Tamâ-faahou-raahia te hiero

E toru po to Iesu e ta ˈna mau pǐpǐ taotoraa i Betania mai to ratou taeraa mai na Ieriko mai. I te poipoi roa i te Monire 10 no Nisana, te haere ra ratou i Ierusalema. Ua poia Iesu. I to ˈna iteraa i te hoê tumu suke, tapiri atura oia. E suke anei to nia iho?

E hopea Mati taua avaˈe ra, i Tiunu roa hoi e maahia ˈi te tumu suke. Ua tupu oioi râ te rauere. Manaˈo ihora ïa Iesu e e maa paha to nia iho. Aita hoê aˈe râ. No te rauere i manaˈohia ˈi mai tera. Na ô atura Iesu: “E ore roa te taata e amu faahou i to oe maa.” (Mareko 11:14) Oriorio ihora te tumu suke. I te poipoi aˈe i taahia ˈi te auraa o te reira.

Aita i maoro tae atura Iesu e ta ˈna mau pǐpǐ i Ierusalema. Haere ihora oia i te hiero, ta ˈna i hiˈopoa i te taperaa mahana inanahi aˈe. Hiˈopoa faahou ihora oia i te hiero, e haa ˈtura mai ta ˈna i na reira e toru matahiti na mua ˈtu i te Pasa 30. (Ioane 2:14-16) Tiahi ihora oia i rapae i “te feia e hoo atu ra e e hoo mai ra i roto i te hiero.” Huri atoa ihora oia i “te mau amuraa maa a te feia taui moni e te mau parahiraa a te feia hoo uupa.” (Mareko 11:15) Opani atoa ˈtura oia i te taata atoa ia tie i te taihaa na roto atu i te aua o te hiero i te tahi atu vahi o te oire.

No te aha Iesu i tiahi ai i taua feia taui moni ra e te feia e hoo atu ra i te animara i roto i te hiero? Ua parau oia: “Aita anei i papaihia: ‘E parauhia to ˈu fare e fare no te pure no te mau nunaa atoa’? Ua faariro râ outou i te reira ei ana no te eiâ.” (Mareko 11:17) No Iesu, e eiâ teie mau taata mea moni roa hoi ia hoo atu ratou i te mau animara e pûpûhia ei tusia. E ohipa taviri ïa ta ratou aore ra e eiâ.

Faaroo aˈera te mau tahuˈa tiaau, papai parau e raatira ati Iuda i ta Iesu i rave, e imi faahou aˈera i te ravea ia pohe Iesu. Tera noa râ, aita ratou i ite e nafea ratou, mea rahi hoi te taata e haere mai ra e faaroo ia ˈna.

E ere te ati Iuda noa tei haere mai no te Pasa, te feia atoa râ tei farii i te haapaoraa ati Iuda. E taata Heleni vetahi tei haere mai i te oroa no te haamori i te Atua. Tapiri maira ratou ia Philipa, no te mea paha e iˈoa Heleni to ˈna, e parau maira e te hinaaro ra ratou e ite ia Iesu. No te taa ore paha e mea tano anei teie farereiraa, faaite ihora Philipa ia Anederea. Haere maira raua e parau ia Iesu, e au ra e tei te hiero â.

Ua ite Iesu e e pohe oia i roto tau mahana. E ere ïa teie te taime no te faatia i te hinaaro o te taata aore ra no te faaiteite ia ˈna. Pahono atura oia i na aposetolo na roto i teie faahohoˈaraa: “Ua tae i te taime e faahanahanahia ˈi te Tamaiti a te taata nei. E parau mau ta ˈu e parau atu: Ia ore te hoê huero sitona ia mairi i raro i te repo e ia ore ia pohe, e vai noa ïa te reira ei hoê noa huero. Ia pohe râ, e hotu mai ïa e rave rahi maa.”—Ioane 12:23, 24.

Ia hiˈohia te hoê huero sitona, mea huˈa, ia tanuhia râ i roto i te repo, a “pohe” atu ai ei auraa parau, e oteo mai te huero, e tupu roa mai a horoa mai ai e rave rahi huero sitona. Oia atoa no Iesu, o ˈna anaˈe te taata tia roa. Ma te tapea i to ˈna haapao maitai i te Atua e tae roa i to ˈna pohe e fanaˈo ai e rave rahi o te rave i te hoê â haapaeraa, i te ora mure ore. Na ô atura Iesu: “Te taata e nounou i to ˈna ora, e erehia ïa oia i te reira. O tei ineine râ i te pohe i roto i teie nei ao, e tapea ïa i to ˈna ora no te fanaˈo i te ora mure ore.”—Ioane 12:25.

Aita Iesu e manaˈo ra ia ˈna anaˈe, ua parau hoi oia: “Ia hinaaro te tahi taata e tavini ia ˈu, ia pee mai ïa oia ia ˈu, e i te vahi to reira vau, to reira atoa ïa ta ˈu tavini. Ia hinaaro te tahi taata e tavini ia ˈu, e haamaitai te Metua ia ˈna.” (Ioane 12:26) E fanaˈoraa rahi teie! E faatere te feia ta te Metua e haamaitai e te Mesia i roto i te Faatereraa arii.

A manaˈo ai oia i te mauiui rahi e te pohe e tiai mai ra ia ˈna, na ô atura Iesu: “Te horuhoru nei au, eaha ïa ta ˈu e parau? To ˈu Metua, faaora mai ia ˈu i teie taime ahoaho.” Te hinaaro noa ra iho â Iesu e faatupu i te hinaaro o te Atua. Na ô faahou atura oia: “No teie râ taime ahoaho i haere mai ai au.” (Ioane 12:27) Te farii ra Iesu i te mau opuaraa atoa a te Atua, ia pohe atoa ei tusia.