Ua oaoa to ˈna papa e Iehova ia ˈna

I to oe manaˈo, o vai te tamahine i nia i te hohoˈa?— E tamahine o ˈna na Iepheta. Aita te Bibilia e faaite ra i to ˈna iˈoa, ua ite râ tatou e ua oaoa to ˈna metua tane e Iehova ia ˈna. E hiˈo anaˈe o vai o ˈna, na reira atoa to ˈna papa Iepheta.

E taata maitai Iepheta, i faaherehere na hoi oia i te taime no te haapii i ta ˈna tamahine o vai Iehova. E taata puai e e aratai maitai atoa. No reira to Iseraela i ani atu ai ia aratai ia ratou i te tamaˈi no te upootia i te mau enemi o te nunaa.

Ua pure Iepheta ia Iehova no te upootia e ua parau e e horoa ˈtu oia i te taata matamua e haere mai i rapae i to ˈna fare ia hoˈi atu oia. No te toea o to ˈna oraraa, e ora e e rave tera taata i te ohipa i te sekene a te Atua. Na mua ˈˈe, e vahi tera e haamori ai to te nunaa ia Iehova. Eaha ˈtura tei tupu no Iepheta? Ua upootia iho â o ˈna. A ho ˈi ai i te fare, o vai te taata matamua tei farii ia ˈna?—

O ta ˈna tamahine! Hoê anaˈe ta ˈna tamarii e i teie nei, e mea titauhia ia vaiiho ia ˈna ia haere. Ua oto Iepheta, tera râ e mea tia ia tapea o ˈna i ta ˈna parau. Oioi aˈera ta ˈna tamahine i te na ô: ‘Papa, mai ta to vaha i parau ia Iehova, ia tapea iho â oe i ta oe parau.’

Ua oto atoa te tamahine a Iepheta no te mea i te sekene, eita ta ˈna e nehenehe e faaipoipo e e fanau i te tamarii. Ua hinaaro roa râ oia e faatupu i te parau a to ˈna metua tane e ia oaoa Iehova. Tera hoi te mea faufaa aˈe no ˈna. Ua faarue aˈera o ˈna i te fare o to ˈna papa e ua haere i te sekene no te toea o to ˈna oraraa.

I to oe manaˈo, ua oaoa anei to ˈna papa e Iehova ia ˈna?— E! Ia faaroo e ia here oe ia Iehova mai te tamahine a Iepheta, e oaoa to mau metua e hau roa ˈtu â, Iehova.