Aita Davida i riaria noa ˈˈe

Eaha ta oe e rave ia riaria anaˈe oe?— E haere paha oe ia mama e ia papa ra. Te vai ra râ te hoê o te nehenehe atoa e tauturu atu. O ˈna te mea puai roa ˈˈe. Ua ite anei oe o vai?— O te Atua ra o Iehova. E hiˈo anaˈe i te huru o te taurearea ra o Davida i roto i te Bibilia. Ua papu ia ˈna e e tauturu noa iho â Iehova, aita ïa o ˈna i riaria.

Mai to ˈna aiûraa mai â, ua haapii na metua o Davida ia ˈna ia here ia Iehova. Ua tauturu te reira ia ˈna ia ore e riaria noa ˈˈe. Ua ite oia e o Iehova to ˈna Hoa e e tauturu atu iho â oia. I te tahi mahana, te haapao ra Davida i te nǎnǎ, haere mai nei te hoê liona e haru i te tahi mamoe! Ua ite anei oe ua nafea Davida? Ua auau o ˈna i te liona. Aita roa ˈˈe ta ˈna e taoˈa i roto i te rima, ua taparahi pohe roa râ i te animara! I muri iho, ua na reira atoa i nia i te hoê daba i hinaaro e haru i te mamoe! I to oe manaˈo, o vai tei tauturu ia Davida?— O Iehova.

Ua faaite â Davida i to ˈna itoito i te tahi atu taime. Ua tupu te tamaˈi i rotopu i te mau Iseraela e te mau Philiseti. O Golia te iˈoa o te tahi faehau o te pǔpǔ enemi, e taata rahi e te roa atoa! I faaooo na o ˈna i te mau faehau Iseraela e ia Iehova. Ua ani atura ïa ia haere mai e aro ia ˈna, ua riaria roa râ ratou ia Golia. A faaroo ai Davida i te reira, ua na ô atu oia: ‘O vau te aro ia oe! Na Iehova e tauturu ia ˈu e e pohe oe!’ I to oe manaˈo, e mea itoito anei Davida?— E, e taata itoito roa. E hinaaro anei oe e ite i tei tupu i muri aˈe?

Ua rave ihora Davida i ta ˈna pata e e pae ofai e ua haere e aro i te faehau enemi. A ite ai Golia e e taurearea o Davida, ua faaooo atu oia! Ua parau atu râ te taurearea: ‘Te haere mai nei oe e te ˈoˈe, o vau râ ma te iˈoa ïa o Iehova!’ Rave ihora Davida i te hoê ofai, pata atura i nia ia Golia, mau roa aˈera te ofai i ropu maitai i to ˈna rae! Topa atura Golia i raro, pohe aˈera! Ua riaria roa te mau Philiseti i horo ê ai te taatoaraa o ratou. Mea nafea to te taurearea ra Davida i nehenehe ai e haapohe i tera taata rahi?— Ua tauturu Iehova ia ˈna, e mea puai aˈe hoi O ˈna i tera taata rahi!

Eaha te haapii mai i te aamu o Davida?— O Iehova te mea puai roa ˈˈe e o ˈna to oe Hoa. Ia riaria noa ˈtu oe, a haamanaˈo, e nehenehe Iehova e tauturu ia oe ia riro ei taata itoito!