E hoa papu to Iosia

I to oe manaˈo, e mea ohie anei ia rave i te ohipa tia?— No te rahiraa, e mea fifi roa. Te faaite ra te Bibilia i te hiˈoraa o te hoê tamaiti o Iosia te iˈoa. No ˈna e ere roa ˈtu i te mea ohie ia rave i te mea tia. Te vai ra râ to ˈna mau hoa papu o tei tauturu atu ia na reira. E hiˈo anaˈe eaha te parau no nia ia Iosia e to ˈna mau hoa.

O Amona te metua tane o Iosia. E arii teie no Iuda tei rave i te ohipa ino roa e tei haamori i te mau idolo. I muri aˈe i to ˈna poheraa, ua riro Iosia ei arii i Iuda. E vau noa râ to ˈna matahiti! I to oe manaˈo, ua rave anei o ˈna i te ohipa ino mai to ˈna metua tane?— Aita!

Noa ˈtu to ˈna apî, ua hinaaro Iosia e faaroo ia Iehova. Ua maiti ïa o ˈna i te faahoa i te feia anaˈe i here ia Iehova. Na ratou i tauturu ia ˈna ia rave i te ohipa tia. O vai vetahi o te mau hoa o Iosia?

O Zephania te tahi. Ei peropheta, ua faaara oia i te nunaa o Iuda i te mau ati e tupu ia haamori ratou i te mau idolo. Ua haapao Iosia i ta Zephania i parau e ua haamori ia Iehova eiaha râ i te mau idolo.

O Ieremia te tahi atu hoa o Iosia. Hoê â to raua matahiti e e ere to raua nohoraa i te mea atea roa. A pohe ai Iosia, ua itehia e e hoa piri roa raua. Ua papai hoi Ieremia i te hoê pehe taa ê no te faaite i to ˈna oto rahi ia Iosia. Ua turu noa ïa te tahi i te tahi no te rave i te mea tia e no te faaroo ia Iehova.

Eaha te haapii mai i te hiˈoraa o Iosia?— Noa ˈtu to ˈna apî, ua hinaaro o ˈna e rave i te ohipa tia. Ua ite atoa oia e mea maitai aˈe ia faahoa noa i te feia e here ra ia Iehova. A haapao maitai ïa ia maiti i te mau hoa e here ra ia Iehova e o te tauturu ia oe ia rave i te mea tia!