Te raau taratara tei ura mai

Ua ora Mose i Midiana e 40 matahiti i te maoro. Ua faaipoipohia e ua tamariihia oia. I te hoê mahana, a haapao ai oia i ta ˈna mau mamoe i pihai iho i te mouˈa Sinai, ua ite oia i te hoê ohipa maere mau. Ua ura te raau taratara e aita roa ˈtu te reira i pau i te auahi! Haere atura Mose i pihai iho i te reira no te ite eaha te tupu ra. Faaroo atura oia i te hoê reo no ǒ mai i te raau taratara o tei parau: ‘Mose! Eiaha e tapiri roa mai. A tatara i to oe na tiaa no te mea tei te hoê vahi moˈa oe.’ O Iehova tei paraparau ia ˈna maoti te hoê melahi.

Ua riaria Mose, no reira oia i tapoˈi ai i to ˈna hohoˈa mata. Ua na ô te reo: ‘Ua ite au e te mauiui ra to Iseraela. E faatiamâ vau ia ratou i te faatîtîraa a to Aiphiti e e aratai au ia ratou i te hoê fenua maitai. Na oe e aratai i to ˈu nunaa i rapae ia Aiphiti.’ Ua maere roa paha Mose, e ere anei?

Ua ani Mose: ‘Eaha ta ˈu e pahono ia ani mai te nunaa o vai tei tono ia ˈu?’ Na ô atura te Atua: ‘A parau atu e na Iehova i tono ia oe. Oia te Atua o Aberahama, te Atua o Isaaka e te Atua o Iakoba.’ Parau atura Mose: ‘Nafea ïa vau ia ore te nunaa e faaroo ia ˈu?’ Ua horoa Iehova ia Mose i te haapapuraa e e tauturu iho â oia ia ˈna. Ua parau oia ia Mose ia taora i ta ˈna raau i raro. Riro atura te raau ei ophi! A tapea ˈi Mose i te aero o te ophi, riro faahou atura te reira ei raau. Ua parau Iehova: ‘A faatupu ai oe i tera semeio, e haapapu te reira e na ˈu iho â i tono ia oe.’

Parau atura Mose: ‘E ere au i te taata ite i te paraparau.’ Fafau atura Iehova ia ˈna: ‘Na ˈu e faaite ia oe eaha ta oe e parau atu. E tono atoa vau i to oe taeae o Aarona no te tauturu ia oe.’ A ite ai e e tauturu Iehova ia ˈna, rave atura Mose i ta ˈna vahine e i ta ˈna mau tamarii no te hoˈi i Aiphiti.