O vai ma te mau enemi o te Atua?

O te Diabolo ra o Satani te enemi rahi o te Atua. E varua poietehia oia tei orure hau ia Iehova. Te tamau nei Satani i te aro atu i te Atua e te haapeapea rahi nei i te taata. E mea ino Satani. E haavare e e taparahi taata oia.—Ioane 8:44.

Ua tahoê atu te tahi mau varua poietehia ia Satani i roto i ta ˈna orureraa hau. Te parau ra te Bibilia e mau demoni ratou. Mai ia Satani, e mau enemi te mau demoni no te taata. Mea au na ratou e haamauiui i te taata. (Mataio 9:32, 33; 12:22) E haamou roa Iehova ia Satani e ta ˈna mau demoni. E taime poto noa to ratou e toe nei no te haafifi i te taata.—Apokalupo 12:12.

Mai te peu e e hinaaro oe e riro ei hoa no te Atua, eiaha roa e rave i ta Satani e hinaaro ra ia rave oe. Mea riri roa na Satani e te mau demoni ia Iehova. E enemi ratou no te Atua, e te hinaaro nei ratou e faariro ia oe ei enemi no te Atua. E tia ia oe ia maiti o vai ta oe e faaoaoa: Satani aore ra Iehova. Mai te peu e e hinaaro oe i te ora mure ore, e tia ia oe ia maiti i te rave i te hinaaro o te Atua. E rave rahi ravea aravihi e huru raveraa ta Satani no te haavare i te taata. Ua vare e rave rahi taata ia ˈna.—Apokalupo 12:9.