Aita Ieremia i faaea i te paraparau no nia ia Iehova

I te tahi taime, e faaooo aore ra e riri mai te taata ia paraparau tatou no nia ia Iehova. E hinaaro paha tatou e faaea i te faaite o vai te Atua. Mai tera atoa anei oe i te tahi taime?— Te faatia ra te Bibilia i te aamu o te tahi taurearea tei here ia Iehova e tei fatata roa râ i te faaea i te paraparau no nia ia ˈna. O Ieremia to ˈna iˈoa. E hiˈo anaˈe eaha te parau no nia ia ˈna.

A apî noa ˈi Ieremia, ua parau atu Iehova ia ˈna ia faaara i te nunaa ia faaea i te rave i te ohipa ino. E ere roa ˈtu i te mea ohie no Ieremia e ua riaria atoa hoi o ˈna. Ua parau Ieremia i te Atua: ‘Aita vau i ite eaha te parau. E tamarii noa hoi au.’ Ua na ô atu râ Iehova: ‘Eiaha e riaria. Na ˈu e tauturu ia oe.’

Ua faaara aˈera Ieremia i te nunaa e e faautua ˈtu te Atua ia ore ratou e taui. I to oe manaˈo, ua haapaohia anei ta Ieremia mau parau?— Aita. Ua faaooo aore ra ua riri roa te taata. Ua hinaaro vetahi e haapohe ia ˈna! I to oe manaˈo, eaha te huru o Ieremia?— Ua riaria e ua parau oia: ‘Eita vau e faaite faahou i te parau no nia ia Iehova.’ Ua na reira iho â anei oia?— Aita. No to ˈna here rahi ia Iehova, ua tamau noa oia i te paraparau no nia ia ˈNa. Aita Ieremia i taora i te tauera e ua paruru noa Iehova ia ˈna.

A hiˈo na i tei tupu a huri ai vetahi taata ino ia Ieremia i roto i te hoê apoo tei î i te vari. Aita ta ˈna e maa e e pape inu. Ua hinaaro tera mau taata ia pohe o Ieremia. Maoti râ ta Iehova tauturu, ua ora mai o ˈna!

Eaha te haapii mai i te hiˈoraa o Ieremia?— Noa ˈtu e ua riaria o ˈna i te tahi taime, ua tamau râ oia i te faaite i te parau no nia ia Iehova. Ia rave oe mai ia Ieremia, e faaooo aore ra e riri atu paha te taata. Peneiaˈe e haama aore ra e riaria oe, eiaha râ e faaea i te faaite o vai Iehova. E tauturu noa iho â Iehova ia oe mai ta ˈna i rave no Ieremia.