Ua riaria e ua manaˈo ê na anei oe e o oe anaˈe?

A hiˈo na i te tamaiti i nia i te hohoˈa. E au e o ˈna anaˈe e te riaria ra oia, e ere anei? Mai tera atoa anei oe i te tahi taime?— Tera iho â te huru o te taata i te tahi mau mahana. Te faaite ra te Bibilia i tei tupu no te tahi mau hoa o Iehova tei riaria e tei manaˈo e o ratou anaˈe. O Elia te tahi. E hiˈo anaˈe eaha te parau no nia ia ˈna.

Mea maoro aˈenei, hou Iesu a fanauhia ˈi, i ora na Elia i Iseraela. Aita te arii Iseraela o Ahaba i haamori i te Atua mau ra o Iehova. O Baala râ to ˈna atua e to ta ˈna vahine ra Iezebela. Ua haamori ïa te rahiraa i Iseraela i tera atua hape. E arii vahine ino roa o Iezebela! I hinaaro na hoi o ˈna e haapohe i te feia atoa e haamori ia Iehova mai ia Elia! Ua ite anei oe ua nafea Elia?—

Ua horo ê o ˈna e ua haere i te vahi atea i roto i te medebara e ua tapuni i roto i te hoê ana! I to oe manaˈo, no te aha oia i na reira ˈi?— Ua riaria Elia. Ua tano anei o ˈna i te riaria? Aita, ua ite ê na hoi oia i te puai o Iehova. Ua pahonohia ta ˈna pure a faatopa mai ai Iehova i te auahi mai te raˈi mai. Ua ite ïa Elia e i tauturu na e e tauturu â Iehova ia ˈna!

Tei roto Elia i te ana a parau atu ai Iehova: ‘Te aha na oe i reira?’ Ua pahono Elia: ‘O vau anaˈe te taata i toe mai e haamori ra ia oe. O vau anaˈe e te riaria nei au, e haapohehia hoi au.’ Ua manaˈo Elia e ua pohe te taatoaraa o te feia e haamori ra ia Iehova. Ua na ô atu râ Iehova: ‘E ere te reira i te parau mau. E 7 000 taata te haamori noa ra ia ˈu. A faaitoito. E ohipa â ta ˈu na oe!’ I to oe manaˈo, ua oaoa anei Elia i te faaroo i ta Iehova i parau iho nei?—

Eaha te haapii mai i te huru o Elia?— Eiaha roa e riaria e e manaˈo e o oe anaˈe. E hoa to oe o te here ra ia Iehova e ia oe. Hau atu â, mea puai roa Iehova e e tauturu oia ia oe! Te oaoa ra anei oe i te ite e e tauturu noa Iehova ia oe?—