O vai o Ioba?

I te fenua o Uza, i ora na te hoê taata o tei haamori ia Iehova. O Ioba to ˈna iˈoa. E taata moni roa oia e e utuafare rahi to ˈna. E taata maitai oia o tei tauturu i te feia veve, te mau vahine ua pohe ta ratou tane e te mau tamarii aita faahou to ratou na metua. Inaha ua rave noa Ioba i te mea tia, te auraa ra e eita roa ˈtu oia e roohia i te fifi?

Aita Ioba i ite aˈe e te hiˈo noa ra Satani te Diabolo ia ˈna. Parau atura Iehova ia Satani: ‘Ua ite anei oe i ta ˈu tavini o Ioba? Aita ˈtu taata mai ia ˈna i nia i te fenua nei. Te faaroo noa ra oia ia ˈu e te rave noa ra oia i te mea tia.’ Na ô atura Satani: ‘E faaroo iho â Ioba ia oe, inaha te paruru ra e te haamaitai ra oe ia ˈna. Te horoa nei oe ia ˈna i te fenua e i te mau animara. A tatara na râ pauroa i te reira, e faaea oia i te haamori ia oe.’ Pahono atura Iehova: ‘E nehenehe oe e tamata i te faaroo o Ioba, eiaha râ e haapohe ia ˈna.’ No te aha Iehova i vaiiho ai ia Satani ia tamata i to Ioba faaroo? No te mea ua tiaturi papu Iehova e eita Ioba e faarue ia ˈna.

Haamata ˈtura Satani i te tamata i to Ioba faaroo ma te faatupu e rave rau ati. Na mua roa, ua tono oia i te hoê pǔpǔ taata no Sabea no te eiâ i te mau puaatoro e asini a Ioba. I muri iho, ua pohe pauroa te mau mamoe a Ioba na roto i te auahi. Ua eiâ te tahi atu pǔpǔ taata no Kaladaio i ta ˈna mau kamela. Ua haapohehia te mau tavini o tei haapao i taua mau animara ra. I muri iho, ua faaruru Ioba i te ati rahi roa ˈˈe, oia hoi te pohe o ta ˈna mau tamarii atoa. Ua topa i nia ia ratou te fare i reira ratou i arearea ˈi. Ua mauiui roa Ioba. Aita râ oia i faaea i te haamori ia Iehova.

Ua hinaaro Satani ia mauiui rahi atu â Ioba. No reira i î roa ˈi to Ioba tino i te fêfê. Ua mauiui rahi Ioba. Aita roa ˈtu oia i ite no te aha i tupu ai tera mau ohipa. Ua tamau râ oia i te haamori ia Iehova. Ua ite te Atua i te mau mea atoa tei tupu e ua oaoa roa oia ia Ioba.

I muri iho, ua tono Satani e toru taata no te tamata i to Ioba faaroo. Ua parau ratou ia ˈna: ‘Ua hara rahi oe e ua tamata oe i te huna i te reira. Te faautua ra te Atua ia oe.’ Na ô atura Ioba: ‘Aita roa ˈtu vau i rave i te ino.’ Ua haamata râ oia i te manaˈo e na Iehova i faatupu i ta ˈna mau fifi. Ua faaite atoa oia e e ere i te mea tia ta te Atua i rave i nia ia ˈna.

Te vai ra te hoê taata apî tei faaroo i te aparauraa. O Elihu to ˈna iˈoa. Parau atura oia: ‘Mea hape pauroa ta outou i parau. Mea maitai iho â te Atua. Eita roa ˈtu oia e rave i te ino. E nehenehe oia e ite i te mau mea atoa e e tauturu i te taata ia faaruru i to ratou mau fifi.’

Paraparau atura Iehova ia Ioba: ‘Teihea roa oe a poiete ai au i te raˈi e te fenua? No te aha oe i parau ai e e ere au i te mea tia? Paraparau noa ra oe, aita râ oe e taa nei no te aha teie mau ohipa e tupu ra.’ Ua farii Ioba i ta ˈna hape. Parau atura oia: ‘Ua hape au. Ua faarooroo vau no nia ia oe, i teie nei râ ua ite maitai au o vai oe. E nehenehe oe e rave i te mau ohipa atoa. Te tatarahapa nei au no ta ˈu i parau.’

I te otiraa te tamataraa, ua maitai faahou â Ioba maoti Iehova. Ua horoa ˈtoa Iehova ia ˈna hau atu â mau taoˈa. Ua ora maoro Ioba e ua oaoa oia. Ua haamaitai Iehova ia Ioba no te mea ua faaroo oia ia ˈna noa ˈtu mea fifi roa te mau tupuraa ta ˈna i faaruru. E pee atoa anei oe i to Ioba hiˈoraa e e tamau anei oe i te haamori ia Iehova, noa ˈtu eaha te tupu?