TUHAA PAE

A hoˈi mai i “te tiai e te tiaau o to outou ora”

Ua farerei anei oe hoê aore ra hau atu â tupuraa i faataahia i roto i teie buka rairai? Mai te peu e e, e ere o oe anaˈe. E rave rahi tavini taiva ore a te Atua i te tau tahito e i teie mahana o te faaruru i te hoê â tupuraa. Ua fanaˈo ratou i ta Iehova tauturu no te faaruru i te mau tupuraa, e nehenehe atoa oe e fanaˈo i te reira.

“Ua taa ˈtu râ ia ˈu e aita roa ˈtu Iehova i faarue ia ˈu, ua titauhia ia ˈu ia imi i to ˈu eˈa no te hoˈi mai ia ˈna ra”

A TIATURI, tei pihaiiho Iehova ia oe ia hoˈi mai oe ia ˈna ra. E tauturu oia ia oe ia faaruru i te ahoaho, ia ore e inoino faahou, e ia ite i te hau o te feruriraa e o te aau maoti te hoê manaˈo haava mâ. I muri iho, e itoito faahou mai oe no te tavini ia Iehova e te mau hoa haamori. E au to oe tupuraa i to te tahi Kerisetiano i te senekele matamua o ta te aposetolo Petero i papai: “Mai te mamoe ra hoi outou tei atea ê, i teie nei râ ua hoˈi mai outou i te tiai e te tiaau o to outou ora.”—Petero 1, 2:25.

O te hoˈiraa ia Iehova ra te ravea maitai roa ˈˈe o ta oe e nehenehe e rave. No te aha? No te mea e faaoaoa oe i te aau o Iehova. (Maseli 27:11) Mai ta oe i ite, e huru aau to Iehova. E nehenehe ïa ta tatou mau haaraa e ohipa i nia ia ˈna. Mea papu, eita Iehova e faahepo ia tatou ia here e ia tavini ia ˈna. (Deuteronomi 30:19, 20) Te na ô ra te hoê taata ite i te Bibilia: “Eita ta te hoê taata e nehenehe e haamahora i to oe aau no oe. Na oe iho â e haamahora ˈtu.” Ma te haamori ia Iehova ma to tatou aau î i te here, e nehenehe tatou e maiti i te haamahora i to tatou aau. Ia na reira tatou, te horoa ra ïa tatou i te hoê ô faufaa roa, to tatou hapa ore o te faaoaoa rahi i to Iehova aau. Eita iho â tatou e nehenehe e faaau i te oaoa o ta tatou i ite ia horoa na Iehova i te haamoriraa e au ia ˈna.—Ohipa 20:35; Apokalupo 4:11.

Te hoê tuahine Kerisetiano aita i haere faahou i te putuputuraa e i te pororaa o te farii-popou-hia ra ia hoˈi mai i te amuiraa

Hau atu â, ia rave faahou oe i ta oe haamoriraa Kerisetiano, e mâha ïa to oe hiaai i te mau mea pae varua. (Mataio 5:3) Te ui nei te taata e haaati aˈe te ao, ‘No te aha tatou e ora ˈi?’ Te hinaaro rahi nei ratou e ite i te mau pahonoraa o te mau uiraa no nia i te tumu mau o te oraraa. Tera to ratou hinaaro, no te mea ua poiete Iehova ia ratou mai tera. Ua poiete oia ia tatou ia oaoa maite tatou i te tavini ia ˈna. E ite atu â ïa tatou i te oaoa ia haamori ia Iehova no to tatou here ia ˈna.—Salamo 63:1-5.

Ia papu ia oe e te hinaaro ra Iehova ia hoˈi mai oe ia ˈna ra. E nafea e papu ai ia oe i te reira? A feruri na: Ma te pure rahi, ua faaineine-maitai-hia teie buka rairai. Ua hopoihia mai te reira na oe, peneiaˈe na te hoê matahiapo aore ra na te hoê hoa Kerisetiano. Ua turaihia oe ia taio e ia ite i te pahonoraa o te reira. Te haapapu ra teie buka rairai e aita Iehova i haamoe ia oe. E haafatata mǎrû râ oia ia oe ia hoˈi mai oe ia ˈna ra.—Ioane 6:44.

E tamahanahanahia tatou a ite ai e aita roa ˈtu Iehova i haamoe i ta ˈna mau tavini tei moe. Teie ta te hoê tuahine, o Donna te iˈoa, i haafaufaa. Ua parau oia: “Ua atea mǎrû noa vau i te parau mau, ua pinepine râ vau i te pee i te Salamo 139:23, 24, o te parau ra: ‘E hiˈopoa mai oe ia ˈu, e te Atua, ia ite hoi oe i tau aau; e tamata hua mai ia ˈu, e ia ite oe i tau manaˈo: e hiˈo mai, e eiaha ei haamainaina [aore ra e faaoto] to roto ia ˈu ia oe ra. E aratai oe ia ˈu i te eˈa e tia i te vai-maite-raa te maitai ra.’ Ua taa ia ˈu e e ere au no teie nei ao, e ere roa ˈtu tera to ˈu vahi, tei roto râ i te faanahonahoraa a Iehova te vahi e hinaaro ai au e faaea. Ua taa ˈtu râ ia ˈu e aita roa ˈtu Iehova i faarue ia ˈu, ua titauhia ia ˈu ia imi i to ˈu eˈa no te hoˈi mai ia ˈna ra. Ua oaoa roa vau i te na reiraraa!”

Tei pihaiiho Iehova ia oe ia hoˈi mai oe ia ˈna ra

Te pure nei matou ma te aau haavare ore ia ite faahou oe i “te oaoa . . . no ǒ ia Iehova ra.” (Nehemia 8:10) Ia hoˈi mai oe ia Iehova ra, eita roa ˈtu oe e tatarahapa.

Te mau pahonoraa o te mau uiraa no nia i te hoˈiraa mai ia Iehova ra

EAHA TA ˈU E RAVE NA MUA ROA?

No te hoê taata o tei maˈihia, mea titauhia ia ˈna ia rave riirii faahou i te mau ohipa ta ˈna i matau. Oia atoa, mai te hoê Kerisetiano, e nehenehe oe e patu i to oe itoito ma te tamata i te rave riirii i te maa pae varua i te mau mahana atoa. Eiaha e manaˈo e e titauhia ia oe ia rave i te mau mea atoa i te hoê â taime. Peneiaˈe e nehenehe ta oe e rave tau minuti no te taio aore ra no te faaroo i te hoê haruharuraa o te Bibilia, no te hiˈopoa hoê o ta tatou mau papai no te haere i nia i te reni jw.org aore ra no te mataitai hoê o te mau porotarama o tei haapurorohia i nia i te tv.jw.org. A tamata atoa i te apiti oioi atu i te hoê putuputuraa a te amuiraa. Te mea faufaa roa ˈtu â, a pure ia Iehova e a ani atu i ta ˈna tauturu, “a huri ai i to outou mau ahoaho atoa i nia ia ˈna, no te mea te tâuˈa mai ra oia ia outou.”—Petero 1, 5:7.

“I muri aˈe a ore ai au e haere faahou i te putuputuraa e i te pororaa, ua haama roa vau e oia atoa i te pure. Aita i noaa ia ˈu te itoito no te pure, ua haere mai ïa te hoê matahiapo e farerei ia ˈu. Ua tauturu oia ia ˈu ia taa e aita Iehova i faarue ia ˈu. Ua faaitoito mai te matahiapo ia taio na mua i te Bibilia i te mahana taitahi. A na reira ˈi au, ua itoito-faahou-hia vau no te apiti i te mau putuputuraa. I muri iho, ua poro faahou vau. Ua oaoa roa vau e aita roa ˈtu Iehova i faarue ia ˈu.”—Eeva.

E NAFEA TE AMUIRAA E FARII MAI AI IA ˈU?

Ia papu ia oe e e farii popou mai te mau melo o te amuiraa ia oe. Eita ratou e faaino aore ra e haava ia oe, e haapapu atu râ ratou i to ratou here ia oe ma te rave i tei nehenehe no te faaitoito ia oe.—Hebera 10:24, 25.

“Ua haama roa vau i te hoˈi mai i te Piha a te Basileia. Ua manaˈo noa na vau e e nafea to ˈu mau hoa e farii mai ai ia ˈu. Tei reira te hoê o to matou tuahine ruhiruhia a 30 matahiti i teie nei o te parau mai, ‘Manava i te fare, e ta ˈu tamaiti!’ Ua haaputapû roa te reira i to ˈu aau. Tei te fare iho â vau.”—Javier.

“Ua haere au i te Piha a te Basileia e ua parahi au i muri roa ia ore te taata e ite mai ia ˈu. Tera râ, e rave rahi o te ite mai ia ˈu i tera mau taime a apiti ai au i te putuputuraa, e tamarii â vau. Ua farii popou mai ratou ia ˈu, ua tauahi roa mai ratou ia ˈu. I reira ïa vau i te iteraa i te hau mau. Mai te mea ra e tei te fare faahou vau.”—Marco.

EAHA TE TAUTURU A TE MAU MATAHIAPO?

E faaite atu te mau matahiapo i te hamani maitai ia oe. E faaitoito ratou ia oe ia maitai mai “to oe here matamua.” (Apokalupo 2:4) E oaoa roa ratou i te tauturu ia oe ia faatitiaifaro i te mau hape atoa o ta oe i rave, “ma te mǎrû.” (Galatia 6:1; Maseli 28:13) E faanaho paha te mau matahiapo i te tahi atu taeae aore tuahine ia faatere i te hoê haapiiraa e oe, peneiaˈe i te hoê papai mai te buka Ia ora oe e a muri noa ˈtu! aore ra E haafatata ˈtu ia Iehova. Ia papu ia oe, e tamahanahana e e turu te mau matahiapo ia oe i roto i ta oe mau tutavaraa atoa.—Isaia 32:1, 2.

“Aita vau i haere faahou i te putuputuraa e i te pororaa i na vau matahiti. Ua tamau noa râ te mau matahiapo i te tauturu ia ˈu. I te hoê mahana, ua faaite mai te hoê matahiapo ia ˈu i te tahi mau hohoˈa o ta ˈna i pata e o matou. Ua haamanaˈo faahou mai te reira i te mau taime faahiahia e rave rahi, i hinaaro ai au e fanaˈo faahou i te oaoa ta ˈu i ite a tavini ai au ia Iehova. Ma te î i te here, ua tauturu mai te mau matahiapo ia ˈu ia maitai faahou mai ta ˈu ohipa Kerisetiano.”—Victor.

“E puai roa oe ia Iehova”

I roto i ta tatou buka himene Himene ma te oaoa ia Iehova, te vai ra te mau himene o te nehenehe e tamahanahana e e faaitoito ia oe ia rave faahou i ta oe mau ohipa Kerisetiano. Ei hiˈoraa, a hiˈo na i te himene numera 38. Ua niuhia i nia i te mau parau o te itehia ra i roto i te Petero 1, 5:10, te tumu parau o te himene, “E puai roa oe ia Iehova.”

E tumu oe i ite ai te pˈrau mau,

Ua turama Iehova ia oe.

Roto i to aau, ua ite mau oia

I te pˈrau-tia e to here ia ˈna.

Rave to Iehova hinaaro,

Euhe oe, tauturu â oia.
Horoa Iehova ia Iesu no oe,

Hiaai ia maitai noa oe.

Aore hoi oia i faaherehere

No oe ta ˈna Tamaiti here.

Tauturu e aupuru mai oia

No to faaroo papu e to here.

(FAAHOˈIRAA)

No te Atua oe ta ˈna i hoo mai.

E tauturu oia ia puai roa oe.

Na ˈna e aratai e paruru ia oe,

E tauturu mau â ia puai roa oe.

No te faaroo i teie himene e te tahi atu himene o te Basileia, a faaohipa i teie hohoˈa aore ra a hiˈo i nia www.jw.org/ty. A pata i nia PIAHIA > UPAUPA.