Ta Iepheta i euhe

Ua faarue faahou to Iseraela ia Iehova e ua haamata ratou i te haamori i te mau atua hape. Ua aro te feia no Amona ia Iseraela e ua pau to Iseraela. Aita roa ˈtu to Iseraela mau atua hape i tauturu aˈe ia ratou. Ua mauiui to Iseraela e rave rahi matahiti i te maoro. Ua parau atura ratou ia Iehova: ‘Ua hara matou. A faaora mai na ia matou i te rima o to matou mau enemi.’ Ua haaparari to Iseraela i ta ratou mau idolo e ua haamata ratou i te haamori faahou ia Iehova. Aita Iehova i hinaaro ia tamau ratou i te mauiui.

Ua maitihia te hoê faehau, o Iepheta to ˈna iˈoa, no te aratai i te nunaa no te aro i te feia no Amona. Ua parau Iepheta ia Iehova: ‘A tauturu mai ia matou ia upootia i roto i teie aroraa. E ia hoˈi au i te fare, e horoa ˈtu vau ia oe i te taata matamua o te haere mai i rapae i te fare no te farerei ia ˈu.’ Ua faaroo Iehova i te pure a Iepheta e ua tauturu oia ia ˈna ia upootia i roto i teie aroraa.

I to Iepheta hoˈiraa i te fare, te taata matamua tei haere e farerei ia ˈna, o ta ˈna ïa tamahine otahi. Ua ori tera tamahine ma te tupaipai i te tariparau. Eaha ta Iepheta i rave? Ua haamanaˈo oia i ta ˈna i euhe e ua parau oia: ‘Auê, ta ˈu tamahine e! Ua mauiui roa vau. Ua euhe au ia Iehova. E no te tapea i te reira, e mea tia ia tono vau ia oe i te sekene i Silo no te tavini atu.’ Ua parau râ ta ˈna tamahine: ‘Papa e, ua euhe oe ia Iehova e e mea tia ia tapea i tera euhe. Ta ˈu noa e ani, ia haere au e to ˈu mau hoa tamahine i te mouˈa e piti avaˈe i te maoro. I muri iho, e haere au i te sekene.’ Ua tavini te tamahine a Iepheta i te sekene ma te taiva ore i te roaraa o to ˈna oraraa. I te matahiti taitahi, ua haere to ˈna mau hoa e farerei ia ˈna i Silo.