E nafea ta matou mau papai e faaineinehia ˈi, a hurihia ˈtu ai?

Te nenei nei matou i te mau papai na roto hau atu i te 750 reo ia ite to “te mau nunaa e opu e reo atoa” i “te parau apî oaoa.” (Apokalupo 14:6) E ere i te ohipa nainai, te turu mai ra râ te tahi mau taata papai e te hoê pǔpǔ taata huri itoito no te mau fenua atoa. E Ite no Iehova anaˈe ratou.

E faaineinehia te mau tumu parau na roto i te reo Beretane. Te tiaau nei te Tino aratai i te ohipa a te Tuhaa papairaa i ta matou pu rahi. E na teie tuhaa e haapao i te ohipa a te feia papai i te pu rahi e i te tahi mau amaa. No te mea ua rau te taata papai, e nehenehe matou e faaineine i te mau tumu parau no te feia o te mau taˈere atoa, a anaanatae ai ratou i ta matou mau papai.

E faahaerehia te tumu parau i te feia huri. Ia ineine e ia fariihia te tumu parau, e haponohia te reira na roto i te roro uira i te feia huri e ati aˈe te ao nei. E huri, e hiˈopoa e e taio ratou ei pǔpǔ i te tumu parau. E tutava ratou i te maiti i te mau taˈo tano maitai no te huri i te auraa mau o te papai Beretane na roto i to ratou reo.—Koheleta 12:10.

Vitiviti te ohipa maoti te roro uira. Eita e tia i te hoê matini roro uira ia mono i te feia papai e te feia huri. Auaˈe râ te mau titionare, porotarama e ravea maimiraa roro uira e oioi ai ta ratou ohipa. Ua haamau te mau Ite no Iehova i te MEPS. E ravea roro uira teie no te faaineine i te mau papai na roto e rave rahi reo ma te faanehenehe i te reira e te mau hohoˈa e tano, a ineine atu ai no te neneiraa.

Te na reira atoa nei matou no te mau reo e paraparauhia ra e tausani noa taata. No te aha? Te hinaaro ra hoi Iehova ia “ora mai te mau huru taata atoa e ia noaa ia ratou te ite papu i te parau mau.”—Timoteo 1, 2:3, 4.

• E nafea ta matou mau papai e faaineinehia ˈi?

• No te aha ta matou mau papai e hurihia ˈi na roto e rave rahi reo?