E nafea te mau matahiapo e tavini ai i te amuiraa?

I roto i ta matou faanahonahoraa, aita e pǔpǔ ekalesiatiko aufauhia. Te vai ra râ te mau tiaau aravihi “no te aupuru i te amuiraa a te Atua.” Mai tera iho â mai te haamataraa mai â o te amuiraa Kerisetiano. (Ohipa 20:28) E taairaa piri to teie mau matahiapo feruriraa paari e o Iehova. Te tiaau e te aupuru nei ratou i te amuiraa “eiaha ma te faahepohia, ma te aau tae râ i mua i te Atua, eiaha no te nounou taoˈa, ma te hinaaro mau râ.” (Petero 1, 5:1-3) Eaha ta ratou hopoia?

E haapao e e paruru mai. Maoti te Bibilia e aratai e e tauturu ai te mau matahiapo i te amuiraa ia piri noa ia Iehova. No te mea na te Atua i horoa ˈtu i teie hopoia faufaa roa, aita ratou e faahepo nei i to Iehova nunaa. Te tauturu nei râ ia maitai e ia oaoa matou. (Korinetia 2, 1:24) Mai te tiai e aupuru maite i ta ˈna mau mamoe atoa, te tutava nei te mau matahiapo i te haamatau i te mero tataitahi o te amuiraa.—Maseli 27:23.

E haapii mai e nafea ia rave i te hinaaro o te Atua. I te mau hebedoma atoa, e tiaau te mau matahiapo i te mau putuputuraa a te amuiraa ia puai to matou faaroo. (Ohipa 15:32) Mea itoito roa atoa ratou i roto i te pororaa i te parau apî oaoa, a faaineine ai ia matou i roto i te mau tuhaa atoa o te taviniraa.

E faaitoito mai. Ia piri atu â to matou taairaa e o Iehova, e haere mai te mau matahiapo i ǒ matou aore ra e paraparau mai i te Piha a te Basileia no te faaitoito e te tamahanahana mai maoti te Bibilia.—Iakobo 5:14, 15.

Mea rahi te hopoia a te mau matahiapo i roto i te amuiraa. Hau atu â, e ohipa e e hopoia utuafare ta te rahiraa o ratou o te titau ra i to ratou taime. E tano ia faatura i tera mau taeae itoito rahi.—Tesalonia 1, 5:12, 13.

• Eaha te hopoia a te mau matahiapo o te amuiraa?

• E nafea te mau matahiapo e haapao ai ia matou?