti, o Samasona to ˈna iˈoa. A paari ai Samasona, ua riro oia ei taata puai roa maoti Iehova. Ua nehenehe oia e haapohe i te hoê liona ma te faaohipa noa i to ˈna rima. I te tahi taime, ua haapohe o Samasona anaˈe e 30 Philiseti. Ua riri roa to Philiseti ia ˈna e ua tamau ratou i te imi i te ravea no te haapohe ia ˈna. I te hoê po, a taoto ai Samasona i Gaza, ua haere ratou i te uputa o te oire e ua tiai ratou i te poipoi no te haapohe ia Samasona. Tera râ, i te tuiraa po, ua tia Samasona, ua haere oia i te uputa o te oire e ua tatara oia i te opani mai te patu ra. Ua amo oia i te opani i nia i to ˈna tapono e tae roa ˈtu i nia roa i te mouˈa i pihai iho ia Heberona!

muri aˈe, ua haere to Philiseti e farerei i te hoa vahine o Samasona, o Delila to ˈna iˈoa. Ua na ô ratou: ‘E aufau matou taitahi ia oe e tausani moni ario. Ia faaite mai râ oe no te aha mea puai roa o Samasona. Te hinaaro nei matou e haru ia ˈna no te tuu ia ˈna i roto i te fare tapearaa.’ Ua hinaaro Delila i te moni. Ua farii ïa oia i te faaauraa. I te omuaraa, aita Samasona i parau ia ˈna nohea mai to ˈna puai. Tera râ, ua mârô Delila tae roa ˈtu i te taime i parau ai Samasona i ta ˈna i ore roa ˈtu i faaite aˈenei. Ua parau atu Samasona: ‘Aita roa ˈtu to ˈu rouru i tâpûhia no te mea e Nazira vau. Ia tâpûhia to ˈu rouru, e ere au i to ˈu puai.’ Ua hape roa Samasona i te faaiteraa ˈtu i te reira, e ere anei?

Oioi Delila i te parau i to Philiseti: ‘Ua ite au nohea mai to ˈna puai!’ Ua faataoto oia ia Samasona i nia i to ˈna turi e i muri iho ua ani oia ia tâpûhia to Samasona rouru. Tuô atura Delila: ‘Samasona, era ˈtu to Philiseti!’ Ara ˈtura Samasona e ua ere oia i to ˈna puai. Ua rave atura to Philiseti ia Samasona e ua haamatapo ratou ia ˈna hou a tuu ai ia ˈna i te fare tapearaa.

I te hoê mahana, ua putuputu mai e tausani Philiseti i te hiero o to ratou atua o Dagona. Ua tuô ratou: ‘Maoti to matou atua, ua tapeahia Samasona! Afai mai ia Samasona! E faaooo anaˈe ia ˈna.’ Ua tuu ratou ia Samasona i ropu i na pou e piti e ua faaooo ratou ia ˈna. Ua tupu maitai te rouru o Samasona e ua pure oia: ‘E Iehova e, a horoa faahou mai na i te puai.’ Ua tapea oia i te mau pou o te hiero e ua turai oia i te reira ma to ˈna puai atoa. Ua parari te hiero taatoa e ua topa te reira i nia i te mau taata atoa i roto i te hiero. Ua pohe ratou pauroa, oia atoa o Samasona.