Mea itoito te tamaiti fetii a Paulo

E hiˈo anaˈe i te aamu o te tahi taurearea tei faaora i te hoê o to ˈna fetii, Paulo. E tamaiti o ˈna na te tuahine o te aposetolo. Noa ˈtu e aita to ˈna iˈoa i faaitehia, ua ite tatou e mea itoito roa oia. E hinaaro anei oe e ite i ta ˈna i rave?—

Ua tuuhia Paulo i te fare tapearaa i Ierusalema no te mea ua faaite oia i te parau mau no nia ia Iesu. Ua faaineine vetahi taata ino i riri ia Paulo i te tahi ohipa totoa ma te na ô: ‘E haere anaˈe e parau i te taata rahi o te nuu ia aratai ta ˈna mau faehau ia Paulo i te tiripuna. E tapuni tatou i te hiti purumu, ia na reira mai anaˈe Paulo, e haapohe tatou ia ˈna!’

Ua faaroo te tamaiti fetii a Paulo i te parau no te ohipa totoa. Ua nafea oia? Ua haere i te fare tapearaa e ua faataa i te reira ia Paulo. Faaue atura te aposetolo ia faaite oioi atu i te taata rahi o te nuu. No oe, mea ohie anei no ˈna ia paraparau i tera taata rahi?— Eita, noa ˈtu râ, ua na reira teie taurearea.

Ua ite maitai tera taata rahi eaha te rave. Fatata hoi e 500 faehau i roto i ta ˈna nuu no te paruru ia Paulo! Ua faaue atu oia ia aratai ia Paulo i Kaisarea i tera iho â po. Ua nehenehe anei te feia totoa e hamani ino ia Paulo?— Aita roa ta ratou totoaraa i manuïa noa ˈˈe!

Eaha te haapii mai i teie aamu?— E nehenehe atoa oe e riro ei taata itoito mai te tamaiti fetii a Paulo. Ia itoito iho â tatou no te faaite ia vetahi ê o vai Iehova. E na reira anei oe?— Mai te peu e e, e ora mai paha te tahi taata ia oe.