No te aha e e nafea te mau Piha a te Basileia e hamanihia ˈi?

E parauhia Piha a te Basileia no te mea o te Basileia o te Atua, aore ra ta ˈna Faatereraa arii te haapiiraa Bibilia faufaa roa i reira, tera hoi te manaˈo tumu o ta Iesu pororaa.—Luka 8:1.

E pu o te haamoriraa mau. I te Piha a te Basileia e faanaho ai te mau Ite no Iehova i te pororaa i ǒ ratou. (Mataio 24:14) Ua rau te rahi e te hamaniraa o te reira, mea tano noa râ te faanehenehe. Mea rahi te Piha a te Basileia hau atu i te hoê amuiraa te putuputu i reira. No te rahi o te mau amuiraa, ua patu aˈenei matou e rave rahi roa Piha a te Basileia apî, e pae i te mahana hoê i te faito au noa. Maoti ïa te aha?—Mataio 19:26.

Maoti te mau ô horoa noa. E haponohia tera mau ô i te amaa o te horoa ˈtu na te mau amuiraa e hinaaro i te hoê Piha a te Basileia aore ra e faaapî i ta ratou.

Maoti te mau rima tauturu rave rau aufau-ore-hia. I e rave rahi fenua, ua faanahohia te mau Pǔpǔ no te paturaa i te Piha a te Basileia. E taeae e tuahine maitihia ratou no te paturaa, apitihia mai e te mau rima tauturu. E ratere ratou na tera e tera amuiraa i te hoê fenua, tae noa ˈtu i te mau vahi atea, no te tauturu i tera mau amuiraa ia patu i ta ratou mau Piha a te Basileia. I te tahi atu mau fenua, na te tahi mau Ite aravihi e tiaau i te paturaa e te faaapîraa i te mau Piha a te Basileia i te hoê vahi maitihia. Noa ˈtu e e turu atoa ˈtu e rave rahi rima tauturu aravihi, o te mau mero râ o te amuiraa te apiti rahi atu i te paturaa i ǒ ratou. Maoti te varua o Iehova e te tutavaraa aau tae a to ˈna nunaa e tupu ai te reira.—Salamo 127:1; Kolosa 3:23.

• No te aha ta matou mau vahi haamoriraa e parauhia ˈi Piha a te Basileia?

• Maoti te aha e patuhia ˈi te mau Piha a te Basileia i te ao nei?