Te faahapa: “Tamâ hua mai ia ˈu i ta ˈu nei hara”

E NEHENEHE te faahapa e faateiaha roa ia tatou. Ua papai te arii Davida: “Ua na nia ta ˈu nei mau hara i tau upoo, mai te hopoia teiaha e ore e maraa ia ˈu ra.” (Salamo 38:4) Te vai ra vetahi mau Kerisetiano e ua teimaha roa ratou i te oto rahi, i manaˈo ai ratou e eita roa ˈtu Iehova e faaore i ta ratou hapa. (Korinetia 2, 2:7) Mea tano anei ia manaˈo mai te reira? Noa ˈtu e ua rave oe i te hara rahi, ua atea anei oe ia Iehova i ore roa ˈtu ai oia e faaore i ta oe hapa? Aita roa ˈtu!

“E faatiatia na tatou i te parau”

Eita Iehova e faarue i te feia hara tei tatarahapa. E haafatata ˈtu hoi oia ia ratou! I roto i ta ˈna parabole o te tamaiti haamâuˈa faufaa, ua faaau Iesu ia Iehova i te hoê metua î i te here. Ua faarue te tamaiti i to ˈna utuafare e ua tapi i te oraraa taiata. I muri iho, ua faaoti te tamaiti i te hoˈi i te fare. “Tei te atea ê â [te tamaiti], ite maira to ˈna metua tane ia ˈna, aroha ihora, horo maira, tauahi maitai ihora ia ˈna e apa maira.” (Luka 15:11-20) E hinaaro anei oe e haafatata ˈtu â ia Iehova, noa ˈtu e te manaˈo ra oe e ua atea ê oe ia ˈna? Mai te metua tane i roto i ta Iesu parabole, e faaite iho â Iehova ia oe i te aumihi. Te tiai ru nei oia i te farii popou faahou ia oe.

E manaˈo anei oe e no te ino mau e no te rahi o ta oe hara, eita ˈi Iehova e faaore i te reira? A hiˈo na i te titau-manihini-raa a Iehova ia au i te Isaia 1:18: “E tena na, e faatiatia na tatou i te parau, te na reira maira Iehova: ia uteute roa ta outou mau hara ra, e riro ïa mai te hiona.” Oia atoa, mai te hara i faaauhia i te hoê ahu uouo o te porao i te uteute e o te ore e tumâhia, aita te reira i hau aˈe i ta Iehova faaoreraa i te hapa.

Aita Iehova e hinaaro ra ia mauiui noa oe ma te hoê manaˈo faahapa. E nafea râ oe e ite ai i te tamǎrû no ô mai i te Atua o te faaore i te hara e e faaite ai i te hoê manaˈo haava mâ? A hiˈo na e piti taahiraa ta te arii Davida i rave. A tahi, ua parau oia: “E faˈi au i tau hara ia Iehova ra.” (Salamo 32:5) A haamanaˈo, ua titau manihini aˈena Iehova ia oe ia haafatata ˈtu ia ˈna na roto i te pure e ia “faatiatia . . . i te parau” e o ˈna. A faˈi i ta oe mau hara ia Iehova e a faaite i to oe huru aau ia ˈna. No ta ˈna iho i ite, i nehenehe ai Davida e pure ma te papu: “Tamâ hua mai ia ˈu i ta ˈu nei hara. . . . Te aau paruparu ra e te oto ra, e ore roa te Atua e vahavaha i te reira.”—Salamo 51:2, 17.

Te piti, ua fanaˈo Davida i te tauturu a te hoê tia o ta te Atua i maiti, o Natana te iˈoa. (Samuela 2, 12:13) I teie mahana, maoti Iehova, ua faaineinehia te mau matahiapo o te amuiraa no te tauturu i te feia o tei tatarahapa ia haamaitai i to ratou auhoaraa e o Iehova. Ia tapiri atu oe i te mau matahiapo, e faaohipa ratou i te mau Papai e e pure ratou ma te haavare ore no te tamǎrû i to oe aau, no te faaiti aore ra no te faaore i to oe mau manaˈo tano ore. E tauturu ïa te reira ia oe ia maitai mai i te pae varua.—Iakobo 5:14-16.

“E ao to ˈna! to tei faaorehia ta ˈna hara”

Parau mau, e manaˈo paha oe e mea fifi roa ia faˈi i ta oe mau hara i te Atua ra o Iehova e ia haafatata ˈtu i te mau matahiapo. Tera atoa to Davida manaˈo. No te hoê taime, ua “mamû noa” oia no nia i ta ˈna mau hara. (Salamo 32:3) I muri aˈe râ, ua ite oia i te haamaitairaa ma te faˈi i ta ˈna mau hara e ma te faatitiaifaro i to ˈna haerea.

Hoê o te maitai rahi ta Davida i fanaˈo, o te ite-faahou-raa ïa i te oaoa. Ua papai oia: “E ao to ˈna! to tei faaorehia ta ˈna hara, e tei tapoˈihia to ˈna ino.” (Salamo 32:1) Ua pure atoa oia: “E vevete na oe, e Iehova, i tau vaha, e na tau vaha e arue ia oe.” (Salamo 51:15) Aita faahou e manaˈo faahapa to Davida e ua mauruuru roa oia no te faaoreraa te Atua i ta ˈna hara. No reira oia i itoitohia ˈi no te faaite ia vetahi ê no nia ia Iehova.

Te hinaaro ra Iehova ia ite oe i te tamǎrûraa o te hoê manaˈo haava. E te hinaaro atoa ra oia ia faaite oe ia vetahi ê no nia ia ˈna e i ta ˈna mau opuaraa, eiaha ma te manaˈo faahapa, ma te aau haavare ore râ e ma te oaoa rahi. (Salamo 65:1-4) A haamanaˈo i teie titau-manihini-raa, “ia tumâhia ta outou mau hara, a horoa noa mai ai Iehova i te anotau haumârû.”—Ohipa 3:19.

O ta Martha ïa i ite. Te faataa ra oia: “E hapono mai ta ˈu tamaiti i te mau vea Te Pare Tiairaa e te A ara mai na! Ua haamata mǎrû noa to ˈu taairaa e o Iehova. Te tuhaa fifi roa no te hoˈi mai, o te tatarahaparaa ïa no te mau hara atoa ta ˈu i rave. I muri iho, ua haafatata ˈtu vau i te Atua na roto i te pure e ua ani atu vau ia ˈna ia faaore mai i ta ˈu mau hara. Mea fifi ia tiaturi e 40 matahiti tei mairi hou a hoˈi mai ai ia Iehova ra. Te ite ra vau i te haapapuraa, e noa ˈtu ehia rahiraa matahiti tei mairi, e taime â no te hoê taata no te tavini faahou i te Atua e no te fanaˈo i to ˈna here.”