‘Aore roa ratou i ite’

E NEHENEHE e fifihia ia ore te mau faaararaa e tâuˈahia.

Te faaineine ra te oire o Darwin, i Auteralia, i te mau oroa i te matahiti 1974 a faaara ˈi te mau pu i te hoê vero e piri maira. Aita hoi o Darwin i û faahou i te vero fatata e 30 matahiti i te maoro. No te aha ïa i teie nei? Aita te rahiraa o te taata i manaˈo e mea atâta iho â e tae roa i te taime a haamata ˈi te mau tapoˈi fare i te pee i te mataˈi e te papai o te mau fare e taata to roto, i te mataratara. I te poipoi aˈe, ua ano te oire.

I Colombie i Novema 1985, ua tutuha te hoê mouˈa auahi. Ua faahee te hiona e te pape paari e tahe ra i te vari o tei tapoˈi e 20 000 tiahapa taata no te oire o Armero. Aita anei i faaarahia? Ua aueue te mouˈa e mau avaˈe i te maoro. No te mea râ ua matau ratou i te faaea i pihai iho i te mouˈa auahi, aita te rahiraa o te taata no Armero i tâuˈa. Ua faaarahia te feia toroa a te hau e ua fatata te hoê ati i te tupu, aita râ ratou i faaara maitai i te huiraatira. Ua haapuroro te radio i te mau parau faaite no te tamǎrû i te huiraatira. Ua faaohipahia te haaparareraa reo i te fare pure no te parau i te taata ia faaea hau noa. I te po, e piti paainaraa riaria tei tupu. E faarue anei outou i ta outou mau taoˈa a horo atu ai? Mea iti tei tutava i te na reira hou a maoro roa ˈi.

E pinepine, e faaite atea te feia o te ihi fenua ma te tia roa ihea te mau aueueraa fenua e tupu ai. Mea varavara râ ratou i te faaite atea afea roa te reira e tupu ai. I te matahiti 1999, ua haapohe te mau aueueraa fenua i te ao nei fatata e 20 000 taata. Mea rahi o te feia i pohe tei manaˈo e eita roa ˈtu ratou e û i te reira.

Eaha to outou huru i mua i te faaararaa a te Atua iho?

Ua faataa maitai te Bibilia mea maoro na mua ˈˈe i te mau ohipa e tupu i te anotau hopea. No nia i te reira, te faaue maira te Bibilia e manaˈo i ‘te anotau o Noa.’ I tera “anotau i mua iho i te diluvi,” te rave ra te taata i te mau ohipa matauhia o te oraraa, noa ˈtu paha to ratou tapitapi i te rahi o te haavîraa uˈana. E no nia i te faaararaa ta te Atua i horoa na roto i ta ˈna tavini ia Noa, ‘aore roa ratou i ite, e roohia noa ihora ratou e te diluvi, pau roa ˈtura ratou.’ (Mataio 24:37-39) E faaroo anei outou i te faaararaa? Te na reira ra anei outou?

E nafea outou ahani outou i ora i Sodoma, i pihai iho i te miti Avaava, i te tau o te taata ra o Lota, tamaiti fetii a Aberahama? E au te mataeinaa i te paradaiso. Mea ruperupe te oire. Mea haapeapea ore te taata. I te tau o Lota, “te amu ra ratou e te inu ra hoi, te hoo atura, e te hoo maira, te faaapu ra, te faatia ra i te fare.” Mea morare ore roa atoa te taata. E faaroo anei outou i te faaararaa ia faahapa Lota i te mau peu iino? E faaroo anei outou ia parau oia ia outou e ua faaoti te Atua i te haamou i te oire o Sodoma? Aore ra e na ô outou e e parau hauti tera, mai na hunoa a Lota? E haamata anei outou i te horo e i te hiˈo i muri, mai te vahine a Lota? Aita te tahi atu i tiaturi i te mau faaararaa, i te mahana râ i faarue ai Lota ia Sodoma, “ua mairi maira te auahi e te gopheri no nia i te raˈi, hope roa aˈera ratou i te pohe.”—Luka 17:28, 29.

Aita te rahiraa i to tatou tau e ite ra, aore ra e tâuˈa ra. Ua papaihia râ teie nau hiˈoraa i roto i te Parau a te Atua no te faaara ia tatou, no te faaitoito ia tatou ia ARA!

[Tumu parau tarenihia/Hohoˈa i te api 22]

Ua diluvi-mau-hia anei te fenua?

E rave rahi taata faahapa te parau e aita. Area te Bibilia, oia ïa.

Ua faahiti o Iesu Mesia iho i te reira, e te ora ra oia i te tupuraa te reira, ua ite hoi oia mai te raˈi mai.

[Tumu parau tarenihia/Hohoˈa i te api 23]

Ua haamouhia iho â anei Sodoma e Gomora?

Te haapapu ra te ihipǎpǎ i teie tupuraa.

Te faahiti ra te tuatapaparaa o te ao i te reira.

Ua haapapu Iesu Mesia i te tupuraa, e te faatia ra 14 buka o te Bibilia i te reira.