Ua hinaaro Timoteo e tauturu i te taata

Mea au roa na te taurearea ra o Timoteo e tauturu i te taata. Mea rahi te oire ta ˈna i tere atu e e oraraa oaoa mau to ˈna! E hinaaro anei oe e ite no te aha?—

Ua paari Timoteo i te oire ra o Lusetera. E tamarii noa ra o ˈna a haapii atu ai to ˈna mama ruau Loidi e to ˈna metua vahine Eunike o vai Iehova. A paari noa ˈi Timoteo, ua hinaaro o ˈna e tauturu ia vetahi ê ia ite o vai Iehova.

E taurearea Timoteo a ani atu ai Paulo ia apee ia ˈna no te poro i te tahi atu mau oire. Ua pahono Timoteo: ‘E!’ Ua ineine oia i te haere e tauturu ia vetahi ê.

Ua tere Timoteo e Paulo i te oire Tesalonia i Makedonia. No te tae atu, mea atea te vahi ta raua i haere na raro e i muri aˈe ua rave i te hoê pahi. I tera oire, ua tauturu raua e rave rahi taata ia ite o vai Iehova. Te vai ra râ vetahi tei riri e tei hinaaro e hamani ino atu. Ua faarue ïa Paulo e Timoteo i tera oire e ua haere e poro i te tahi atu vahi.

Tau avaˈe i muri aˈe, ua ani Paulo ia Timoteo ia hoˈi i Tesalonia no te hiˈo e mea maitai anei te mau taeae. Mea atâta te ohipa i tupu aˈenei i tera oire, e hinaarohia ïa te itoito no te hoˈi atu! No to ˈna râ haapeapea i te mau taeae no Tesalonia, ua farii Timoteo. E poroi oaoa ta ˈna ia farerei faahou oia ia Paulo, e mea maitai roa te mau taeae o tera oire!

Ua turu Timoteo ia Paulo e rave rahi matahiti. Ia au i ta Paulo i papai, o Timoteo te taata maitai roa ˈˈe ta ˈna e nehenehe e tono no te tauturu i te mau amuiraa. No te aha? No to ˈna here ia Iehova e i te taata.

Ua here anei oe i te taata no te haapii atu o vai Iehova?— Mai te peu e e, e nehenehe oe e ite i te oaoa mau e te mauruuru mai ia Timoteo!