Ua faaoti Mose i te haamori ia Iehova

I Aiphiti, ua riro te utuafare o Iakoba ei nunaa Iseraela. I muri aˈe i te poheraa o Iakoba e o Iosepha, ua haamata te hoê Pharao apî i te faatere i te fenua. Ua mǎtaˈu oia e e puai aˈe te nunaa Iseraela i te nunaa Aiphiti. Faatîtî atura tera Pharao i te ati Iseraela. Ua faahepo oia ia ratou ia hamani i te ofai araea e ia ohipa i roto i te mau faaapu. Tera râ, hau atu â to Aiphiti i te faateimaha i te ohipa a to Iseraela, hau atu â te nunaa Iseraela i te rahi mai. Aita Pharao i au i te reira. Ua faaue oia ia haapohe pauroa te mau aiû tamaroa no Iseraela. Papu maitai ua riaria rahi te ati Iseraela, e ere anei?

Ua fanau te hoê vahine Iseraela, o Iokebeda to ˈna iˈoa, i te hoê tamaroa nehenehe mau. No te paruru ia ˈna, ua tuu oia i te aiû i roto i te hoê ete e ua huna oia i te reira i roto i te aihere i te anavai Nile. Aita o Miriama, te tuahine o te aiû, i atea roa i te ete. Ua hinaaro oia e ite eaha te tupu.

Ua haere te tamahine a Pharao e hopu i roto i te anavai e ua ite oia i te ete. I roto, ua ite oia i te aiû e taˈi ra e ua mauiui roa oia no ˈna. Ani atura Miriama: ‘Haere anei au e tii no oe i te hoê vahine o te haapao i te tamaroa?’ Parau atura te tamahine a Pharao ia na reira. Haere atura Miriama e tii ia Iokebeda, to ˈna iho metua vahine. Na ô atura te tamahine a Pharao ia Iokebeda: ‘A rave i te aiû, a haapao ia ˈna no ˈu e e aufau vau ia oe.’

I to te tamaroa paariraa mai, ua faahoˈi Iokebeda ia ˈna i te tamahine a Pharao ra. O Mose te iˈoa ta te tamahine a Pharao i maiti no ˈna e ua haapao oia ia ˈna mai ta ˈna iho â tamaiti. Ua paari Mose ei tamaroa na Pharao. Ua nehenehe ïa oia e rave pauroa ta ˈna i hinaaro. Aita roa ˈtu râ Mose i haamoˈe ia Iehova. Ua ite oia e no Iseraela oia, eiaha râ no Aiphiti. E ua faaoti oia i te tavini ia Iehova.

E 40 matahiti to ˈna i teie nei. Ua faaoti Mose i te tauturu i to ˈna nunaa. A ite ai oia i te hoê taata no Aiphiti i te taparahiraa i te hoê tîtî Iseraela, tairi atura Mose i te taata no Aiphiti e pohe atura taua taata ra. Huna ˈtura Mose i te tino pohe i roto i te one. A ite ai Pharao i tei tupu, ua tamata oia i te haapohe ia Mose. Ua horo ê râ Mose no te haere i te fenua o Midiana. E ua haapao Iehova ia ˈna i tera fenua.